مستنية الفرج

بقالي اسبوع مستنية الفرج ولسه ربنا مفرجهاش عليا - بس الحمد لله انا مش مستعجلة خلاص

كل يوم بخرج تقريبا...عاملة زي اللى واخدة اجازة اخر السنة وطول الاجازة مخرجتش وافتكرت اخر يوم فى الاجازة ان بكره المدرسة...وبعمل كل حاجة بقى فى اخر يوم ده...انا كده...بدخل سينما واتمشى فى الشارع واشتري حاجات مش محتاجاها وافرقع فلوس وخلاص...مقضياها يعنى :)

بحاول بقدر الامكان ابعد فكرة الولادة واللي هايحصل بعد ما اجيب حاجة صغيرة كده بتنزن! على خير انشاء الله!

احلى حاجة اليومين دول الدلع! بدلع على كل الناس وكله متقبل عادي جدا.. يا .قاعدة بطة فى مكانى يا بخرج...غير كده مش بعمل اي حاجة ...ماما ممكن اشرب؟ "طبعا يا حبيبتي"...ماما انا جعانة..."حالا اعملك ايه؟"....معلش مش قادرة اوطي اجيب البتاعة اللى وقعت منى دي...."لااا اوعى توطي هاجيبهالك انا"....وهكذا...اخر بلطجة.

برضه الايام دي بتكتر التليفونات من اصحابي علشان  ادعي لهم وانا بولد...ومن ناس تانية علشان يأكدوا عليا اقولهم لما اجي اولد علشان يدعولي...وتليفونات من ناس بتطمن لوجه الله :) التليفون بيرن على طول ودي حاجة عجباني اوي...الاهتمام حلو برضه.

قدامى اسبوع تقريبا وخلاص...اخر علاقتى بالحمل ناقص لها اسبوع...مش عارفة احساسي هايبقى ايه وانا خفيفة كده ومش شايلة قالبين طوب جواها...انا حاليا مش متضايقة...بس عايزة اشوفه شكله هايبقى ايه...فضول يعنى مش اكتر...ابيض؟ اسمر؟ بشعر؟ ولا اقرع؟ هايبقى وحش ومكرمش زي معظم العيال اللى بتتولد جديد؟ ولا وشه مفرود كده ومصحصح؟ رفيع؟ تقيل؟ كده يعنى...انا حلمت بيه حوالي مرتين...فى المرتين كان استغفر الله العظيم :) :) كان صغير اوي كده ومكرمش خالص وشعره احمر!!!! مفيش حد في عيلتنا شعره احمر خالص! المهم كان بيزن كتير كمان...فى المرة التانية كان برضه شكله ضال...بس نرجع ونقول احلام مش مهم!




يا ترى هاقرف منه؟ اصله هايحتاج ان الواحد يعصر على نفسه ليمونتين تلاته علشان يعرف يتعامل مع اشكال كتير من العك واللغوصة! واحدة صاحبة اختى بتستعمل على طول جوانتي طبي علشان تعرف تعيش حياتها معاه كده براحتها!! والهدوم!! يا ترى الهدوم فعلا هاتبوظ منه؟ هدومى وهدومه؟ والملايات والحاجات دي برضه هاتبوظ؟؟ لو حد يعرف يقولي...بس حتى لو هاتبوظ يعنى هاعمل ايه؟ اكيد مش هافرش له اكياس بلاستيك!! ياللا مش خسارة فيه


ناس كتير نصحونى انى امشي كتير...وحتى الدكتور قالي امشي بس متجهديش نفسك...وانا بمشي على اد ما بقدر لغاية ما احس ان مفصل رجلي هايطلع بره ويمشي لوحده من التعب...المشكلة ان بعد كده بكون مش قادرة اتحرك وضهري يوجعنى ورجلي تورم وبيبقى حالتي حالة!  واحدة صاحبة  اختى برضه بتقولي حاولي تجري!!!!! اجري ازاي يا حاجة؟ لا اجري... حاولي بس تجري. على اساس ان العمود الفقري استانليس ستييل وركبي دي خشب!


لو حد عنده حاجة مفيدة يقولي والنبي...حاسة انى داخلة على حاجة كده مش مفهومة وضلمة شوية!

