tag:blogger.com,1999:blog-40417393097702365342011-07-29T07:21:47.761+02:00يوميات حامل وفقستOm El-Wadhttp://www.blogger.com/profile/01908644558800319967noreply@blogger.comBlogger371100tag:blogger.com,1999:blog-4041739309770236534.post-85655955561575206552010-04-27T12:55:00.000+02:002010-04-27T12:55:15.269+02:00وخلص الكلام يا ابن عمي<div dir="ltr" style="text-align: left;" trbidi="on"><div dir="rtl" style="text-align: right;"><strong>"طيب وليه كده؟"</strong></div><div dir="rtl" style="text-align: right;"><strong>" كفاية"</strong></div><div dir="rtl" style="text-align: right;"><strong>"ليه يعنى؟"</strong></div><div dir="rtl" style="text-align: right;"><strong>"اصل مفيش جديد"</strong></div><div dir="rtl" style="text-align: right;"><br /></div><div dir="rtl" style="text-align: right;"><strong>ده جزء من الحوار اللى دار بيني وبين صديقة من اصدقائي لما قلت لها انى مش هاكتب تانى خلاص في المدونة دي...معنديش اي حاجة جديدة اقولها خلاص...حكيت كتير عن الحمل والفترة العصيبة في اخر الحمل... صدمة الحصول على طفل بين يوم وليلة...الزن اللا نهائي ... الليالي اللى مش بتخلص... الرجالة واللامبالاه اللى هيا فيها... اتكلمت عن حاجات كتير وحاجات ملهاش علاقة اصلا بعنوان المدونة - كنت برغي وخلاص...وخلصت رغي :) </strong></div><div dir="rtl" style="text-align: right;"><br /></div><div dir="rtl" style="text-align: right;"><strong>في الاخر احب اشكر كل الناس اللى عجبتهم المقالات وكانوا بيبعتوا لي وشكرا لكل الناس اللى اتناقشت معايا في نقط اتكلمت فيها وشكرا لعائلتي لاستضافتها ليا فترة كبيرة جدا وتحملهم رخامتي و فترات الاكتئاب الضلمة الطويلة...شكرا لجوزي لتحمله نوبات البكاء والاكتئاب.... شكرا لاختى علشان خدت اجازة بدون مرتب لتساندني مع ابني الزمارة...وماما علشان شالت عني بلاوى كتير بالهبل ...وبابا طبعا علشان مشي بيه مسافات برضه الراجل تعب معانا :) </strong><br /><br /><strong>من الاخر احب اقول ان الجواز اكتر من مجرد علاقة بين اتنين - الجواز حياه كاملة بكل ما فيها - المشاركة مش العيشة في مكان واحد تحت سقف واحد - الجواز مشاركة في شيل الهم والمسئولية حتى ولو كانت ان الراجل يشيل ابنه شوية وهوا بيعيط علشان مراته تريح ضهرها - او انا لست تسوق بدل جوزها العربية علشان يريح اعصابه من الشوارع.</strong><br /><br /><strong>شكرا لكل واحد خد من وقته علشان يقرا المقالات دي...</strong><br /><br /><strong>facebook account: omelwad@live.com</strong></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-8565595556157520655?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-18816245292553515652010-04-09T06:32:00.000+02:002010-04-09T06:32:39.958+02:00ايدك من على الكلاكس يا باشمهندس<div dir="ltr" style="text-align: left;" trbidi="on"><div dir="rtl" style="text-align: right;"><strong>هوا ليه الراجل متخيل ان كل ما يعمل دوشة اكتر يبقى كده بيثبت وجوده؟؟ </strong></div><div dir="rtl" style="text-align: right;"><strong>تعرفوا منين ان اللى في المطبخ راجل مش ست؟ اول حاجة يرزع باب التلاجة وباب المايكروويف ولما يقلب كباية الشاي ولا النسكافيه (تك تك تك تك) زي ما يكون قهوجي ولما يولع السيجارة يرزع الولاعة بعد ما يولع ولما يجي يقعد لازم يجر الكرسي ويعمل صوت اد كده في الارض ولما يدخل الحمام يرزع الباب والترباس (تراااك) وراه ولما يتضايق اوي يحدف اي حاجة قدامه (بتطلع صوت طبعا) ولما يقلع جزمته يقوم ماسك الفردتين مع بعض وفي حركة اوليمبية ويحطها مكانها حدف (لو حطها مكانها يعنى)!! وبعد كل ده يزعق للست لما ترزع باب عربيته ويقولها "انتى فاكراه باب تلاجه؟" - مين قال ان التلاجة نازل معاها اوبشن ان الباب يترزع؟!</strong></div><div dir="rtl" style="text-align: right;"><br /></div><div dir="rtl" style="text-align: right;"><strong>طيب بذمتكوا مش ده بيحصل؟ والله بيحصل! انا بتكلم على القاعدة العريضة من الاخوة الرجالة (يعنى محدش يروح لجوزي ويقوله ايه العك اللى مراتك بتقوله ده) اصلي بعيد عنكوا بقيت قوية الملاحظة شوية اليومين دول (تقريبا من فرط الفراغ العقلي) وغالبا الحالة دي جت لي لان كل اللى بعمله حاليا بقى روتيني او اوتوماتيكي: الولد بيعيط يبقى حاجة من تلاته يا عايز ينام يا جعان ياعايز يغير - اجرب التلاته واللى تنجح فيهم يبقى اعملها - الولد بيصوت بطريقة معينة يبقى عنده مغص - بيعيط باسلوب معين يبقى زهقان وهكذا! طبعا احيان كتير بيعيط لمجرد الفرفشة يعنى كده بس برضه بقيت امراه توماتيكي خالص - وبعدين عقلي بدل ما يصدي بدأ يلاحظ شوية حاجات حواليا ومنها اسلوب الرجالة في التعامل مع الاشياء...الراجل يحب اوي يعمل دوشة وفي الاخر يتهم الست انها بترغي كتير!! طيب ما انت اللى بتدوس على الكلاكس ليل نهار زي ما يكون لو مدستش متبقاش ذو حيثية مثلا! ا</strong></div><div dir="rtl" style="text-align: right;"><br /></div><div dir="rtl" style="text-align: right;"><strong>غالبا في طار بايت بين زرار الenter وبين الراجل! تلاقي الراجل من دول يكتب الميل والباسورد ويروح مدي الانتر على قفاه جامد اوي.. ليه؟؟ لما تقعد جنب اي راجل بيستعمل الكمبيوتر لازم تسمع الانتر الغلبان ده كل مرة - مفيش مرة توحد ربنا يدوس عليه بالراحة؟ لا هوا لازم ياخد بالشبشب كده! </strong><strong>طيب ماهو لو دست عليه بالراحة هايenter برضه عادي يعنى...وبعدين اول ما يفقع الانتر تلاقيه رجع لورا كده ومستني البتاع يفتح قدامه...زي ما يكون فتح عكة مش الميل!!! ليه الزرار المسكين ده طيب؟ ليه التحفز ضد حته زرار لا راح ولا جه؟ دي حاجة الراجل وحده يقدر يرد عليها!</strong></div><div dir="rtl" style="text-align: right;"><br /></div><div dir="rtl" style="text-align: right;"><strong>الراجل على القهوة شخص اخر - دوووشجي اوي...رغي رغي وفي البيت يبقى تعبان اوي بقى من الشغل ومش قادر ياخد ويدي مع "الرغاية اللتاته" مراته! في القهوة الراجل بينم نميمة بقى يا جماعة رهيبة ... وفي البيت "دع الخلق للخالق - استغفر الله العظيم" (لا والله؟) - في القهوة اخر نكته واخر فزورة وقفشات - في البيت "قفش" - في القهوة ممكن يضرب اي حاجة بس يسد جوعه وخلا ص ويبقى منشكح اوي وفي البيت (ايه ده؟ ملوخية تاااانى؟) - في القهوة يتكلم في الفن والفضايح واخر صيحة موضة للستات المطرقعة و في البيت مايتكلمش غير في حاجتين: سياسة وكورة ولما الست تشتكي ان جوزها مش بيتكلم معاها يقولها "يعنى اتكلم معاكي في ايه؟ في طبق اليوم؟ ما انتى لو بتقري او ليكي في هواياتي كنا لقينا ارض مشتركة" - الراجل في القهوة يضحك بحس عالي اوي يرجع لورا كده (هايموت خلاص من الضحك) وفي البيت هما التلات وحايد اللى بين حواجبه دول (وقار بقى) او يضحك بابتسامة مجاملة كده وخلاص! انا عارفة ان بدري اوي انى اقول الكلام ده علشان انا لسه مكملتش حتى سنتين جواز - بس المستقبل مظلم شويتين من اللى بشوفه في بيوت اصحابي!</strong></div><div dir="rtl" style="text-align: right;"><br /></div><div dir="rtl" style="text-align: right;"><strong>الراجل من دول يبقى خلاص هايموت ويخلعوا له عين ويكون له عيل - يجي العيل ويبقى هايموت ويشيلوا له العين التانية بس يبطل زن وطلبات! واول ما يعيط الولد من هنا "خدي ده عايز يغير" حتى لو مش عايز يغير - لا هوا عايز يغير وخلاص! "طيب ممكن تغير له انت انا في ايدي حاجة" يرد هوا " مبعرفش" "دي حاجة سهلة اوي بص فك اللزق والجديد الزق اللزق وخلاص" "بدل هيا حاجة سهلة اوي كده ماتيجي تعمليها انتى" ويدخلوا في حوار فاشل ملوش نهاية وفي الاخر يعنى الولد مش عايز يغير اصلا !!</strong></div><div dir="rtl" style="text-align: right;"><br /></div><div dir="rtl" style="text-align: right;"><strong>هاروح انا علشان الولد عايز يغير!</strong></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1881624529255351565?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com3tag:blogger.com,1999:blog-4041739309770236534.post-48926091904065769812010-03-29T21:26:00.000+02:002010-03-29T21:26:20.235+02:00حد معاه عشرة جنيه سلف؟<div dir="ltr" style="text-align: left;" trbidi="on"><div dir="rtl" style="text-align: right;"><strong>من متع الحياه بالنسبة للستات هيا الشوبنج...يا سلام كده لما الواحدة تنزل ومعاها "شقلة" فلوس وتطرقعهم كلهم وترجع البيت منفضة ومعاها شوية شنط بلاستيك...وبعدين تفتح فى الشنط وتفرش كله على السرير وتتفرج على الحاجة...كلها نص ساعة وهاجيلها شعور بالذنب علشان فرقعت كل فلوسها مرة واحدة وبعدين هاتضايق اوي لما تكتشف ان الحاجة اللى اشتريتها لسه عايزة تجيب لها شنط وجزم واكسسوار...بس الفلوس خلصت...فتستنى للشهر اللى بعده او لغاية ما تفرج!</strong></div><div dir="rtl" style="text-align: right;"><strong>يا سلام بقى على الاحباط الاكتر لما الواحدة تنزل ومتلاقيش حاجة تجيبها ... علشان ببساطة مفيش حاجة مقاسها. ده انا يا جماعة...بعد الحمل والولادة مفيش حاجة شيك جاية على مقاسي...كله يا شولة يا ملايات وممكن تتقفل من الجنب والبس تحتها بادي كارينا!!!</strong><br /><br /><strong>ده بالظبط بالظبط اللى حصل امبارح معايا!!! اختى كانت عايزة تجيب هدوم ونزلت معاها ... محاولتش اقيس اي حاجة ولا حتى ابص لنفسي على حاجة من اساسه! المهم دخلت محل ظريف كده وكله هدوم تجنن بجد...وانا مستنياها تقيس حاجة لقيت بسم الله الرحمن الرحيم كده حاجة زي بياضات الكنبة لونها طوبي - المهم يعنى طلعت بلوزة...قلت يا سلاااام هوا ده...وخطفت البياضات ...اسفة البلوزة...ودخلت اقيس وانا ضهري للمراية - وطلعت ضيقة!!!!! في هنا يا جماعة سلك كهربا الواحد ينتحر ويخلص؟؟ </strong><br /><br /><strong>يعنى مثلا اروح البيت وفلوسي معايا؟؟ ابدا!! اشتريت هدوم لابني وشوية مكياج مش محتاجاه وتلات انواع كريم اساس مش محتاجاهم وتوك وحاجات تافهة كده...المهم يعنى طرقعت الفلوس وخلاص!</strong><br /><br /><strong>عامة سيبنا من موضوع الشوبنج ده وخلينا فى العيال!! انا خلصت تالت شهر امومة - حاسة انى زي المساجين "ناقص لي اد ايه واخرج؟!!" بس المشكلة ان مفيش خروج! ربنا يخلي الولد بس يا رب يهديه برضه! كل الناس بتقولي ان بعد الشهر التالت هايظبط...