كله هايطلع فى وش ابنك

يا جماعة محدش يفتكر انى بكتب البتاعة دي كده فرفشة يعنى ولا علشان اتسلى – لا خالص. انا اتصدمت من حاجات كتير فى الحمل ومكنتش متخيلة انه هايبقى كده وده من الاسباب اللى بكتب علشانها...علشان الناس تفهم الواقع. وبعدين لقيت ان كتير جدا من معتقدات الناس المتعلقة بالحمل خرافات وتهجيص.

مثلا من التخاريف اللى اتقالت لي (وعلى فكره اللى قالت لي الموضوع ده كانت مصممة انه حقيقة وواقع علمي وعن تجربة مش أي كلام) انى لما احب اهرش اشوف لي أي حته متدارية واهرش فيها (مش قصدها اتدارى ورا شجرة – لا قصدها حاجة تانية)....بمعنى...لو عايزة اهرش فى وشي اقاوم واهرش فى كعب رجلي!!!!! ليه بقى؟ علشان لو هرشت فى أي مكان فى جسمي هايبقى المكان ده وحمة فى جسم البابي!! وبتبرر لي الموضوع ده انها قالت "مش في اطفال نص وشهم وحمة كده؟ علشان مامتهم كانت بتهرش فى وشها كتير!!! علشان كده يطلع وحمة للطفل فى كعب رجله احسن من وشه" واللي يحب النبي يسقف (!!)

وبرضه من الخرافات ان لما اتوحم على حاجة تطلع فى البابي! نفس اللى قالت لى موضوع الهرش ده قالت لى ان مامتها اتوحمت على برتقال وطلع لها شكل برتقالة فى بطن رجلها (اصل مامتها كانت متنورة وكانت بتهرش فى مكان مش باين بقى) طيب انا كنت باكل بطاطس كتير ومانجة – وبهرش فى وشي لما احب اهرش يعنى – ياترى كده هايطلع فى وشة مانجاية ولا بطاطساية؟ المانجة كبيرة هاتاكل وشه كله ! وبررت لى موضوع الوحمة اللى واخدة الوش كله ان ام البابي بتكون بتتوحم على كبده (اه والله قالت لى كده) وكانت بتهرش فى وشها (ست عايزة الحرق!! ازاي تعمل فى ابنها كده!!)

من الحاجات برضه اللى اكتشفتها ان نظرا لتورم القدم في خلال الحمل فبنلبس حاجات مفتحة (غالبا حاجة بصباع علشان مفيش حاجة بتقفل على وش الرجل الوارم على الاخر) ومن غير كعب طول الوقت وده بيؤدي الي تشقق الكعبين والقدمين وبتبقى شكل رجلين البوابين! اصل حاجة مش في ايدنا...زي ما يكون ماشيين حافيين طول الوقت فى البيت والشارع فطبيعي جدا جدا ان الرجلين يحصل فيها كده! استعملوا بقى كريمات ولا فازلين ولا جلسرين ولا حتى سمنة...هايحصل هايحصل! ده طبيعي زي الشخير بالظبط

النصيحة اللى كل الناس بتفضل تكررها هي "ممنوع الشاي والقهوة والنسكافيه والبيبسي طول ما انتى حامل" – ليه؟ علشان البابي مايطلعش عصبي و(هايبر) ومايفضلش يعيط طول الوقت! بصراحة كنت مصدقة الكلام ده ولان الدكتور قالي امنعى أي شاي وقهوة وبيبسي اثناء الحمل بس مقالش السبب...فقلت اكيد علشان كده! بس طلع الموضوع حاجة تانية خالص! الكافيين بيكون سبب في نقص وزن البابي بس ده لما يكون نسبة الكافيين عالية اوي فى الدم!! انا مثلا بحب جدا النسكافيه ولما اسئل "طيب اشرب ايه؟" يقولوا لي اشربي شاي اخضر بالنعناع!!

هاروح اعملي حاجة اشربها بقى