يا ام السعد يا ام السعد

"يعنى ولدتي ولا هاتولدي ولا  يه؟"

"لا كنت هاولد بس الواد رجع فى كلامه"

"ازاي يعنى؟"

"والله انا شخصيا معرفش"

"خلاص اشربي قرفة كتير ولبن وكلي بلح"

"حاضر"

"وامشي...المشي الكتير هوا اللى هايخليكي تولدي على طول"

دي النصايح اللى بسمعها من ساعة اللى حصل...معرفش البلح واللبن بيعملوا ايه بس اللى اعرفه ان القرفة بتخلي البابي يبقى هايبر شوية! الله اعلم.
رحت الشغل امبارح رغم معارضة الجميع...بس رحت...وكل ما حد يشوفني يقولي "ايه ده؟ لسه؟"...طيب اجاوب بايه؟ واحد قلت له "لا خلاص بس جيت علشان وحشتوني!!!"
انا غالبا مش هاروح الشغل تانى خلاص...دخلت لمديرتي وفهمتها الوضع وانى ممكن اعملها فى اي وقت ومش هاينفع اروح علشان الشغل بعيد عن البيت وعن المستشفى والست بصراحة كانت متفهمة وقالت لى ترجعي بالسلامة وكده. قبل ما امشي الناس كانت بتسلم عليا زي ما يكون طالعة اجاهد ومش هارجع تانى:) بس بجد فرحت انى فارقة معاهم كده بس برضه محدش رحمنى من النصااااايح الغالية...اخر نصايح بقى...قالوا لي اشرب حلبة (قديمة النصيحة دي) واجيب مشط طبي (مسمعتش عن  حاجة اسمها مشط طبي قبل كده...هيا قصدها مشط طري للاطفال) علشان البابي بيطلع له في شعره قشر فأشيل القشر ده بالمشط (هوا قشر يوستفندي؟)!! وقالت لى قبل ما تأكلي ابنك استحمي كويس (!!) وانتى بتولدي بقى ادعي للمسلمين جميعا...قولي يا رب اجمع ما بين المسلمين وخليهم ايد واحدة...وادعي لاولاد المسلمين علشان بقى حالهم وحش جدا...اوووووعى تنسي الدعوتين دول!!!
- وتاخدي معاكي ايشارب علشان لما تأكلي ابنك محدش يشوف بياكل كتير ولا قليل علشان الحسد!
 (محدش قال انى لافاش كيري وهابقى كده عادي قدام الناس)
-  لالالالا كده كده هايحصل قدام الناس مش بمزاجك...هوا انتى تقدري تقولي لحماتك مثلا اطلعي بره؟ ولا تقولي لمامتك؟ يزعلوا
(طيب ما يزعلوا ما دي حاجة مش ادمية يعنى وبعدين مش من حق حد انه يزعل!)
-  بيتهألك!

ليه يا جماعة محدش بيدي الست اللى بتولد دي مساحة؟ ليه كله بيبقى واقف على نفسها؟ مش ممكن كده! انا من دلوقتى بفكر هاعمل ايه...مش عايزة حد يشوفني وانا تعبانه قبل العملية ومش عايزة حد يقف معايا فى اوقات محرجة زي اللى هاتحصل...لانها فعلا حاجة غير ادمية بالمرة. مش الحب والاهتمام انك تكبس على نفس اللى معاك...لو بتهتم بحد اهتم بمشاعرهم واهتم بادميتهم...وبلاش بقى الكلام بتاع "الناس تقول كده"...ما تولع الناس!!! انا مش حيوان فى الشارع ولا فى حديقة الحيوانات علشان اولد فى قفص قدام الناس!!! ايه ده؟؟؟ فعلا حاجة مستفزة جدا. وليه محدش يبقى عنده دم ويخرج من الاوضة لما يلاقوا ان الممرضة او الدكتور دخل علشان يكشفوا عليها ولا يغيروا على الجرح ولا علشان يوروها حاجة تعملها للبابي؟؟ ليه كل حاجة لازم حد تانى يكون شاهد عيان عليها؟ فعلا مش عارفة هاعمل ايه ساعتها وحاولت مع جوزي اننا نروح المستشفى من غير ما نقول لحد لغاية ما ادخل العمليات وبعدين نعرف اهالينا انى فى المستشفى...بس طبعا رفض علشان "هايزعلوا"....ما يزعلوا!!! شوية وخلاص هما يعنى هايعلقوا لنا المشنقة؟؟ وبعدين احنا مش اطفال طالعين رحلة ولازم ولي الامر معانا!! وطبعا عمر ما اي راجل هايفهم ازاي بيكون الموضوع ده مهين للست وازاي هيا بتعانى جدا منه...هوا عايز مامته ومامتها واخواتها والجيران والاقارب والاحبة  يقفوا جنبه وهوا اعصابه بايظة علشان مراته صوتها جايب اسوان...طيب والست اللى بتلطم دي ماهي فى الاخر برضه بني ادمة! وتعبانه جسديا مش ناقصة كمان تعب نفسي وضغط على اعصابها!!! وايه لازمة ان حد يقعد جنبي وانا بعيط ولا بصوت ولا بشتم مثلا؟ هايعملوا لي ايه؟؟؟ كل واحدة هاتفضل تمصمص فى شفايفها وتبطبط على اي حته منى قريبة منها وخلاص وتقول "معلش استحملي"!!! حد يكلم جوزي ويقوله انى مش عايزة حد بجد!!!!