طبعا انا لسه مستنية المعجزة تحصل ويظبط نومه . المشكلة ان ابني حبيبي اتعود على الشيل وعلى الهز وعلى المشي بيه علشان يسكت! ايوه لهذه الدرجة حبيبي ابني الغالي زنان! وبعدين انا كنت رافضة شوية حاجات وكتبت عنهم قبل كده واحب اعترف بضعفي...عودته على التيتينه مع انتى كنت بقسم انى مش هاخليه يستعملها .... بلبسه حاجات على دماغه علشان لما بيبرد مش بيسكت حتى لو دفي برضه يحب يسلي اللى حواليه ويعيط. الدكتور قالي لازم انظم له موضوع الرضاعة...يعنى مش كل ما يزن له زنتين اضعف واديله لبن! لا خليه شوية كده لغاية ما تيجي ميعاد رضعته...فبقيت اتقل عليه بس كله على حساب اعصابي! بديله ميلوبا واعشاب علشان تصبره شوية ...بياخد حاجة واحدة بس وباقي الانواع كلها في الحوض...وبعدين اتقالي انه لما ينظم اوقات الاكل بتاعته هاينتظم النوم...لغاية دلوقتى لسه موضوع النوم ده مش متظبط...يا رب عدي الشهور دى على خير ويتظبط بقى!</strong><br /><strong></strong></div><div dir="rtl" style="text-align: right;"></div><div dir="rtl" style="text-align: right;"><strong>كل ما يقرب ميعاد نزولي الشغل اتضايق اوي - هاسيبه ازاي بس؟ يعمل اللى يعمله بس ابني ضنايا!! حوار الحضانة ده مرفوض...</strong><strong>واحدة صاحبتي راحت للحضانة على غفلة مش في ميعادها خاااالص...لقت ابنها مفلوق من العياط ومش مغير وعادي سايبينه يولع! لا ده انا مفترية ونابي ازرق واللي يجي على ابني ادفنه بالحيا! فبدل ما اروح السجن هاوديه عند ماما (ربنا يخليها يا رب ويديها الصحة)...هاكون مطمنة عليه....ده لو نزلت الشغل اصلا! برضه في نفس الوقت سمعت ان الحضانة - او زي ما الناس دلوقتى بتحب تقول عليها nursery - علشان الولد يطلع اجتماعي ومتكلم ومتفتح و"يرطن" لغات !! بس كل شئ ليه تمن! طيب يعنى اجوع واشحت وابيع جزمى علشان اوديه حضانة؟ مش عارفة حد يقولي عمل ايه في الحوار ده.</strong><br /><br /><strong>ركبي بدأت تفيس منى...وضهري كذلك ورحت لدكتور وطبعا اول حاجة قالها الوزن - قلت له انا لسه مخلفة قريب وبحاول اعمل دايت على اد ما اقدر بس مش نافع اوي علشان مش عارفة اتحرك واعمل رياضة حاليا - قالي ركبك فيها مياه!! لا والله؟ طيب والله كويس حاجة عندي مش عند باقي الناس ! وادالي دوا علشان المايه تنزل من ركبي - كبرت دماغي بصراحة مش هاخد ادويا بقى انا زهقت من كترهم! هاخس ان شاء الله...حد بس يشجعنى...</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-4892609190406576981?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com2tag:blogger.com,1999:blog-4041739309770236534.post-77503687377840378282010-03-19T11:48:00.000+02:002010-03-19T11:48:26.247+02:00زغرطي ياللي انتى مش غرمانة<div dir="ltr" style="text-align: left;" trbidi="on"><div dir="rtl" style="text-align: right;"><strong>امبارح جوزي جالي وهوا شايل الولد وفي الايد التانية هدية!!!؟ كل سنة وانتى طيبة (؟!!) بسرعة جدا عملت سكانScan في دماغي احنا في شهر ايه والنهاردة كام؟ لاعيد ميلادي ولا عيد الحب ولا عيد جوازنا ولا يوم خطوبتنا ولا كتب الكتاب ولا حتى عيد العمال!! امال كل سنة وانا طيبة ليه؟ قلت له وانت طيب بس على ايه؟! قالي عيد الام!! يااااااااااااااااه...عيد الام؟ ما طبعا عندي حق عمري ما فكرت في عيد الام ده غير هاجيب هدية ايه لماما ومن سنه ونص كده هاجيب ايه لحماتي. طيب والله كويس...الامومة برضه ليها فوايد...هدايا وحركات :)</strong><br /><br /><strong>اول عيد ام وانا مخطوبة مكنتش عارفة اعمل ايه ولا اجيب ايه ولا اقدمها ازاي - طيب لو خطيبي نسي يجيب لماما هايبقى شكله ايه؟ طيب اجيب هديتين لماما احتمال هوا ينسى واقدمها باسمه ولا اعمل ايه؟ انا كنت بفكر في كل حاجة بشكل مبالغ فيه بصراحة ...المهم طلع انه مش ناسي ولا حاجة وقالي اختاري انتى! مش مشكلة ماما..الست مننا وعلينا وبترضى بقليلها ومش بتدق اوي في "ترجمة" الهدية...دي اول هدية لحماتي اجيب لها ايه؟ يادي الحوسة اجيب ايه؟ مستحيل طبعا اجيب لها خلاط - او مضرب بيض كهربا...اي حاجة بفيشة بره الحساب خالص....طيب اجيب بارفان؟ في ناس بتتخيل ان لما حد يهادي التاني بارفان يعنى معناها ان ريحتها وحشة...بلاش بارفان...اجيب جزمة؟ عيب ازاي اهادي جزم يعنى؟ (مع انى حاليا بعملها مع جوزي بس مش مهم هوا فاهم انى عبيطة في حوارات الهدايا ده)...اجيب هدوم؟ طيب هايبقى شكلها وحش لو طلعت ضيقة او واسعة او اصلا ذوقي مش عاجبها...اجيب اييييييه؟ في الاخر خالص جبت شنطة جلد طبيعي...وخليتهم اتنين زي بعض بالظبط واحدة لامى وواحدة لطنط...خلصنا من فيلم الهدية...ياترى لما يسئلني بكام ويديني الفلوس اعمل ايه؟ مش بقولكوا كنت غريبة وبفكر زيادة عن اللزوم! المهم الحمد لله عجبت طنط وعجبت ماما وحصل بعدها موقف سخيف ان الاتنين لبسوها في نفس اليوم في مناسبة ما كانوا مع بعض فيها وواحدة فيهم فتحت شنطة التانية على اساس انها بتاعتها...عادي بتحصل!</strong><br /><br /><strong>فيلم الهدايا ده هابط اوي ومش بيخلص وعايز ميزانية هوا والبامبرز!! اه والله الواحد بيشتغل ويطلع عينه طول الشهر علشان الولد يـ ***** (المعنى في بطن الشاعر)....السنة كلها بقت خلاص متظبطة على الهدايا ...عيد ميلاد بابا ..ماما....اختى...جوزي...طنط....عمو...عيد الحب المصري...عيد الحب العالمي...عيد جوازنا...راس السنة....يوم خطوبتنا...ودلوقتى عيد ميلاد الواد...عيد الام...ناقص اجيب هدية في عاشورة!! ربنا يكتر اعيادنا ...ولسه عيدية كمان للواد لما يكبر...بس مش مهم هاقوله هات احوشهالك يا حبيبي واقلبها منه :) </strong></div><div dir="rtl" style="text-align: right;"><br /></div><div dir="rtl" style="text-align: right;"><strong>ايام الخطوبة كنت بسمع كلام زي "اوعي تمرعي خطيبك وتجيبي له هدايا كتير وكده لحسن هايتعود"...."جيبي له هدايا كويسة علشان مايقولش انك بخيلة"..."بلاش هدايا غالية اوي علشان مايقولش انك بتتمنظري"..."بلاش هدايا خالص وعوديه على كده"...كلام كله متناقض...بس بصراحة انا بحب اجيب هدايا (واخد هدايا طبعا يعنى محدش يكره) وكنت بجيب له حاجات ملهاش علاقة ببعض...يعنى يوم ما كنا رايحين نتفرج على الشقة اللى اخيرا لقيناها مكنتش عارفة اجيب له ايه بالمناسبة دي....ومش عايزة احرجه علشان مجابليش وهيا اساسا مش مناسبة يعنى....فجبت له اناناس!!! ايوه اناناس! ثمرة كبيرة كاملة بورقها ... طيب والله عجبته :) بس المشكلة لما جه يقطعها كان هايطير صباعه :) ولما جينا من شهر العسل كنت عايزة اقوله مرسي بس بطريقة حلوة واجيب له هدية...برضه فاشلة مش عارفة اجيب ايه فجبت له ماكينة حلاقة اللى فيها ذبذبات دي ومعاها شوية حاجات لزوم الحلاقة...دي بقى عجبته الحمد لله يعنى!...كنت بسمع بقى ان اصحابي اللى جابت مش عارفة ايه منين ولفته فين وحطت على الهدية بالونات صغيرة كتير! مممم انا اخر اختراع وصلني في موضوع لف الهدايا كان الجليتر ولما استعملته غرقت الدنيا وبهدلت الاوضة وهدومى ولما جوزي فتحها حصل نفس القصة معاه وكمان العربية بقت من جوا "برؤرؤ"...زروطة!</strong></div><div dir="rtl" style="text-align: right;"><strong></strong> </div><div dir="rtl" style="text-align: right;"><strong>حاليا انا بقالي فوق ال 35 ساعة صاحية وخلاص بقيت اشوف اشباح ماشية حواليا من كتر الهسهس اللى انا بقيت فيه...ابني تقريبا والله اعلم نايم يا ساكت استعدادا للمعركة القادمة...والله براحته بقى انا هانام علشان كده مش كويس على جهازي العصبي...تصبحوا على خير!</strong></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-7750368737784037828?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-87109790368146331372010-03-04T17:16:00.000+02:002010-03-04T17:16:00.250+02:00ربنا ما يسلط غباوة حد على نفسه<div dir="ltr" style="text-align: left;" trbidi="on"><div dir="rtl" style="text-align: right;"><strong>امبارح كان يوم تاريخي - يوم اثبت فيه جدارتي انى اكون ام ...وان الانسان ده عبارة عن شوية اعصاب مش اكتر</strong><br /><strong>ربنا ما يحكم غباوة حد على نفسه ... لان ده اللى حصلي...قررت انى لازم اروح بيتي بقى ...كفاية...هاقعد مع اهلي اكتر من كده ايه؟ شهرين ونص كفاية بقى </strong><br /><strong>وقد كان</strong><br /><strong>انا خدت القرار ده 869 مرة من يوم ما ولدت وعلى اخر لحظة ينطر عرق الجبن فيا وارجع في كلامى واقول شوية كمان شوية لسه...بس المرة دي حسيت انى ضعيفة ومش ممكن هافضل خايفة للابد ... هاروح بقى </strong><br /><strong>قلت لجوزي للمرة الالف ياللا نروح ومخدش كلامي جد اوي يعنى (علشان عارفني جبانة) بس لميت فعلا حاجاتي وحاجة الولد و"ياللا على بيتنا"...قالي ماشي تعالي ناخد الحاجة النهاردة ونعمل شوبنج وبكره ناخد الولد ونبات في البيت...اوكيه...وده حصل</strong><br /><strong>بس معرفش ليه مسكني كئابة رهيبة لما جيت انفذ "الحكم"...وخفت بجد انى ابهدل الولد معايا...وان اهلي هايوحشوني جدا..نفس شعوري وانا سايبة البيت لما جيت اتجوز...بس بابا وماما شجعوني...طبعا اقعدي شوية ولسه بدري على كام دمعة من ماما واختى علشان الولد هايوحشهم (طيب وانا؟ لا انا شبشب مليش لازمة غير انى جبت الواد)...المهم في الاخر قالوا لي بيتك برضه وجوزك وحياتك وابنك وكلام الابهات والامهات لما يبقوا مش مقتنعين بالكلام بس لازم يقولوه علشان ربنا مايحاسبهمش ان واحدة سايبة بيتها ومبلطجة في بيت اهلها :) :)</strong><br /><strong>المهم</strong><br /><strong>رجعت!!! اهوال! ليلة ما رجعت كنت محتاسة بقى بالشنط وحاجاتي فيييين؟ طيب هدوم الولد فييييين؟ ولا المعزلين والله...وحبيبي ابني ضنايا منمش ليلتها! تقريبا نكاية فيا...او يعنى قال يتسلى عليا براحته بقى مفيش اللى يحوش. ليلتها فضلت ماشية بيه واحط واشيل واحط التيتينه واشيلها واديله ببرونة واشيلها واعمل غيرها واشيلها واعمل اعشاب ...مفيييييش فايدة!! في الاخر لما اقتنع ان الشمس طلعت وان انا خلاص هانهار وانط في اقرب بلاعة نام!!! يااااااه اخيرا؟! ونمت انا طبعا جنبه كالطوبة. تخيلوا صحيت على ايه؟ العمارة اللى جنبي بتتشطب وصحيت على صوت حاجة زي الدقاق الكهربا كده...