جبتي كام فنلة؟

صممت اول امبارح انى اروح بيتي - كفااااية كده - فعلا مش حاسة خالص ان ليا بيت مستقل كده ولا مطبخ اعك فيه براحتى ولا شقة اكركب فيها بمزاجي (هيا اصلا مش ناقصة كركبة اكتر... بس برضه براحتى) المهم امبارح كان يوم عظيم جدا - لوحدي فى الشقة زي ما يكون سيبوا طفل صغير بتاع سبع شهور مع شوية ورق وهيييييصة بقى. فضلت اتمشى من الاوضة دي للاوضة دي وادخل اتفرج شوية على كركبة المطبخ واخرج اتفرج على اي حاجة في اي حته وارجع استريح شوية (ال يعنى بقى المجهود) المهم كان فى النهاية القرار المصيري انى انضف الشقة! علشان بجد هوا ملوش ذنب يقعد فى مكان عاطفي زي ده كده (مع انه اتصل بيا كذا مرة وفي كل مرة يأكد عليا معملش اي حاجة فى البيت) بس برضه احساسي بالمسئولية (هابقى ام بقى ) انى لازم انضف الشقة. وقد كان! نضفتها كلها ووضبت كل حاجة ولمعت ومسحت وكل شغل الخدامين عملته ...طيب والله انا فل اوبشن (full option) لانى طبخت كمان! المهم جوزى جه من الشغل وانا فرحانه بشبابي جدا انى عملت كل ده فى يوم واحد واحساسي انى زوجة محصلتش كان مسيطر عليا اوي - وكان مخبي حاجة ورا ضهره...انا قلت مثلا اتنين كيلو موز ولا حاجة (على فكره يا جماعة الموز مهم  للحوامل علشان التشنج العضلي اللى بيحصل) ولقيت انه جايب لي بوكيه ورد!!! (ورد؟؟ ليه النهاردة ايه؟؟) طيب مش حد كان يقولي ان النهاردة الفالنتاين؟؟؟ انا عمالة اكلمه على السلاطة والاكل ويحب ياكل الاول ولا ايه وهوا جايب لي ورد!!.حسيت فجاه انى ست بيت "بطيخة" مفيش فى دماغها غير البصل والتقلية والفنيك و"الواد" اللى لسه مجاش...انا طبعا مجبتش اي حاجة لانى اساسا مكنتش فاكرة...طيب لو انا من دلوقتى كده...امال لما "الواد" ييجي هاعمل ايه؟!! هانسى العيد الكبير؟ هوا الحمل ليه علاقة بتبلد الاحساس والرومانسية؟ اعتقد ان الاجابة اه.

ما علينا

اول امبارح حصل موقف فى الشغل وقررت انى  انتقم واقوله هنا وافضح الدنيا. وده (طبعا يعنى) تبع التريقة بتاعة الناس

دخلت مكتب ولقيت واحدة بتقولي "ايييييييييييييييييييه ده؟ كل ده؟"(الجملة دي بتتقال لي كتير وبجد هابدا اخد موقف عدائي من الناس)  قلت لها في ايه؟؟ قالت لى "انتى على فكره مش هاتخلفي ولد..انتى هاتخلفي جحش" (كالعادة هاسيب لكوا الكومنت) وطبعا رديت عليها بس حفاظا على شكلها برضه مش هاقول انا رديت قلت ايه

من الحاجات الغريبة برضه اللى  اتعرضت لها موقف من حوالي اسبوعين تلاته كده ...قابلت واحدة زميلتي مشفتهاش من فترة كبيرة وسئلتنى انا فى الشهر الكام وقلت لها ...وكان واقف معاها واحدة اعرف شكلها بس معرفهاش شخصيا وكان السؤال "ايه ده انتى حامل؟" قلت لها اه "قالت لى انتى متجوزة؟" (ارد والنبي اقول ايه؟؟؟ اي اجابة على السؤال ده هايبقى معناه انى اغبى من اللى بيسئل" ملقتش اي حاجة اقولها غير "لا لسه متجوزتش".