لسه بدري

يا جماعة انا اتبهدلت!!!

مع احترامي للمرأة وللمساواه بالرجل واهمية المرأة فى المجتمع وانها نص الدنيا كلها وان من غيرها مش هايكون في بشرية

دكاتره النسا دول ينفعوا يشتغلوا فى المدبح...مش مع ستات !!!!

اليوم اللى قبل الوقفة رحت للدكتور (متابعة عادي) وقالي على اربع علامات للولادة...لو اي واحدة فيهم حصلت يبقى انا دخلت فى ولادة واتصل بيه على طول! نفس الليلة دي تعبت - حسيت على الساعة اتنين بالليل بوجع وقلت عادي - يمكن من العربية ولا حاجة ....على خمسة الفجر كنت بشد فى شعري!!! تعبت جداجدا وقلت خلاص ولادة....وبعدين هاتصل بالدكتور ازاي خمسة الفجر دي؟؟ حسيت ان الموضوع بيزداد سوء...فدست على نفسي وحضرت الشنطة بتاعة البابي (اخيرا) وماما ساعدتنى طبعا وحضرت الشنطة بتاعتى وبقيت Stand by ان اي وقت هوب على المستشفى وخلاص! فضلت صابرة لغاية 12 الضهر تانى يوم واتصلت بالدكتور...بمنتهى الهدوء قالي "انتى متحملة الالم؟" (كنت بعيط بالدموع من التعب - بس لسه مضربتش دماغي فى الحيط ) فقلت له اه لغاية دلوقتى متحملاه...قالي يبقى اتصلي بيا كمان ساعتين واحسبي الالم بيجي كل كام دقيقة.

ساعتين؟؟؟؟ انا لسه هاستنى ساعتين؟؟؟ انا صابرة بقالي سبع ساعات!! المهم ساعتين عدوا زي ما عدوا واتصلت بيه تانى - قالي لا اصل ممكن الالم ده يفضل كده يومين ولا حاجة!!! اييييه؟ يومين؟ انا هافضل كده يومين؟؟؟ ليه؟؟؟ جمل؟

المهم فضلت على الحال ده لغاية حداشر بالليل! وجوزي اتصل بيه بقى المرة دي علشان كده استهبال! الدكتور قاله خلاص روح المستشفى وهيا لو في حالة ولادة هايتصلوا بيا! ورحت المستشفى وياريتنى ما رحت!!

اول حاجة لاي واحدة حامل احب اقولها انك مش هاتصعبي على حد خااااااالص...زيك زي اللى عنده برد! عادي يعنى! فى منك كتير وانتى مش اول ولا اخر واحدة تولد  واي صويت ولا عياط ولا اي حاجة من الكلام الفاضي مش بيحوأ معاهم! المهم دخلت اوضة كده للكشف وجت واحدة (بيقولوا دكتورة بس انا اشك فى الموضوع ده) وكشفت على البهيمة اللى قدامها! انا لو شفتها فى اي يوم بتعدي الشارع هاجيبها تحت عجل العربية. معاملة غير ادمية بالمرة...بنت اللى هيا بنته بهدلتني وكانت بتتكلم كده بطريقة "انتى على فكره مدلعه" وقالت لى امشي كتير...انا عندي مشكلة فى اربطة رجلي ولما جوزي قالها طيب هيا دلوقتى عندها تمزق فى الاربطة قالت له خلاص! هيا حره! (انا عارفة ان السؤال ملوش اجابة اوي...بس مش بالاسلوب الرخم ده تكون الاجابة)

المهم فى الاخر قالوا لي انتى مش فى حالة ولادة اصلا....طيب يا جماعة اللى انا فيه ده ايه؟؟ لا عادي علشان اول بابي!! ولسه بدري مش قبل بكره بالليل او بعد بكره الصبح ...واتصلوا بالدكتور وقالهم يدولي حقنتين مسكن الام!!!! وقالت لى كل ما تحسي انك تعبانه خدي بانادول!

المهم تانى وتالت يوم كان فى اعراض تانية للولادة برضه غير الالم ولما اتصل بالدكتور يقولي لسه !

النهاردة تالت يوم العيد و "لسه" برضه...بس الجديد انى مش حاسة باي حاجة خالص :) شكل الواد كان بيهزر معايا! بصراحة مكسوفة من الدكتور مش عارفة بعد كل التليفونات اللى قرفته بيها وفي الاخر مش هاولد دلوقتى دي هافسرها ازاي!