لغاية النهاردة انا مش عارفة هوا ايه بس هوا حاجة مززززعجة اوي اوي اوي...بيتشغلوا بدون توقف من عشرة الصبح لسته بالليل...ايه الضمير ده بس؟ وطبعا الزنان صحي هوا كمان! وانا مش قادرة افتح عيني...اول مرة احس ان الانسان ليه اكتر من جفن...كل ما اشد واحد التاني الاقيه لسه مقفول...سبحان الله... في الاخر لما فتحت اخر جفن لقيت بني بيفرك جنبي ولما لقانى باصة له ضحك:) مش بقولكوا بيتسلى !</strong><br /><br /><strong>المهم محدش قالي ليه ان العمارة بتتشطب؟ ليه المرة دي خدتني الشجاعة يعنى؟ ليه ها؟ المهم بعد ما اكلته وغيرت له وعملت له فقرة الاراجوز نام شوية تاني بس بعرض السرير...معرفش ايه اللى خلانى احطه بعرض السرير وفي نصه بالظبط! طيب اروح انا فين؟ جنبه بالعرض طبعا.... شوية والزفت العمال شغالين بالشئ الكهربا ده برضه...الصداع التهم مخي...قمت اشوف بقى المطبخ (نسيت طبعا وقفة المطبخ خالص) وهاعمل ايه والغسيل والحاجات دي كلها (فينك يا ماما يا حبيبتي) المهم صحي طبعا مية مرة في النص وعياط وزن وانا مش عارفة اعمل منه حاجة...في الاخر نام على الكنبة في الليفنج...وحياتكوا كنت فارشة انا في الارض فى ثانيتها على طول بس معرفتش برضه انام من البهايم اللى جنبي....وهكذا! وكان يوم شنيييع....وفي وسط اليوم بقى لحقت الاكل على اخر لحظة قبل ما يتفحم...وجوزي رجع من الشغل الساعة تسعة ونص بالليل كنت انا بقى خلاص على اخري تماما...الليلة دي طبق الاصل الليلة اللى قبلها بس زاد عليها ان طبقه الصوت كانت اعلى شوية...عيط حوالي ساعة وربع...والله ما ببالغ فعلا ساعة وربع صريخ متصل...حران؟ شيل شوية من الهدوم...بردان طيب؟ غطيه...جعان؟ لا ادلق الببرونة في الحوض خلاص...عايز تغير؟ لا...طيب ايه؟ صحيت جوزي الفجر "شوف ابنك!!" جه كتر خيره شاله شوية واتمشي بيه شوية فنام!!! اشمعنى انا ؟؟ ليه مش بينام معايا انا؟؟؟</strong><br /><strong>النهاردة تقريبا زي امبارح وزي بكره وبعده...ربنا ما يسلط غباوة حد على نفسه </strong><br /><br /><strong>كفاية نكد يا جماعة كده...حد يقولي اطبخ ايه بكره؟</strong></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-8710979036814633137?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-89041864577604294962010-02-10T07:21:00.001+02:002010-02-10T07:22:16.478+02:00في صرصور ودني<div dir="ltr" style="text-align: left;" trbidi="on"><div dir="rtl" style="text-align: right;"><strong>مع كل اذان فجر بدعي نفس الدعوة "ربنا يهديك يابنى"...ربنا يهديه فعلا...انا خلاص جالي تبلد من كتر ما سمعت عياط...مبقاش فارق اوي يعنى ...اصل لو سكت هيا شوية ويعيط تانى !!! امبارح كنت بغير له والصراحة كانت الدنيا برد اوي - وهوا ازرّق من كتر البرد والعياط طبعا وعايزة ادفيه بسرعة...ملقتش قدامى غير السيشوار! بجد اه...لقيت نفسي بهستيرية بحط الفيشة و"ووووشششش" على ايده ورجليه...سكت! الحاجة ام الاختراع!</strong></div><div dir="rtl" style="text-align: right;"><br /></div><div dir="rtl" style="text-align: right;"><strong>النهاردة عمل فيا حركة جميلة جداااا...كان (كالعادة) بيعيط وبحاول اهديه شوية...كان على كتفي ومرة واحدة سكت (بياخد نفس عميق) وفى حركة خادعة راح لازق بؤه عند ودني و "ععععاااااااااااااااااااااااا" جوا صرصور ودني!!</strong><strong> اتنطرت من مكانى وودني صفرت وكنت هاحدفه تحت السرير!!! الحمد لله انتى محدفتش! </strong><br /><br /><strong>زي النهاردة لبست الدبلة!! مش عارفة ليه بفتكر حاجات صغيرة اوي الايام دي...هيا اخر ايامى ولا ايه؟ اصل الناس قبل ما بتتوفى غالبا بتفتكر حاجات هايفة ملهاش قيمة ومتلزقش اصلا فى الذاكرة...عملت خطوبتي فى قاعة وعملت حفلة كبيرة وجبت فستان حلو جدا وكنت فرحانة اوي اوي اوي بالدبلة!! مش عارفة ليه...حاليا انا مش لابساها...برضه مش عارفة ليه. المهم...ليلة الخطوبة رحت للكوافير علشان اعمل ماسك واعمل ضوافري علشان تانى يوم ماضيعش وقت واخلص بسرعة...البنت حطت لي ماسك كده ابيض المفروض انه باللبن...شوية وحسيت ان في حد بينفخ نار فى وشي...شوية كمان حسيت ان وشي هايقع من كتر الحرقان...طبعا اشتيكت بسرعة وفى لحظة كانوا جايبين لي بشكير علشان اغسل وشي ...تخيلوا كده عروسة محروقة!!! المهم جيت اعمل ضوافري البنت اقنعتني انى اركب ضوافر صناعية...طيب ليه يا ستى ما شكلهم كويس اهه...لا اصل الانسة مش هاتعرف ترسم عليهم!! طيب ماشي ركبي يا ستى. بجد يا جماعة عملية مؤلمة جدا وسخيفة اوي..ورسمت طبعا بسلامتها براحتها ماهي حاطة لي بلاطة على ضوافري! المهم تاني يوم صحيت وضوافري كلها بتنبض من الاشياء اللى محشورة فيها (اصل علشان تركبهم حشرتهم جوا الجلد...انا عارفة ان معظمكوا اقشعر دلوقتى بس ده اللى حصل) وخلاص كنت هاتجنن واشدهم بس طبعا محصلش! المهم...على الضهر كده رحت "للمزين" وعملوا لي المكياج وبصيت فى المرايه لقيت عيني معمولة صواريخ!! عارفين تفرتيتي؟ هوا زي الحاجة نفرتيتي...قلت لها ايه ده؟؟ شيلي الكلام ده...وبكل بجاحة تقولي "وانتى مقلتيش من الاول ليه؟" (!!!) المهم يعنى شالتهم وعملت الطارحة وكانت الحياه زي الفل وبعدين لبست ورحت اتصورت ورحنا القاعة...نسيت اقول حاجة انى في اليوم العظيم ده لبست لينسيز (!!) البس ليه ليسيز يعني؟ المهم ان لونها كان افتح من عيني درجة واحدة ومحدش اساسا لاحظ انى عاملة افتكاسه يعنى في نفسي ...المهم علشان مش متعودة عليهم مكنتش شايفة كويس وكنت حاسة انى مزغلله وبعدين فى الكوافير برضه ركبوا لي رموش ...فعدسات ورموش كان ناقص لي عصاية بيضا وكلب علشان اعرف الاتجاهات!!! اخترااااع مقرف الرموش دي! وغير الاتنين دول كان في كشاف عربية مفتوح علي العالي في عيني...البيه الاستاذ المصور! بجد اليوم ده مكنتش شايفة اي حاجة ... وحتى لما جيت البيت وكانوا بيقولوا لي شفتي لما حصل كذا؟ "لا والله مخدتش بالي"...طيب لاحظتي كذا..."الحقيقة لا"...هوا انتى كنتى حاضرة الخطوبة ولا واحدة غيرك؟؟؟ بجد فعلا مشفتش حاجة اليوم ده!</strong><br /><br /><strong>المهم يعنى خطيبي لبسني الدبلة واحنا بنرقص بقى الضوافر طارت ...وطار الصباع اللى فيه الدبلة والشبكة!! يعنى هايتشاف هايتشاف ان العروسة اونطة و"بلاستشيك"...مش مهم ...شوية كمان وواحد غيره طار وكنت بسئل الناس ان كان حد معاه سوليتيب! طبعا محدش كان معاه!</strong><br /><br /><strong>لما وصلت البيت جبت مياه سخنة اوي وحطيت ايدي فيها علشان اشيل باقي الضوافر...وكانت المفاجاة ..باقي الضوافر كلها مش عايز يتشال!! المهم بعد خناقة مع ايدي شيلتهم...الهانم كانت لازقاهم بأمير الفا!!! ضوافري كانت زي ما يكون عليها طبقة بيضا معوجة كده... طلعت الضوافر واتبقى امير الفا في ايدي لمدة شهور...بجد شهور على ما ضوافري طولت وبالتدريج كان اللزق بيطلع لفوق....حسبي الله ونعم الوكيل</strong><br /><br /><strong>سيبنا من اللى حصل فى ضوافري دلوقتى...واحنا بنتصور الراجل قالي "من فضلك اقلعي الجزمة" (احنا هانصلي ولا ايه؟)...ليه حضرتك؟ اصلك طويلة :) شوفتوا الطول بيجيب قلة القيمة ازاي؟! المهم ان اليوم ده رفضت اعمل معظم ال"بوظات" بتاعة العرسان اللى هيا مثلا زي ان خطيبي يقف فى ضهري واحط انا صباع على خده!!!!!!!!!! بيييئة! او مثلا امسك ياقة الجاكيت...بيئة برضه!! او مثلا صورة وانا ايدي على خدى!! هوا ايه حطاية الخدود فى الصور؟ </strong><br /><br /><strong>تانى يوم صحيت وكنت مستغربة اوي الدبلة...مش الدبلة فى حد ذاتها...لا احساس ان في ايدي دبلة! شعور غريب...هوا حاجة كده بين الانبساط وان خلاص راحت عليا! كنت فخورة اوي بيها لما كانت فى اليمين...ومستعجلة انها تتنقل الشمال...طبعا مكنتش متخيلة ان دي كانت احلى ايام وبكره اندم انى مفرحتش بيها للاخر! ساذاجة بعيد عنكوا</strong><br /><br /><strong>والله يا جماعة الجواز مش سيئ اوي يعني...بس الخطوبة احلى كتير....يمكن علشان المسئولية؟ اصل مسئولية ايه اللى كانت ايامها؟ مفيش غير بس انى افكر احب اخرج فين الويك اند! مفيش في بالي اي حاجة غير اننا ننبسط وبس...واجيب طبعا حاجات الجهاز ودي كانت ايام حلوة اوي بجد. بس دلوقتى في مسئولية مستقبل...في طفل..في بيت...في حاجات كتير اوي افكر فيها غير لون الشنطة اللى عايزة اجيبها للطقم الفلاني!!!! انا بنصح كل واحدة متجوزتش انها 1- متستعجلش اوي يعنى 2- تستمتع باقصى درجة 3- نامى على اد ما تقدري علشان بكره يكون عندك طفل والنوم يبقى اغلى من الدهب!</strong><br /><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-8904186457760429496?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com4tag:blogger.com,1999:blog-4041739309770236534.post-89712885078410272712010-01-20T07:44:00.000+02:002010-01-20T07:44:59.131+02:00يخرب بيت الرخامة<div dir="ltr" style="text-align: left;" trbidi="on"><div dir="rtl" style="text-align: right;"><strong>النهاردة يبقى بقالي سنتين انا وجوزي مع بعض - النهاردة كانت قراية الفاتحة! بداية فصل جديد خالص من حياتى - او ممكن نقول حياة جديدة غير حياتي</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>سبحان الله - زي النهاردة من سنتين كنت فى بيت اهلي ...والنهاردة لسه في بيتهم برضه!!! ده الجواز المودرن يا جماعة </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>من سنتين كنت متوترة اوي اليوم ده...وجبت قطم وقور كده وفورمال علشان يمشي مع المناسبة...وجه هوا واهله وقعدوا كتير كتير كتير - وانا طول الليلة باصة الناحية التانية اصلا ...ومرة واحدة بس بصيت له (من حقي ابص لخطيبي ولو لمرة) لقيته باصص في عيني...يادي الكسوووووف...وجيت اقوم فى مرة كنت هاقع! يادي الاحراج يا ربي... وفيييين بقى قالوا نقرا الفاتحة - وطنط (حماتي) طلبت من ماما رقم موبايلي علشان تديه "لخطيبي" وبالليل الساعة اتنين وصلني اول رساله منه...كانت جامدة جدا وفرحت بيها (ما انا مخطوبة بقى ومن حقي افرح ان حد عبرني ) بس حسيت ان "ايه ده؟ دي الساعة اتنين بالليل...عيب ارد فى الوقت ده" بس رديت برضه بصراحة</strong><br /><strong>فضلنا نتكلم فى التليفون بشكل هستيري حوالي شهر ونص لغاية ما لبسنا دبل رسمي ...شهر ونص صمت رهيب!!! انا اصلا رغاية اوي...وحكاياتي مش بتخلص...وممكن اجيب صداع لاي انسان فى الحياه - بس لما اتخطبت معرفش ماكينة الرغي وقفت ليه...