على فكره الرجالة اندال جدا مع الستات الحوامل معرفش ليه...يعنى مثلا اكون واقفة مستنية الاسانسير وفي بنت امورة تانية وواحد كمان...ويكون في مكانين بس فى الاسانسير ...البيه يوسع لها الاول ويضحك ويعمل نفسه مش شايف ويدخل ويسيبنى انا بره!! ليه؟ انا اولى انى اركب بما ان ظروفي صعبة! ولا علشان شكل ال (انتوا عارفين ايه)! بس هانقول ايه؟ حسبي الله ونعم الوكيل.

ليه كل ما اجيب حاجة الناس تقولي "ايه العبط ده؟ ده كله هايجيلك هدايا" الكلمة دي سمعتها عن سرير البابي - البطانية - الكوفرتة - سالوبيتات شتوى - وكمان عن كرسي العربية . مفيش حد بيسئلني جبتى حاجة البابي ولا لسه غير لما يسئل عن حاجة واحدة بس...عارفين ايه؟ فانلات البابي!!! جبتي كام فنلة؟ وجبتي فانلات بكم ونص كم؟ جبتي فانلات بتتقفل من الجنب بكباسين علشان دماغه اول ما يتولد؟ طيب جبتي مقاس زيرو لغاية تلات شهور ولا زيرو بس؟ هوا الولد هاينزل بفانلة بس؟؟؟ طيب لو انا مش هاجيب بطانية الفه فى فوطة مثلا وانا خارجة من المستشفى؟ وعلى ما الناس تتلحلح وتجيب الهدايا الف الولد فى شال؟  ولو مش هاجيب سرير البابي وهاستنى "اونكل فلان" مثلا يجيبهولي وجابه فعلا بعد تلات اربع شهور... الواد ينام فين؟ وياريت محدش يقولي جنبك علشان انا مبحبش الحركة بتاعة العيال اللى بيلزقوا فى سرير اهاليهم دي. ولو مش هاجيب كرسي العربية هاحطه فين؟ على حجري؟ ماهو غلط علشان لو حصل حادثة مثلا بعد الشر. ولو مش هاجيب هدوم هالبسه ايه؟ برضه اوبشن الفوطة شغال ولا ايه؟؟؟ ياريت يا جماعة اجابة

اصل انا مجربة موضوع "هايجيلك هدايا" ده فى الجواز وقررت انى مش هاكرر نفس الكارثة مرة تانية. وانا بفرش الشقة كان في حاجات كتير فى بالي عايزة اجيبها وكان اصحابي بيقولوا لي "يابنتى بلاش هبل - الحاجت دي كلها بتيجي هدايا" ومنها الاباجورات واكسسوار البيت. المهم قلت خلاص استنى اشوف هايجيلي ايه ولما احب اجيب اكتر اشتري بعد كده بدل ما يكون عندي حاجات مكررة. اول حاجة الناس بدات تيجي بعد الجواز بكذا شهر! واللى جاب هدية جاب لي بايركس!!! عندي كمية بايركس ممكن اطبخ فيها موائد الرحمن ...وللاسف ده كان الحاجة الوحيدة اللى انا مفكرتش ان الناس هاتجيبها وجبت منها اصلا بالهبل. محدش عايز بايركس؟

برضه من الحاجات اللى الناس بتصمم تسئل عنها فى الفترة دي "جبتي بامبرز ولا لسه؟" - لا والله لسه - "ليييييه؟؟ ده ضروري - انتى خدي لك بتاع 500 جنيه كده وجيبي بيهم بتاع حديثي الولادة" - طيب معلش لامؤاخذة فى السؤال - اجيب ب500 جنيه بامبرز علشان البيه يـ...؟؟؟ "ايوه يابنتى  طبعا - امال انتى فاكرة ايه؟ احنا اصلا بنشتغل علشان العيال يـ.... وبس" ....افادكم الله

برضه لو حد عايز بيركس يقول !