وفي سؤال تانى مهم ... المفروض هاروح الشغل بعد بكره - اروح ولا مرحتش؟ طبعا الاجابة المنطقية انى مرحش بس يا ترى هاجيب اجازات منين؟ طيب لو فضلت كده مثلا اسبوعين كمان...حد فى الشغل هايصدق انى فعلا كنت تعبانه ومش بستهبل؟ طيب اخد اجازة بدون مرتب اسبوعين مثلا؟ ما انا لو خدتهم دلوقتى مش هاخد اجر اجازة الوضع بالكامل! وقصة وفيلم وحدوته علشان اعمل اقرار عودة وبعدين اعمل اجازة وضع.

ممكن حد يقولي اعمل ايه؟ علشان فعلا مش عارفة ومتضايقة اوي!!!

ياللا شدي حيلك واولدي بقى

"ها ولدتي؟"

"لا لسه!"

"ما تولدي وتخلصي بقى"

"حاضر من عيني بس كده؟ هاعلي النار شوية علشان يستوى بسرعة"

ده اول حوار فى اي مكالمة تليفون! يعنى هوا انا هاخلله جوا؟ هاسيبه للاعدادية؟ لما اولد الناس هاتعرف - خلاص بقى! وبعدين حتى لو ولدت فعلا هايعملوا لي ايه يعنى؟ هايقولوا لي مبروك وعقبال ما تخاويه! وتبدأ فصول مأساه تانية مع الناس وهي "انت ناوية تانى امتى؟" - زي ما يكون الحمل والولادة زي طالعة مارينا فى الصيف كده!!!

ولما حد يقابلني وجها لوجه الايام دي بيكون الحديث كالتالي:

"كل سنة وانتى طيبة"

"وانتي طيبة"

"السنة اللى جاية يبقى ابنك على كتفك"

"انشاء الله"

"او واحد على كتفك وواحد جوا"

"..."

"ولا انتى مش ناوية تاني؟ اصلها موضة اليومين دول الواحدة تخلف مرة واحدة بس!!"

"والله لما يبقى الاول يجي بس وكله بتاع ربنا"

"لاااااا بس اوعى توحديه فى الدنيا حرام! ربنا يسئلك على كده"

"كله رزق"

"ما طبعا يا حبيبتي كله رزق هوا حد قال حاجة؟ بس برضه يعنى متمنعيش انتى خليها على ربنا"

"..." دموعى بتلمع فى عيني من كتر الغيظ ولسانى السليط هايفطس ويرد بس بحاول جاهدة انى افضل ساكته!!!

هيا بقى الناس كده! محدش بيعجبه حاجة ومحدش بيسكت وخلاص غير قليل جدا. يعنى مثلا ناخدها كده خطوة خطوة من ايام المدرسة (ايوه المدرسة) من اعدادي يبدأ سؤال "علمي ولا ادبي"...وتيجي الثانوية العامة ويبدا سؤال "كلية ايه؟" ولما تيجي الكلية "ناوي على ايه بعد الجامعة؟" ولما نتخرج "ها ناوي تقدم فى شغل ايه ولا تكمل دراسات عليا؟" ولما يجي الشغل "ياللا بقى شوف لك عروسة (ولو بنت يتقال لها شدي حيلك!!!!!)" وبعد ما تشد حيلها ويجي ابن الحلال يتقالها "ها وامتى بقى الفرح؟" ويجي الفرح ويبدا السؤال الابدي الممل "اييييه مفيش حاجة فى السكة؟؟؟" وكلام زي "عايزين نفرح بيكي" "ياللا بقى هاتي لك حته عيل كده يملى عليكوا البيت" ولما تبقى المسكينة فعلا حامل يتقالها "امتى تولدي" ولما تولد "سنن ولا لسه؟ طلع له كام سنة؟" ولما يطلع له اسنان "ها مشي ولا لسه؟" ولما يمشي  "امتى تفطمي" ولما تفطم "لسه بيلبس بامبرز ولا اتعود خلاص من غيره؟" ولما يتفطم من البامبرز يتقال "امتى تحملي تانى" ولما تحمل تانى "ناوية كمان مرة و لا خلاص كده؟ انا رايي ان تلاته كويس علشان لما حد فيهم يتجوز متلاقيش نفسك لوحدك" ولما يحصل او مايحصلش يبدا الحوار بتاع "هايدخل حضانة؟ ولا هاتاخدي اجازة من الشغل؟ حرام عليكي تسيبي العيل كده فى الحضانة يجيله امراض" ولما يكبر ويبقى في سن المدرسة "لغات ولا عربي؟ خاص ولا حكومي" ............الخخخ...كفااااية بجد! تدخل الناس المميت فى حياة بعض بقى غير عادي وبقى سخيف جدا ولا يطاق!!! انا لو فضلت اكتب الكلام الفاشل اللى بيتقال فى جميع المناسبات لجميع الناس الكي بورد هاتدوب تحت ايدي!!

يا ريت نرحم بعض شوية ويا ريت اللى بيقرا البتاعة دي ويعرفني يبطل يقولي "ياللا شدي حيلك" !!!