وسبحان الله مش بتقف غير معاه هوا وبس. كان يا عيني طول المكالمة هوا بس اللى بيتكلم...زي ما يكون واحد بيعترف وبيتصالح مع نفسه قدام نفسه!! واحيان كتير كان يقول "الو؟ انتى معايا ولا ايه"..وانا بكل برود "اه"...بجد الراجل ده صبر عليا كتير اوي :) معرفش ايه اللى خلاه يصبر يعنى...انا كنت نموذج البت الرخمة السئيلة ام دماغ بليلة! مفيش اي مواضيع بتكلم فيها مفيش مرة توحد ربنا افتح فيها موضوع بنفسي - جبت له ايحاء انى بلا شخصية ولا اهتمامات! انا فاكرة مرة حتى فى الفترة دي قالي (كان المنتخب كسب ساعتها) وشك حلو علينا....تخيلوا كده رديت قلت ايه؟ لا تخيلوا شوية كمان كده...اغتت رد فى الحياه "وانا ايه علاقتي بالمنتخب"...كل ما افتكر الرد ده اقشعر من كتر ما انا كنت سخيييفة ... حقيقي ساعة النصيب يعمى البصر...اصل اي انسان غيره كان قالي غوري يخرب بيت الرخامة!</strong><br /><strong>بس كلها شهر ونص وكانت ماكينة الرغي فاقت كده من الغيبوبة واشتغلت تانى...وهااااات يا رغي...زي ما يكون الدبلة هيا اللى موقفاني عن الكلام! قبل الخطوبة برضه كنا بنخرج بس مع ماما وحماتى (تعليمات بابا علشان عيب اخرج معاه لوحدي دلوقتى - وانا اصلا اللى كنت مصممة اننا نخرج علشان نعرف بعض اكتر قبل ما ادبس في خطوبة رسمي) كنا غالبا بنروح اي مكان عام و الامهات يسحبوا نفسهم كده بلطافة ونقعد احنا فى خشوع! اصل ملهاش مصطلح تانى غير كده! انا منتهى الصمت زي ما يكون بصلي طول الوقت...وهوا بيحاول يفتح مواضيع تكون مشتركة ويضحكنى او يخليني افك شوية كده وابقى Easy زي باقي البشر. </strong><br /><strong>حظه الجميل وحظي انا الاجمل ان الفالنتاين جه فى الفترة البشعة دي...يادي الحوسة...اجيب هدية؟ مجبش؟....اصل لو جبت يبقى بحبه؟ طيب وايه يعنى!! لا عيييييييب (المصريين بقى ومخهم الضلم)....طيب لو مجبتش وهوا جاب هايقول بخيلة! طيب حتى لو جبت اجيب ايه؟ اخر الموضوع يعنى جبت بيرفيوم اديداس ودبدوب احمر (مش كل الناس بتجيب دباديب برضه ولا ايه...اول مرة اجيب لحد انا معنديش فكرة هما اللى بيجيبوا!)...بس واشتريت علبة من بتاعة الهدايا ام قلوب قلوب قلوب دي وحطيت جواها بتاع كده هايش وفي وسطه البارفان...ووقفت على الغطا الدبدوب ولفيتهم على بعض كده ببتاع احمر...بس عملت حركة غبية...اربعة كيلو جليتر رشيتهم على الدبدوب والبتاع الهايش اللى جوا العلبة!!! مش هما برضه بيحطوا جليتر؟ انا بشوف كده مع اصحابي ايام ما كنت بحقد ان الناس كلها بيجي لها هدايا وانا لا! (بعد كده عرفت انه كره حياته من الجليتر ده ولزق فى هدومه وفي السرير وفي العربية وطلب منى مستعملش الشئ الملزق ده تانى)</strong><br /><strong>وهوا جاب لي بوكيه ورد كبيييييييير اوي اوي جوا كاس كبير زجاج...اول مرة يا جدعان يجي لي ورد...كان هاين عليا اخده بالحضن...المهم ادينا بعض الهدايا قبل اليوم الموعود علشان مكناش عارفين هاينفع نخرج اليوم ده ولا لا...من حظنا انه نفع ورحنا سيتي ستارز...كل البنات بلا استثناء كانت لابسة احمر وماسكين هدايا ...وانا بقى رايحة بايه؟ بني!!! رايحة عزا مش خارجة مع خطيبي يوم عيد الحب ابدا! اليوم ده قعدنا في كافيه وهوا برضه رغي وكلام وهزار وبتاع وانا تمثال قاعد وباصة ناحية حاجة تانية خالص غيره...راح معدول فى مكانه كده وجاب وشه قدام وشي وقالي "هوا انا مش عاجبك؟"...حقيقي حقيقي استحمل معايا كتير اوي! </strong><br /><strong>تاني يوم الخطوبة خرجنا لوحدنا - والله كنت حاسة انى بعمل حاجة غلط مع اننا خارجين الصبح! ورحنا كافيه ظريف كده ووداني مكان جامد نتغدى فيه وروحنا البيت...انا اليوم ده كنت "ام الواد" فى ثوبها الجديد...بتكلم بقى وبضحك وبقول رأيي في اي حاجة يقولها وبسئله برضه حاجات وكنت طبيعية خالص...الوجه الاخر للعملة! ومن يومها وانا بؤي وسع من كتر الكلام :)</strong><br /><br /><strong>حاليا كل ما يفتكر انا كنت عاملة ازاي فى الاول يتريق عليا ويضحك موت...وانا حتى اليوم مش عارفة هوا كان ليه متمسك بيا رغم البرود!</strong><br /><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-8971288507841027271?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com4tag:blogger.com,1999:blog-4041739309770236534.post-71707515941060802052010-01-12T06:30:00.000+02:002010-01-12T06:30:12.570+02:00اول شهر امومة<div dir="ltr" style="text-align: left;" trbidi="on"><div dir="rtl" style="text-align: right;"><strong>عدى اول شهر امومة! يا له مش شهر بصراحة! حياتى اتغيرت تماما (نوم واكل واهتمامات وكل حاجة)...المسئولية كبيرة...احساسي ان معايا كائن ضعيف جدا وصغير جدا بيكبًر حجم المسئولية...بصحى من عز النوم اهز فيه لحسن يكون (بعد الشر) مات!! بخاف مثلا الغطا يجي على وشه ويفطس ولا يرجع اللبن ومايعرفش يتنفس ...افكار سودا بس فعلا بخاف اوي عليه وهوا صغير كده لاحول له ولا قوه. طبعا هوا مجنني بس زي السكر على قلبي...بطلت خلاص اعيط جنبه :) بطلت اخاف اغير له وبطلت اتضايق لما اصحى من احلى نومة.. .بطلت ابقى عصبية...ابني غير فيا كتير ولسه هايغير فيا اكتر...ده هوا شهر واحد بس لغاية دلوقتى...واضح ان الابناء هما اللى بيربوا الاباء والامهات!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>صديقة ليا سلفتني كتب عن الام والطفل - والطفل فى عامه الاول (مرسي اوي يا امنية :) ) وقريت فيهم ... فيه جملة عجبتني اوي...بتقول ان مفيش حاجة اسمها طفل عصبي ولكن في ام عصبية! صح...كلام مظبوط...وفي برضه ام مش عارفة ايه اللى ممكن يعصب ابنها...زي الكافيين الكتير اللى ينزل له فى اللبن مثلا. وبعدين معظم الكلام على النت وفي الكتب ان ماينفعش اعمل دايت قاصى ابدا والبابي بيرضع طبيعي!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>من كام يوم رحت اجيب هدوم ليا من شقتي - ما خلاص بقى ولدت والمفروض ان كل المياه الزيادة فى جسمي نزلت والبابي نزل والحياة المفروض تبقى بمبي بمبي...ملقتش ولا حاجة خاااااالص داخلة فيا...لا شتوى ولا صيفي!!! حاجة محبطة جدا بصراحة....وبعدين من الاخر كده مش هاجيب هدوم تانى...لانى لو جبت هدوم ولقيت حاجة البسها زي الناس هاكسل ومش هاعمل رجيم ولا مجهود ومش هاعمل رياضة وهافضل كده اد التلاجة ال24 قدم!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>الفقرة اللى جاي للامهات الجدد...</strong><br /></div><div dir="rtl" style="text-align: right;"><strong>دخلت اونلاين ادور على دايت بعد الولادة والمفروض ايه اللى يتعمل ومايتعملش خلال الفترة دي علشان مأثرش على الرضاعة الطبيعية - في سايت هايل هايل هايل هوا <a href="http://www.babycentre.co.uk/">http://www.babycentre.co.uk/</a> ده لاي ام محتاجة اي حاجة يعنى...او حتى اي حامل او اي واحدة عايزة تبقى حامل! سايت بجد تحفة. المهم قريت شوية كويسين فيه ولقيت ان طبعا ممكن انزل الوزن الزيادة بوجبات معتدلة فيها كل العناصر مع شرب كميات كبيرة من السوائل وفي نفس الوقت يكون في تمارين ورياضة...بس مش قبل ست اسابيع من الولادة ابدأ...غير مثلا لو كان حاجة بسيطة زي المشي. برضه كنت مهتمة اوي انى اعرف التمارين اللى تتعمل فى حالة الولادة القيصري وقريت ان برضه مش قبل ست اسابيع لما ابدا تمارين بس خلال الست اسابيع الاولى ممكن مشي ومايكونش لفترات طويلة...ابدأ مثلا بعشر دقايق وتزيد الفترة مع تمارين الpelvic floor muscles...ودي تمارين للعضلات القابضة للمثانة والرحم...وممكن مثلا تمارين بطن بسيطة (ضم القدمين وثني الركبتين ثم ضم الركبتين في اتجاه البطن)...بس في نفس الوقت قريت تعليقات امهات كتير ان شكوى البطن المتهدل بعد الولادة القيصري...واحيان اخرى شعورهم ان اسفل البطن numb...منمل يعنى ومفيهوش احساس اوي...احتمال علشان الاعصاب اللى اتقطعت فى العملية! بس يا ترى متهدل حتى بعد الرياضة والتمارين؟؟ ولا هما معملوش اصلا؟ معنديش فكرة بصراحة!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>الوزن الزايد يا جماعة ده بيخلي الواحدة معندهاش ثقة في نفسها خالص...بجد...زائد بقى لو خبطتى في صورة من ايام شهر العسل ولا الفرح ولا حتى ايام الجامعة...وبعدين لما تلاقي ان هوا طقم يتيم (على نفس بنطلون الحمل اللى هاتموتى وتولعي فيه) هوا بس اللى بتلبسيه ولما تحبي تغيري المنظر تقومى تغيري الطارحة مثلا او الاكسسوار! حاجة سخيفة ومحبطة. ان شاء الله انشاء الله هاحاول اعمل اقصى جهدى علشان انزل البلاوى اللى زدتها فى الحمل..بس على العموم استاهل...انا اللى كنت بستعبط وباكل على كيف كيفي وبشرب كميات خرافية من الحاجات الساقعة والعصاير وكنت عايشة حياتى زي ما يكون الاكل ده كله بينزل فى ركبي مش بيتراكم دهون فوق بعض! </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>قريت مقال ظريف جدا عن البابي اللى عمره شهر واحد بس. المفروض حاليا تبدأ عضلات رقبة الطفل انها تقوى...بمعنى ان مثلا الطفل يحرك راسه شوية..يبدا يشد راسه لمدة لحظات وبعدين تقع تانى (لو مامة ليان بتقرا المقال ده ... شيلي البنوته على كتفك وهيا صاحية طبعا وهاتلاقيها بتشد رقبتها لورا شوية بسيطة وبعدين بترجع تانى على كتفك) او لو كان الطفل نايم على بطنه ممكن يرفع راسه لفوق شوية بسيطة ...البابي فى السن ده بيبدأ يبتسم...ويبدا كمان يمص فى صوابعه! احلى حاجة بتعجبني انا شخصيا انه بدأ يعمل اصوات :) يبدا يعمل دوشة كده بصوته :) المقال قال انه لما يبدا يعمل اصوات كده الاغيه انا كمان واعمل اصوات زيه....وممكن الام تلاحظ ان الطفل بيبص لها فى عينها فترة اطول...ممكن كمان يثبت نظره على حاجة (الام تقرب وشها من وش البابي لغاية ما تثبت عينه فى عينها وتبدا هيا تتحرك يمين وشمال هاتلاقي ان عينيه بتروح وتيجي معاها - بس بلاش فوق وتحت لانه مش هايعرف) ومكتوب كمان ان البابي يبدا ينبسط بالموسيقى.</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>في سؤال محيرني شوية ... يا ترى هوا عارف وفاهم انى امه؟ سمعت كتير ان الطفل بيسكت مع امه وبيحس بالامان معاها وانه بيعرفها من صوتها ومن ريحتها ومن صوت قلبها...فعلا الموضوع ده؟ ... يبان من دلوقتى الكلام ده ولا لسه بدري ولا ايه؟ اصلي مش ملاحظه ان في فرق معاه بين لما اشيله انا او لما تشيله ماما او اختى! لو حد عنده اجابه يقولي:)</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-7170751594106080205?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-18675184570039854472010-01-06T01:56:00.000+02:002010-01-06T01:56:17.684+02:00لولا صوتك مكنتش شفتك<div dir="ltr" style="text-align: left;" trbidi="on"><div dir="rtl" style="text-align: right;"><strong>"انا عايزة بابي كمان"</strong><br /></div><div dir="rtl" style="text-align: right;"><strong>"مين ده؟؟"</strong><br /></div><div dir="rtl" style="text-align: right;"><strong>"انا! انا عايزة نجيب بابي كمان"</strong><br /></div><div dir="rtl" style="text-align: right;"><strong>"..."</strong><br /></div><div dir="rtl" style="text-align: right;"><strong>"ايه ده انت مش عايز تانى؟"</strong><br /></div><div dir="rtl" style="text-align: right;"><strong>"انتى عايزة بابي تانى...امتى بالظبط؟؟"</strong><br /></div><div dir="rtl" style="text-align: right;"><strong>"على طول"</strong><br /></div><div dir="rtl" style="text-align: right;"><strong>"على طول يعنى امتى؟"</strong><br /></div><div dir="rtl" style="text-align: right;"><strong>"يعنى خلال السنة دي"</strong><br /></div><div dir="rtl" style="text-align: right;"><strong>"...."</strong><br /></div><div dir="rtl" style="text-align: right;"><strong>"ايه؟؟!"</strong><br /></div><div dir="rtl" style="text-align: right;"><strong><br /></strong><br /></div><div dir="rtl" style="text-align: right;"><strong>ده انا وجوزي...بجد عايزة ابقى حامل تانى!! وكان سؤاله بعد كده "انتى اللى حصلك فى المستشفى ده عادي؟ متعبتيش ومحرمتيش؟ انتى ملحقتيش تنسي"....عايزة برضه اخلف تانى ...بسرعة!! طبعا فضحنى عند ماما واختى وحماتى وقال لماما "شفتي ؟ مش هيا عايزة تخلف تانى؟" ماما كان رد فعلها طبيعي ..ان كل الناس بتخلف اكتر من مرة فى معظم الاحيان...قالها "عايزة تخلف تانى دلوقتى!!!" </strong><br /><strong>"نععععععم؟؟؟" دي ماما:) :) "على فكره انتى لو مش قاعدة هنا واحنا شايلينك مكنتيش ابدا قلتي كلمة زي دي"..ايه ده ايه ده؟ انتوا هاتزلوني ولا ايه؟!</strong><br /><strong><br /></strong><br /><strong>ودخلت فى محاضرة من طرفين (ماما وجوزي) انه على الاقل حرام عليا علشان صحتى!! وعلشان اعرف اخد بالي من ابني ده وهوا صغير اوي كده...مش وقته خالص!!</strong><br /><strong><br /></strong><br /><strong>ما علينا </strong><br /><strong><br /></strong><br /><strong>يا ترى اكتئاب ما بعد الولادة بيجي امتى؟؟ يعنى بعد الولادة على طول؟ ولا بعدها بفترة؟ بصراحة انا سمعت عنه كتير ومقرتش عنه تقريبا غير سطور قليلة اوي بس معنديش فكره عنه... بيجي لي اوقات بفضل اعيط من غير اي مناسبة ومن غير سبب حتى...بتخنق لوحدي وبعيط كتير اوي...هوا طبعا احنا عارفين ان الستات (المصريات بالزات) فيهم كمية كئابة ونكد حلوين...بس انا بقول من غير سبب...بحاول والله اطنش واكبر دماغي واعيش اللحظة الحلوة وكل الكلام العبيط ده...بس برضه بيجي عليا لحظات غامقة جدا</strong><br /><strong><br /></strong><br /><strong>من الحاجات المحبطة اوي برضه لما تشتكي مثلا لحد وتلاقي رد فعل اللى قدامك "انتى على فكره متدلعة"!! يعنى انا طالع روحي وعيني وكل حاجة في حياتي وقفت واتغيرت ومجهود رهيب ومفيش نوم وبتدلع؟؟ يعنى مثلا لما اقول "لابقى!! انا تعبت بجد تعبت!!" الاقي اللى يقولي "احمدى ربنا ان مامتك معاكي! امال لو كنتى زي فلانه بقى كنتى عملتي ايه؟ فلانه كانت فى الغربة لوحدها وخلفت توأم وكانت بطولها وغير كده جوزها كان بيشتغل وطبعا انتى عارفة الرجالة ملهاش دعوة بحاجة"...ومرة تانية "احمدى ربنا انك بتلاقي اللى يشيل عنك وانتى تنامي لك ساعتين تلاته...دي فلانه اهلها كلهم مسافرين بره وهيها هنا لوحدها وحماتها شايلة ايدها من كل حاجة...وكانت لوحدها خالص خالص وغير كده كانت والدة سيزيريان...كلها تلات ايام وكانت واقفة فى المطبخ بتطبخ لجوزها وواخدة بالها من ابنها وكل حاجة"</strong><br /><strong>مش بذمتكوا حاجة تفرس؟؟ انا مش عايزة حد يحبطني ومش عايزة حد يساعدني...انا عايزة شوية تعاطف! عارفة انى مش اول ولا اخر واحدة ولدت...عارفة ان ظروفي احسن مية مرة من ملايين غيري...عارفة برضه ان مهما اشتكي الشكوى مش هاتغير من الواقع اي حاجة ومش هاتزود ساعات نومي...وكل ما اقول اي حاجة ليها علاقة انى مش مصدقة ان ابني بيزن على طول كده وانى مش فاهمة اصلا هوا عايز ايه...يقولوا لي كلها تلات شهور وكله يبقى تمام! على الله!</strong><br /><strong><br /></strong><br /><strong>ابني وديته للدكتور علشان نطمن عليه بشكل عام ونتابع معاه بقى وقالي ان عنده فتق سري!! بس بالوقت هايروح وفي اطفال كتير بتتولد كده...سئلني ان كنت بشتغل ولا لا وقالي هاتاخدي اجازة اد ايه...قلت له بأذن الله هاحاول يبقوا ست شهور قالي يادوب...متفكريش تنزلي الشغل قبل ست شهور علشان الولد حرام عليكي! وقالي شوية حاجات ممنوعة زي الشاي والنسكافيه والقهوة والكولا والشطة والشيكولاته علشان الحاجات دي كلها بتنزل فى اللبن وبتنرفز الولد! وقالي شوية تعليمات كده خاصة بيه وبطريقة اكلي علشان الرضاعة الطبيعي افضل حاجة احافظ بيها على ابني...قالي ان الرضاعة الطبيعي بتمنع اي امراض عن الاطفال. قالي انى اكل كل شوية...مش قصده رمرمة...قصده مفضلش فترة طويلة (ست او سبع ساعات) من غير اكل ...وكل يوم اشرب حوالي 16 كوب سوائل! مياه وعصاير طبيعية ومشروبات سخنة...وعلشان اللبن يفضل كويس اكل تمر وبلح وجرجير وعسل اسود...وقال برضه ان الاطفال الاولاد بترضع اكتر من البنات.</strong><br /><br /><strong>واحدة صاحبتي نصحتنى اربط حزام!! علشان البطن ترجع مكانها تانى...بس واحدة تانية (في نفس القعدة) قالت ان الحزام ده بيضعف عضلات البطن..بصراحة مش عارفة اسمع كلام مين ومش عارفة اسئل مين اصلا علشان اعرف الصح...يا ريت لو حد عنده فكره ايه اللى المفروض يتعمل علشان البطن ترجع مكانها تانى وتبقى مشدوده وفي نفس الوقت مايحصلش مشاكل علشان عملية القيصري...لو حد يعرف ياريت يا ريت يقولي</strong><br /></div><div dir="rtl" style="text-align: right;"><br /><strong>انا عارفة ان كلام النهاردة كله ملوش علاقة ببعض...بس اهو فضفضه معاكوا وخلاص...هاروح للزنان بقى علشان هايجي له حاجة من كتر العياط!! عارفين "لولا صوتك مكنتش شفتك؟" ... صوته جايب اخر العمارة وهوا كله فى حجم الموبايل!! سلام بقى<br /></strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1867518457003985447?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-50342693288745897182009-12-30T04:02:00.002+02:002010-01-16T00:27:27.127+02:00من الحب ما قتل<div dir="ltr" style="text-align: left;" trbidi="on"><div dir="rtl" style="text-align: right;"><b>انا عملت عاملة سودا فى الواد!!! سامحنى يا رب!</b><br /></div><div dir="rtl" style="text-align: right;"><b>جالي برد رهيب وكحة...خدت ادويا وخدت بانادول كتير ونوعين دوا كحة وانتى بيوتيك وفوار!!!!! علشان عايزة اخف بسرعة علشان الولد مايتعديش! قلت بانادول ده امان بما انى كنت باخده وانا حامل فاكيد اكيد sure امان وانا برضع </b><br /></div><div dir="rtl" style="text-align: right;"><b> تخيلوا ايه اللى حصل؟ الولد ضرب 8 ساعات نوم ورا بعض!!! لو راجل كبير مكنش نام النوم ده كله ... زي ما يكون مخدراه...وصحيته بالعافية...وعلشان يصحى غيرت له وحميته بالمياه علشان يصحصح كده ويفوق شوية من الغيبوبة دي وبعدين حرام بابي يفضل 8 ساعات من غير اكل!!! ايه الافترا ده؟ المهم بعد معجزة صحي من النوم وفضلت ارخم عليه حوالي ساعتين وبعد كده تخيليوا ايه اللى حصل؟ نام حوالي 7 ساعات تانى!!! لا اله الا الله! سامحنى يا رب...الولد المفروض الطبيعي يعنى ياكل كل ساعتين مثلا او تلاته...ده بياكل كل 8؟! لو كان بينطق كان شتمنى اكيد</b><br /><br /><b>من الحاجات اللى عرفتها عن الاطفال هي ان المولود بيعيط من ساعتين لتلات ساعات يوميا!! طبعا ده اجمالي الزن! الله يكون فى عوننا...ومن الحاجات المهمة الرضاعة الطبيعية علشان بتحمي البابي من امراض كتير زي الالتهاب الرئوي والتهاب المجرى البولي والاكزيما واي عدوى فى الاذن...غير ان بيكون عندهم مناعة قوية اوي عن الاطفال اللى بتاخد لبن صناعي وبعدين لبن الام بيكون فيه توازن فى السكريات والدهون والبروتينات و </b><b>بيقولوا برضه ان الرضاعة الطبيعي بتعمل صلة قوية بين الام والابن...ارتباط عاطفي...الله اعلم</b><br /><br /><b>مش عارفة هانزل الشغل تانى ازاي! مش متخيلة انى اسيب الولد كده واروح الشغل وارجع له بعد الضهر. هايصعب عليا اوي...بس بيقولوا لي ان اول تلات شهور هم اصعب شهور...بعد كده هايكون في انتظام فى النوم والاكل (على الله) وهاقدر انظم له مواعيده ... بس حتى لو كده مش هاقدر اسيبه برضه...واحدة صاحبتي كان ليها اربعين يوم بس اجازة وضع...انا ليا تلات شهور اجازة...ان شاء الله هاحاول اخد تلاته كمان بعد كده بدون مرتب....وغالبا بعدهم هاستقيل! انا مش بحب الست الكنبة اللى كل همها البيت والعيال والتليفزيون وبس...احب يكون لي حياه اجتماعية وكيان بره البيت...ده طبعا كان قبل الخلفة...بعد الخلفة عايزة كل ده بس برضه ابني يكون معايا فى الشغل!! الحل طبعا انى يا اشتغل من البيت او اشتغل فى حضانة وابني ادخله فيها! </b><br /><br /><b>من الحب ما قتل!! عبارة سليمة 100%...مش عايزة اخنق ابني بحبي ليه...مش عايزة يبقى عندي مرض حب الابناء! هوا مفيش مرض اسمه كده بس هيا عبارة دارجة عن الست اللى بتخاف على عيالها اوي ومن كتر حبها ليهم ممكن تكون سبب فى الخنقة عليهم...زي الدبة اللى قتلت صاحبها من كتر الحب والخوف عليه</b><br /><br /><b>دلوقتى في شوية تلميحات من ناحية جوزي ان خلاص راحت عليه بقى:) وكل الاهتمام بقى بحازم...وان الولد بقى رقم واحد وهوا نزل درجة...هوا اكيد الكلام ده مش صح...او على الاقل مش صح مية فى المية...انا قلت له انتوا الاتنين عندي زي بعض!! كلمة خايبة مش كده؟ :) بس الولد صغير وبيصعب عليا خالص لانه لا حول له ولا قوة..ده حتى لسه مش بيشوف كويس!! يعنى كل اتصاله بالدنيا انا!! في مثل افتكرته دلوقتى كانت واحدة صاحبتي قالت لى عليه...مش فاكراه بالنص بس ما معناه "احب البعيد حتى يرجع - والصغير حتى يكبر- والمريض حتى يشفى"...دي كانت اجابتها لما سئلتها بتحبي اولادك بنفس الدرجة ولا بتحبي واحد اكتر من واحد...كان اجابتها انها متعلقة اكتر بالصغير لانه لسه ضعيف.</b><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-5034269328874589718?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com2tag:blogger.com,1999:blog-4041739309770236534.post-90802136344620655192009-12-28T03:37:00.000+02:002009-12-28T03:37:14.737+02:00ربي يا خايبة للغايبة<div dir="ltr" style="text-align: left;" trbidi="on"><div dir="rtl" style="text-align: right;"><div style="text-align: right;"><strong>"الو؟ اخبارك حازم ايه؟"</strong><br /></div></div><div dir="rtl" style="text-align: right;"><strong>"الحمد لله"</strong><br /></div><div dir="rtl" style="text-align: right;"><strong>"بيرضع كويس"</strong><br /></div><div dir="rtl" style="text-align: right;"><strong>"لسه عبيط فى الاول ومش عارف ياكل اصلا"</strong><br /></div><div dir="rtl" style="text-align: right;"><strong>"طيب والصفرا؟"</strong><br /></div><div dir="rtl" style="text-align: right;"><strong>"الحمد لله نسبه قليلة ما كل الاطفال كده"</strong><br /></div><div dir="rtl" style="text-align: right;"><strong>"وبتكرعيه بعد ما يرضع؟"</strong><br /></div><div dir="rtl" style="text-align: right;"><strong>"بخلي ماما تكرعه"</strong><br /><strong>"ليه مش انتى؟"</strong><br /><strong>"اصلي مش بعرف"</strong><br /></div><div dir="rtl" style="text-align: right;"><strong>"واخبار المغص ايه؟ اصله علشان لسه مولود وكل حاجة عنده لسه بتشتغل لاول مرة هاتلاقي عنده مغص"</strong><br /></div><div dir="rtl" style="text-align: right;"><strong>"اه ما انا عارفة وبياخد نقط كده علشان تهدى له بطنه شوية"</strong><br /></div><div dir="rtl" style="text-align: right;"><strong>"بتستعملي كريم ايه علشان البامبرز؟ خدى بالك علشان مايجيلوش التهابات"</strong><br /></div><div dir="rtl" style="text-align: right;"><strong>"واخدة بالي"</strong><br /></div><div dir="rtl" style="text-align: right;"><strong>"غطيه كويس خدي بالك الدنيا برد جدا ... انتى اصلك على طول حرانه حرام عليكي الولد"</strong><br /></div><div dir="rtl" style="text-align: right;"><strong>"بغطيه كويس انا عارفة انه لسه ضعيف"</strong><br /></div><div dir="rtl" style="text-align: right;"><strong>"بتغطيه بايه؟ اوعى تحطي على جلده صوف على طول لحسن يجي له حساسيه"</strong><br /></div><div dir="rtl" style="text-align: right;"><strong>"لا اطمنى عاملة حسابي بحط له جوا البطانية حاجة قطن علشان جلده"</strong><br /></div><div dir="rtl" style="text-align: right;"><strong>"وانتى بقى اخبارك ايه؟؟" (انتى لسه فاكرة؟؟)</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>ده حوار كل يوم وكل تليفون وكل زيارة بتاعة كل الناس!! ايام الحمل الناس كانت شايفاني من خلال بطني وحاليا شايفيني انى قسط اللبن بتاع الولد! وبس! انا كنت طبعا عارفة ان ده هايحصل... اللى بيجي اول حاجة بيدور عليها هيا الولد...وبعد ما يطمنوا على الاكل والتكريع (!!) والنوم وهدومه والدفا والادويا والصفرا وان ايده بقت تفرد شوية وبقى شكلها ايد بني ادم مش رجل عصفورة يشوفوا بقى الام! بس تعرفوا؟ مش متضايقة برضه...ابني حبيبي هوا الاول طبعا انا مش مهم ...بس ييبطلوا يبوسوا فيه!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>شعور الامومة ده حاجة غريبة اوي...كل ما ابص له والاقي في من ملامحي احس بحاجة غريبة كده...الحمد لله تمر فى الواد وطلع شكلي اصل صعب اوي بعد كل اللى انا شفته وفي الاخر يطلع شكل بنت خالة ابوه مثلا!! عندي شعوري غريب جدا...نفسي اخده جوايا تانى علشان مايحصلوش حاجة وحشة بعد الشر...جوايا كان امان بس بره خايفة عليه من الهوا! من فرط الهبل اللى انا فيه كنت مرة ببص له كده وتخيلت انه كبر بقى وحب واحدة وهايتجوز!! انا هابقى حما وحشة جداااااا بجد! انا عارفة نفسي هاولع الدنيا بينهم وهاوقع بينهم علشان ابني حبيبي يفضل فى حضنى! خيالي مريض؟ طبعا مريض اوي:)</strong><br /><br /><strong>انا دلوقتى فهمت ليه الحماوات بيعملوا كده فى بنات الناس! على فكره حاجة غير ارادية...يعنى الست يطلع روحها وتكبر وتدادي وتدلع وتاكل وتشرب وتحافظ عليه من كل حاجة وتربي وتعلم وتسهر جنبه ويطلع عينها ويجننها في الاخر تيجي واحدة تاخده متربي ومؤدب جاهز...مش والنبي حاجة تغيظ؟ طبعا هالاقي الستات كلها بتقولي "يعنى هيا اللى خدته دي ملهاش ام تعبت معاها؟" (اصل انا كنت بقول كده برضه) هاقولكوا اه...بس البنت بتسحب جوزها ناحية اهلها برضه مش العكس...يعنى البنت تجيب راجل...الراجل يطير بعيد وعلشان كده في امثال شعبية (فاشلة) زي "ربي يا خايبة للغايبة" و"جوزتها علشان تتاخر جابتهولي هوا راخر"...الخ الخ من موروثاتنا الشعبية!!</strong><br /><br /><strong>ما علينا</strong><br /><br /><strong>نرجع للواد:) عرفت شوية معلومات مفيدة جدا للامهات الجدد الجهلة زي حالاتى وقلت اشارككوا ...الستات يكملوا قراية...الرجالة يروحوا يعملوا شاي وكفاية عليكوا كده علشان باقي الموضوع متعلق بالبابي والام</strong><br /><br /><strong>- اول حاجة بلاش تستعملي wipes لانها بتسبب حساسية ليهم حتى لو كانت من النوع الجامد جدا...احسن حاجة تجيبي طبق صغير (بلاش بانيو الاطفال فى الاول علشان هايكون كبير اوي عليه وعلشان انتى كمان تعرفي تتحكمي فيه) ويكون فيه مياه دافية وتشطفيه بيها وبعدين تحطى كريم زينك قبل ما يلبس البامبرز</strong><br /><strong>- ممكن البابي ينزل فى وشه حاجة زي فسافيس بيضا...عادي خالص ده من الولادة (حصل مع ابني كده وكنت خايفة يكون مرض جلدي!! مش عارفة ازاي طفل ممكن يتولد بمرض جلدي بس كنت خايفة برضه)</strong><br /><strong>- ممكن يطلع له زي نقط حمرا فى جسمه ووشه - حساسية من الولادة عادي بس برضه استشيري دكتورة وغالبا هاتكتب للبابي كريم للحساسية او نقط ليها </strong><br /><strong>- ممكن برضه يكون عنده عين او الاتنين بيطلعوا افرازات كتير لدرجة ان جفونه ورموشه يلزقوا فى بعض - اسئلي الدكتور وهايكتب له قطرة نقطة واحدة بس اربع مرات فى اليوم مع تدليك فى مكان قرب العين علشان تسليك القناه الدمعية - وموضوع افرازات العين ده منتشر اوي متقلقيش</strong><br /><strong>- مهم اوي يكون عندك قطارة...بتتباع قطّارات بمعيار - بلاش ببرونات اول تلات شهور علشان ممكن يتعود عليها ومايرضعش طبيعي (الدكتورة قالت لى كده)</strong><br /><strong>- بلاش تيتينه - بس زي ما قلت انا احتجت لها اوي</strong><br /><strong>- بلاش الله يكرمك ترضعى ابنك قدام حد - لا قريب ولا غريب وبلاش تقولي بياكل كتير ولا بياكل قليل - اهو بياكل وخلاص!!</strong><br /><strong>- فى المستشفى قالوا لي برضه بلاش يبقى البابي بيرضع وابعده عني قبل ما يخلص! قالت لى الموضوع ده بيضايقهم جدا</strong><br /><strong>- بلاش تجيبي للبابي كاريكوت carry-cot علشان غلط! لو البابي بعد الشر لا قدر الله وقع - الوقعه هاتيجي فى ضهره!! ودي اخطر حاجة! بلاش برضه الcarrier ودي اللى بتلبسها الام ويتحط فيها البابي ويتشال فى حضنها ... خطر خطر خطر على ضهر الطفل.</strong><br /><strong>- بعد الولادة بشوية لازم تزوري دكتور اسنان علشان غالبا هايكون عندك جير! الجير على المدى الطويل خطر على الاسنان وبيجيب الام </strong><br /><strong>- بلاش تخلي البابي يقف - بمعنى بلاش تمسكيه بوضع عمودى كتير علشان برضه غلط على العمود الفقري بتاعه - خليه فى وضع نوم لغاية بس ما ضهره يمسك نفسه</strong><br /><strong>- خدي بالك وانتى بتغيري له هدومه - لو كان بيتحرك وايده متشنجة على وضع معين وهوا بيقاوم بلاش تغصبيه...سيبيه لغاية ما يسيب دراعه ولا رجله علشان متجيبيلوش خلع!!</strong><br /><strong>- بلاش نظام الطبقات طبقات طبقات الهدوم ده - فى النهاية هايجي له برد! لانك هاتغيري له طبعا كتير وبعد ما يكون متدفي اوي مرة واحدة نصه يكون فى البرد! </strong><br /><strong>- فى المستشفى برضه قالوا لي بلاش احط له حاجة على راسه - يعنى بلاش زعبوط ولا ice cap ولا اي حاجة</strong><br /><strong>- لما يجي ياكل...عشر دقايق ياكل من ناحية وتكرعيه - وبعدين عشر دقايق الناحية التانية ويتكرع - لو جعان تانى اكليه طبعا بس بلاش نظام الساعة الا ربع فى بؤه ده علشان هوا كده عاملك تيتينه بشرية!! طبعا فى الاول الاطفال بيكونوا مش عرافين يمسكوا كويس...تلاقيه تايه كده ومش مركز:) عادي عادي...متاخديش فى بالك بس خليكي وراه لانك ممكن تكتشفي انه بياخد ناحية والتانية لا...بلاش تطاوعيه...سيبيه يزن وافضلى حاولي معاه</strong><br /><br /><strong>كفايه عليكوا كده اكيد زهقتوا :)</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-9080213634462065519?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com7tag:blogger.com,1999:blog-4041739309770236534.post-67705321787839107322009-12-24T00:50:00.000+02:002009-12-24T00:50:24.948+02:00نوم الزنان عبادة<div dir="ltr" style="text-align: left;" trbidi="on"><div dir="rtl" style="text-align: right;"><strong>ربنا يهديك يابنى</strong><br /></div><div dir="rtl" style="text-align: right;"><strong>دعوة من قلب ام تعبانه لابنها الزنان! دي انا طبعا والفتفوتة ابني!</strong><br /></div><div dir="rtl" style="text-align: right;"><br /><strong>بقالي اسبوع واحد بس ام...بس ده اختصار اول اسبوع امومة!!</strong><br /><br /><strong>لما بلاقي شوية وقت وهوا نايم وانا مش جايلي نوم (اوقات نادرة طبعا) بدخل على النت اعرف اسباب الزن ايه!! وطلع الاتى:</strong><br /></div><div dir="rtl" style="text-align: right;"><strong>- جعان</strong><br /></div><div dir="rtl" style="text-align: right;"><strong>- عايز يغير مع ان في اطفال بتستمع بالدفا بتاع البامبرز ده!! بس ابني للاسف طلع نضيف</strong><br /></div><div dir="rtl" style="text-align: right;"><strong>- عايز يتشال </strong><br /></div><div dir="rtl" style="text-align: right;"><strong>- حاسس ان المكان اللى هوا فيه واسع عليه بما انه كان متعود على المكان الضيق جوا والحل انى الفه فى بطانية او اي حاجة تحسسه انه فى مكان ضيق مش فى سرير لوحده</strong><br /></div><div dir="rtl" style="text-align: right;"><strong>- بطنه بتوجعه - دي بقى قصة كبيرة ومليش نفس بصراحة اقولها لانى زهقت من القراية فيها بس باختصار كده هاتلاقيه بيرفص برجله ويجيبها على بطنه جامد - كده عنده مغص او انتفاخات ومعاكي ربنا علشان يسكت او شوفي دوا يسكته </strong><br /></div><div dir="rtl" style="text-align: right;"><strong>- منزعج من الاصوات او الضوء العالي </strong><br /></div><div dir="rtl" style="text-align: right;"><strong>وفي شوية اسباب تانية بس دي الحاجات الواردة اكتر...ابني حبيبي بقى بيعشق الزن!! ولما بيعيط بلاقيه فتح بؤه كده على الاخر وعمل لسانه ودن قطة ومش وشه بس اللى بيحمر...لا...دماغه كلها بتقلب نبيتي. في اول يومين تلاته لما كان يعيط وانا بحس بالفشل جنبه بفضل اعيط انا كمان...مش عارفة اعمله ايه!! كنت رافضة خالص ان اي حد يساعدنى ...اول تلات ايام عملت فيها فردوس محمد والامومة طغت على مشاعري وقلت محدش هايخدم ابني غيري ده انا حتى كنت بزعق للى يدخل عليا الاوضة...انا اللى اعمله كل حاجة - اغير له وااكله (طبعا مفيش اوبشن ان حد تانى يأكله غيري) وانيمه وكل حاجة...اول تلات ايام كانوا عبارة عن يوم طويل ملوش بدايه من نهاية...يوم مش عايز ينتهى!! فى المستشفى قالوا لي مع كل مرة ياكل فيها اديله جلوكوز!! علشان فى الاول بيكون مفيش لبن عند الام...طبعا كانت النتيجة انى مش بديله غير جلوكوز لانى مش عارفة اعمله حاجة ولا عارفة أأكله ولا حاجة اطلاقا...قلت يمكن عايز يغير...يا عيني الولد لسه ابن يوم او اتنين ورجليه عاملة زي شراشيب السجاده..رفيعة اوي..كنت خايفة اوي اغير له وخايفة جدا اشيله لحسن اخلع له دراعه (حصلت مع واحد فى الشغل والله) وخايفة يفضل جعان يحصله حاجة...كنت عايشة فى خوف كبير وبس...وبعدين في اليوم التالت فضلت قاعدة على كرسي قرب تلات ساعات علشان ياكل ومش بياكل...تلات ساعات ضهري محنى وبحطه من اليمين للشمال والعكس...وعلى كتفي شوية وعلى دراعي شوية واهز فيه شوية وبرضه مفيش فايدة ولسه بيعيط ... اتصلت بجوزي وكان بعد شغله هوا رد عليا بطريقة حلوة جدا (ام بقى جديدة ولسه جايبه له الواد) وانا باعلى صوتى "انت فييييييين؟؟؟ تعالي شيل ابنك!!" وهات يا عياط! جه طبعا يشوف في ايه ولقانى غرقانة في دموعى والولد على ايدي وضهري مقسوم وحواليا مناديل على السرير والارض من كتر الزن...جه علشان يلحق المناحة اللى انا عملاها...وجه يساعد شوية بقى...المهم فتحنا النور العالي (الاطفال مش بتحب النور المباشر علشان كده قاعدة فى نور خافت شوية) ولقيت لون الولد متغير...عنده الصفرا! الليلة دي خده هوا وماما للمستشفى ولما جه اتكلم معايا ان مساعدة اي حد ليا مش معناها انى ام فالصو بالعكس انا محتاجة اللى يساعدنى وعلشان كده احنا قاعدين مع اهالينا.</strong><br /><br /><strong>ومن يومها عملت لهم فى البيت شيفتات (جمع شيفت...نبتجيات)! ماما واختى وجوزي وحتى بابا كتر خيره بيساعد مع انه مش بيشيل اصلا اطفال بس الظروف! اليوم ده نمت فيه كتير ....وعرفت انه مش بياكل لانى انا شخصيا نسيت اكل من كتر الارتباك اللى كنت فيه وبالتالي مكنش في اي حاجة علشان الاستاذ!! كان بياكل هوا! وانا من الناس اللى ضد اختراع التيتينه ! مش بحبها وضدها تماما وبكره شكل الطفل اللى على طول فى بؤه ولو اتشالت يتحط مكانها صباعه...فمن قبل ما اولد وانا مقررة ان مفيش تيتينه هاتيجي...بس بصراحة جبتها من باب ان عندي كل حاجة ....في اليوم ده كنت زي المجنونة "هيا فييييين؟؟؟" مش فاكرة حطيتها فين ولما لقيتها حاولت اسده بيها ومعرفتش...لانه لسه صغير جدا مايعرفش ياخدها...برضه عيطت جنبه لما فشلت فى انى حتى احط له السكاته دي!</strong><br /><br /><strong>يوم تاريخي...الحمد لله عدى على خير.</strong><br /><br /><strong>اول امبارح كملت اسبوع "امومة" زي ما قلت...بصراحة اسبوع هايل هايل هايل... وبجد كتير من اللى كان بيتاقلي انى هاحلم بيوم من ايام الحمل كانت جملة صحيحة مية فى المية...طبعا انا بحب ابني جدا وبيصعب عليا اوي لانه لا حول ولا قوة لسه ضعيف وصغير وعبيط جدا...بس لما بيعيط بكره نفسي والدنيا بتضلم اوي ومفيش حاجة بتسكته بسهولة...جبت له ماء غريب...بس مكتوب عليه للاطفال اللى فوق الشهر. النهاردة بس عرفت ان في افتكاسات كده اسمها baby calm وميلوبا ومش عارفة ايه تانى...هاجرب بس برضه مش عايزة اعمل الولد حقل تجارب. بلاش حد يفتكر انى متضررة من ابني...بالعكس انا بحب حازم جدا جدا ومش متخيلة ان حاجة تيجي تضايقه مثلا او حد يزعله او يكون نفسه فى حاجة مستقبلا ومتجيش...بس تعبت من كتر العياط اللى من غير لزمه ده.</strong><br /><br /><strong>مش عارفة امهات زمان كانوا بيعملوا ايه...الواحدة من دول ترزع تسع ولا عشر عيال ورا بعض وتربى وتشيل وترضع وتغسل وتطبخ ومفيش شكوى!! احنا جيل كنتاكي بقى...ربنا يقوي الواحد على المسئولية ويسامحنى لو قصرت فى حاجة لانه هايكون غصب عنى!</strong><br /><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-6770532178783910732?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com4tag:blogger.com,1999:blog-4041739309770236534.post-34253019176350423292009-12-23T12:33:00.000+02:002009-12-23T12:33:30.117+02:00يا تبعدي عن الحلبة يا تبعدى عن الناس<div dir="ltr" style="text-align: left;" trbidi="on"><div dir="rtl" style="text-align: right;"><div style="text-align: right;"><strong>اكمل لكوا بقى اللى حصل بعد ما ولدت بالسلامة </strong><br /></div><div style="text-align: right;"><strong>طلعت الاوضة وناس كتير بقى وهيصة حواليا...بابا وماما واختى وجوزي وحماتى وعمتى وبناتها وتليفوناااااااااااااااات وبرضه الممرضات داخلين خارجين ومبروك...الف مبروك...يتربى فى عزكوا...عقبال ما تشوفه عريس...عقبال ما تخاويه...حمد الله على سلامتها...والله الله يكون فى عونها دي استحملت كتير اوي...ده الولد طالع من اوضة العمليات بيضحك (ناقص يقولوا كان فى ايده سيجارة)...وهكذا طبعا كلكوا فاهمين ليه ...وسبحان الله اي حد يدخل من هنا (طبعا لازم بياخد حلاوة النونو) مفيش ثواني تلاقي حد تانى دخل علشان يعمل اي حاجة ...بيبعتوا بعض على فكره!</strong><br /><br /><strong>المهم انا كنت فايقة جدا اول ما خرجت من العمليات وكنت هافطس واشوف ابني..كل شوية اسئل عليه يقولوا لي مش دلوقتى استنى علشان تحت "تحت فين؟"...هوا تحت وهانجيبه....ايوه تحت ده اللى هوا فين يعنى؟ ...المهم طلع انه بعد الولادة بيتحط تحت ضوء كده علشان ...مممم مش عارفة علشان ايه....وعلشان ياكل ويستحمى وشوية حاجات كده...المهم اربع ساعات وانا عمالة ازن ازن ازن عايزة ابني...وبين كل زنة والتانية اخطف لى شوية نوم ...كنت بقع لوحدي انام من غير مجهود واصحى اقول "فين ابني؟"...حتى انا فاكرة فى مرة صحيت وسئلت جوزي "هوا البنك اتصل ولا لسه؟" اصله مستنى تليفون من بنك يأكد معلومات علشان كريديت كارد....طبعا سئلني انتى فى ايه ولا فى ايه ما يتحرق البنك !!! مش عارفة هيا دي عقدة نقص عندي ولا ايه بس بحب اوي الناس اللى حواليا تدلع فيا كده وتهتم انى تعبانه وتخاف عليا خالص والشغل ده...طبعا استمتعت بالموقف لاخر ثانية لانى عارفة كلها عشر ايام واخد بابو وردة وكل الاهتمام هايروح للفتفوته اللى خلفتها :)</strong><br /><br /><strong>بعد اربع ساعات سمعت دوشة (طبعا كنت واقعة نايمة وصحيت على اصوات عالية)..."ايييييه ده ماشاء الله"..."شبه مامته بالظبط"...."ايه الصوابع دي؟؟"...."يا حبيبي ده كاميل خالص"....عرفت طبعا ان البيه شرف وكنت هاموت بقى وازعق في الناس "انا الاول بقاااااا ده ابني انا "...بعد ما جه ادوهولي فى ايدي وفي ستين راس حواليا بتتفرج عليه...مش عارفة اقول احساسي كان ازاي...بس فضلت اتفرج عليه شوية ولقيت اختى اول حاجة بتعملها بتشوف ودانه!!! اصلها متعقدة من الناس اللى ودانهم عاملة مروحة من راسهم ومطرطقة لبره...وقالت لى "ودانه عادية YESSSS" :) وانا دورت على رجله وقلعته الشراب....ايه الصوابع دي؟ اربعة؟؟؟؟ فضلت ابص فيها كتير طلع يا حرام الصباع الاخير من كتر ما هوا صغير مش باين اصلا :) وبعدين مقدرتش اشيله اكتر من كده خفت عليه يتكسر فى ايدي ولا حاجة والممرضة جت حطته فى السرير بتاعه بس خلتهم يجيبوا السرير لزق فى سريري علشان اعرف اشوفه</strong><br /><br /><strong>باقي اليوم مش فاكرة بالظبط عدى ازاي بس كان في زيطه كده وجمل بتتكرر كتير اوي (احنا المصريين نحب نجامل بصوت عالي دليل المحبة...مش مهم بقى اللى مرمية على السرير زي كيس القطن دي ومش مستحملة صوت عالي...لا المهم نجامل لحسن الناس تقول علينا مش فرحانين ولا حاجة) الدكتور جه وسئلته هاخرج امتى قالي انتى وشاطرتك! انا نسيت اقولكوا ان يوم الولادة ده لا اكل ولا شرب خالص علشان البنج...ممنوع حتى اشرب بؤ مياه...جيت على بالليل حسيت ان زوري ده خشب وجلدي هايتفلق خلاص من الجفاف....عطشاااااااااااااااانة</strong><br /><strong>- "شوية مياه لو سمحتى ممكن؟"</strong><br /><strong>- لا ممنوع!! </strong><br /><strong>- ليه طيب ما انا ولدت خلاص</strong><br /><strong>- .لا ممنوع انتى ممكن على تسعة ونص بالليل كده تشربي شوية مياه صغيرين!! </strong><br /><strong>- تسعه بالليل معناه انى افضل 12 ساعة من غير مياه؟ </strong><br /><strong>انتى محتاجة المياه فى ايه ما انتى متركب لك محاليل</strong><br /><strong>- (...)</strong><br /><br /><strong> المهم الدكتور قالي انتى وشاطارتك ولو مشيت وقعدت على كرسي ممكن اخرج فانا جيت على نفسي لانى عايزة اخرج بسرعة من المستشفى...انا بكره المستشفيات وخصوصا بقى الاكل بتاعهم البلاستيك ده...في نفس الليلة جيت على نفسي جداااااا ومشيت...كان في ناس فى الاستراحة وصممت اروح لهم بنفسي... وانا ماشية وجوزي ساندني علشان دايخة جدا من العملية والمخدر وكده لقيت واحد بصوت جهوري "برافوووو...ايووووه كده برافو عليكي" (والله خفت يقولي ايوه كده يا وديييع من كتر الانبهار والانشكاح اللى في نبره صوته) اتلفت لقيت راجل واقف وبيسقف!!! وانا عمالة ادور فى الذاكرة لايكون صاحب بابا ولا قريب جوزي من بعيد ولا حتى قريبنا وانا مهيسة ومش واخدة بالي...بس لما لقيت ان انا وجوزي واقفين نتفرج عليه اكتشفت اننا اصلا منعرفوش! هوا واحد جاي يزور حد بيولد وفرح بيا اوي وانا بمشي!!! لا تعليق طبعا!</strong><br /><br /><strong>رحت للناس ورجعت وانا مقسومة اتنين بس مش مهم - برضه هاخرج يعنى هاخرج بكره الصبح باذن الله...كان قرار غريب ان واحدة تولد بعد الضهر سيزيريان وتانى يوم الصبح تخرج من المستشفى بس هوا كده بقى...كان في تعليق من حد ظريف من اصحابي بتقولي انتى كنتى خايفة على الفلوس ولا ايه؟!!!!...فلوس ايه؟....فلوس المستشفى!!...اشمعنى؟,..اصلك خرجتى على طول العادي يعنى ان اللى بتولد زيك كده بتقعد على الاقل يومين مش ليلة وتخرج!! ...برضه مش هاخسر حد ومش هارد عليها طبعا!</strong><br /><br /><strong>قبل ما اخرج الصبح...جت واحدة متخيلة ان دمها شربات وجت علشان تديلي شوية نصايح عن الامومة بقى والرضاعة والبابي والكلام ده كله...وهيا ماسكة فى جملة واحدة (ظريفة بقى) مش بتقول غيرها مستنيانى اضحك فى كل مرة تقولها....بتقولي ده اول طفل ...سنة اولى حب يعنى....بعد شوية "ما احنا بنقول على اول بابي ده سنة اولى حب" (!!)...وقالت لى شوية نصايح وللاسف الشديد امى كانت واقفة...قالت لى لازم تعوضى كل اللى حصل ده بالبروتين...يعنى نص فرخة فى الغدا وزيها فى العشا (عرفت بس فى اللحظة دي ان الواد ينزل يتحط مكانه فرخة فعلا كلام صحيح...بس كده هايجيلي صرع!)...كلي سلاطة وكلي فراخ او ما يعادل فرخة كاملة من اللحمة (اسبوع واكل الواد كده)...وكل يوم تشربي لتر ونص مياه ولتر ونص مشروبات طبيعية سخنة وزيهم عصير فريش...وتشربي لبن (قصة اللبن دي مش هاتخلص؟) وتاكلي بيض وابعدي خالص عن البصل والتوم علشان هايعمل انتفاخات للولد وعن الشطة والملح والمكيفات (ممكن واحد بس شاي او نسكافية فى اليوم) وبلاش بقوليات وبلاش مواد حافظة.</strong><br /><strong>طبعا امى كانت واقفة وبتاخد الكلام وعملته تاتتو في مخها ومن يومها وهيا كل يوم تعملي سلاطة من غير بصل (بكرهها) وفرخة كل يوم ليا لوحدي (طبعا مش باكلها لان مفيش انسان طبيعي ياكل فرخة يوميا) وشوربة (ماشي انا بحب دي) ولازم بقى تاكلي تلاته او اربعة زبادي (يييع) ومياه كتيييييييييييير علشان الولد يعرف ياكل هوا كمان!!!</strong><br /><br /><strong>المهم من يوم ما جيت البيت عند بابا وماما ...وماما بتعملي مج الحلبة العظيم ده والفرخة طبعا والسلاطة والزبادي والمياه والعصير ومع كل وجبة خناقة:) بس نصيحة لكل واحدة لسه هاتخلف...يا تبعدي عن الحلبة يا تبعدي عن الناس...بتعمل ريحة بشعة!!! ومش بتطلع مع الصابون وبعدين معاناه وانتى قاعدة حاسة انك كنكة حلبة!! عامة فى اختراع جامد اوي اسمه هيربانا.. دي حبوب كده طبيعية فيها حلبة وشمر وحاجتين كمان لاي واحدة عايزة تاخد فايدة الحلبة بس من غير الريحة!!</strong><br /><br /><strong>مضطرة استأذن...واجبات الامومة تناديني...ولو حد عنده فكره عن سد زن الاطفال من غير ما نروح السجن يقولي!</strong><br /></div></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-3425301917635042329?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-56868479699014470592009-12-20T20:05:00.000+02:002009-12-20T20:05:45.371+02:00ام الواد ولدت يا جدعااااان<div dir="ltr" style="text-align: left;" trbidi="on"><div dir="rtl" style="text-align: right;"><strong>بقيت ام...ام رسمي خلاص...بقيت ام حازم :) الواد جه اخيرا بعد طووول انتظار</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>قبل ما اقول اي حاجة ممكن اطلب منكم طلب؟ كل واحد يروح يبوس ايد ورجل امه...ولو كان راجل متجوز يبوس ايد مراته...بجد الموضوع شاق جدا! مكنتش متخيلة ليه الجنة تحت اقدام الامهات ....بس بدأت افهم.</strong><br /></div><div dir="rtl" style="text-align: right;"><strong>من يوم ما ولدت وامى صعبانه عليا جدا...مشاعري اتجاهها خدت شكل مختلف...هيا طبعا امى وبحبها جدا طول عمري بس بقيت اقدرها اوي اوي.</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>فيلم الولادة ده جه فجأة...كنت عند الدكتور متابعة عادي خالص وقالي بكره تولدي!! بكره؟؟؟؟ مين هايولد بكره؟ انا؟؟!!! </strong><br /></div><div dir="rtl" style="text-align: right;"><strong>ضغطي كان عالي ومكنش ينفع استنى اكتر من كده - المهم قالي تانى يوم اروح المستشفى الصبح بدري واخد طلق صناعي واحنا مع بعض بقى باقي اليوم!! خرجت من عنده ومش قادرة اسيطر على دموعى...معرفش ليه بعيط بس فعلا كانت دموعى نازلة بدون اي تحكم...جوزى طبعا كان معايا وحاول يهديني شوية بس انا مكنتش عارفة اصلا بعيط ليه...اتصلت ببابا وماما واصحابي القريبين منى وبعدت رسايل لشوية تانيين من اصحابي - كنت عايزة الكل يعرف ان بكره هادخل اولد! ايه الفكرة طيب؟ معرفش هوا كده انا عايزة الكل معايا...كنت خايفة وكان في شعور تانى مسيطر عليا...مرة واحدة حسيت انى مش عايزة اولد!!! انا عايزة ابني جوايا كده على طول..عايزاه معايا انا وبس!! جوزي كان متعاطف معايا جدا وكان كل كلامه بيحاول يهديني ويشجعنى وان بكره خلاص هانشوفه وبكره هانبقى عيلة وبكره هايجي اللى يربطنا اكتر...بس هيهات...خدنى وقلنا نخرج لاخر مرة واحنا اتنين بس...طبعا الخبر انتشر بين اصحابنا والعيلتين وكانت باقي الليلة كلها تليفونات بس كنت مبسوطة بكده...وجوزي جه بات معايا عند اهلي الليلة دي...انا منمتش خالص كنت مش مصدقة على خايفة على قلقانة على متضايقة انه هايخرج!! مع اذان الفجر صحيت جوزي وقلت له "ادعي لي" وبدأت عياط من تاااااااااانى...ست نكدية وكئيبة انا اوي :)</strong><br /></div><div dir="rtl" style="text-align: right;"><strong>المهم تانى يوم كان البيت كله على قدم وساق ... امى واختى وجوزي كله جاهز علشان ننزل...انا تايهة وحاسة ان في حاجة ناقصة اخدها معايا المستشفى بس مش عارفة ايه وزي اللى عنده امتحان ومش مذاكر ولا كلمة...صممت اتصور الصبح قبل ما انزل المستشفى...بقالي خمس شهور بقاوم اختراع الكاميرا ده بس حبيت اتصور غتتاته. المهم رحنا المستشفى ودخلت الاوضة وبدأ الجد! الاوضة حلوة اوي...زي الاوتيلات كده فانشكحت انا اوي واختى كانت واخدة الكاميرا معاها (!!!) وصورتني (طالعين مصيف بقى مش ولادة)...وجت ممرضة ادت لي شئ البسه!! هوا شئ مايتقالش عليه وصف تانى...بيجامة غريبة الشكل والمعالم وقالت لى البسيها ونامي على السرير.. ولمدة نص ساعة ممرضات خارجين داخلين...ركبوا الكانيولا فى ايد...وقاسوا الضغط...وعدلوا ضهر السرير...وعلقوا محلول (الطلق الصناعي)...وحاجات كده اتلزقت على بطني متوصلة بجهاز علشان تقيس نبضات البابي والطلق كام فى المية! واشتغل يا كبير!!!!</strong><br /></div><div dir="rtl" style="text-align: right;"><strong>كلها نص ساعة وبدات الحركات...مش هاطول عليكوا الهيصة اللى حصلت بس ست ساعات من الالم المتواصل...ست ساعات شفت فيها الوجع الوان الطيف...من كتر الالم خدت حقنة مخدر وكانت نتيجتها انى دخت بس برضه تعبانه اوي...طيب والحل فى التعب ده ولغاية امتى هافضل كده؟ كل شوية دكتور يدخل يكشف ويقولي "لسه بدري"....او "راس البابي مش نازلة فى الحوض"...ومن كتر الالم الغير عادي خدت حقنة الضهر دي (حقنة بتتاخد بين فقرتين فى الضهر وبتعمل تخدير نصفي...كانيولا بتركب اسفل الضهر وبتتوصل للكتف بانبوبة وفي نهاية الانبوبة دي بيتحقن جرعات المخدر)...دي الحاجة الوحيدة اللى جابت نتيجة...بس طبعا كانت جرعات مش كبيرة...تشتغل شوية وبعدين يبدا الوجع ويجي حد يحقن جرعه كمان وهكذا...بس بصراحة سحرية...ماهي كمان مش ب300 جنيه على الفاضي يعنى...المهم اخر المطاف الدكتور قرر انى اولد سيزيريان!!! فاكرين لما كنت بتكلم عن موضوع سيزيريان ولا طبيعي؟ انا جربت الم الطبيعي وولدت سيزيريان فى الاخر...مبحبش اسيب حاجة من غير ما اجربها ابدا!</strong><br /></div><div dir="rtl" style="text-align: right;"><strong>ولدت من غير بنج...دخلت العمليات وكل لقطات الافلام العربي الفاشلة بتاعة مشهد البطلة وهيا دخلة العمليات والكاميرا مش جايبة غير السقف ولمبات بتعدي ورا بعض ورا بعض جم في بالي...على فكره لقطات حقيقة :) انا كنت عمالة ابص على اللمبات واحدة ورا التانية لغاية ما وصلت العمليات...هوباااا على سرير العمليات وكل واحد عارف بيعمل ايه...ركب ماسك الاكسوجين وغموا عيني وفردوا دراعي على حاجات جنب الترولي وحقنوا حاجة ساقعة اوي فى حقنة الضهر وبخخخخ خلاص! رحت انا بس كنت سامعة...وكنت بصحى فى النص واروح تانى وبعدين في دكتور بدأ يتكلم معايا علشان يفوقني ...اول حاجة سئلتها "هوا انا خرفت وقلت ايه؟!!" - قالي انتى مكنتيش واخدة بنج فمقتليش حاجة ...وفضل يتكلم شوية معايا ولما عرف انى ها سمي حازم بقى يقولي يا ام حا زم وشالوا الماسك من على عيني ووروني الولد...مش فاكرة شكله مش فاكرة حاجة بس فاكرة ان قلبي دق دقة زيادة...حسيت ان يااااااه ده ابني؟؟؟ انت صغنطوط اوي وبعدين مش فاكرة ايه اللى حصل غير بعد شوية بفتح عيني تانى وبصيت فى السقف لقيت البتاعة الكبيرة المدورة اللى بتنور دي وكنت شايفة انعكاسي عليها وشفتهم وهما بيخيطوا الجرح!!!!!!!!! وخرجت من العمليات وانا صاحية ...خرجت وسمعت صوت بابا وماما واختى وجوزي وبنات عمتي وكان في هيصة كده ودخلت الاسانسير وبابا وجوزي معايا فيه...بابا قالي "بقيتي ام خلاص؟ قلت له "انت اللى بقيت جد خلاص"...اخيرا خلصت...بقيت ام...وعدت اصعب مرحلة الحمد لله على خير.</strong><br /></div><div dir="rtl" style="text-align: right;"><strong>الواد بيعيط....هاقول لكوا على اللى حصل بعد كده بس لما ينام:)</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-5686847969901447059?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com4tag:blogger.com,1999:blog-4041739309770236534.post-11974520479358354892009-12-09T14:09:00.002+02:002009-12-09T15:30:33.151+02:00مستنية الفرج<div dir="ltr" style="text-align: left;" trbidi="on"><div dir="rtl" style="text-align: right;"><strong>بقالي اسبوع مستنية الفرج ولسه ربنا مفرجهاش عليا - بس الحمد لله انا مش مستعجلة خلاص</strong><br /></div><div dir="rtl" style="text-align: right;"><strong>كل يوم بخرج تقريبا...عاملة زي اللى واخدة اجازة اخر السنة وطول الاجازة مخرجتش وافتكرت اخر يوم فى الاجازة ان بكره المدرسة...وبعمل كل حاجة بقى فى اخر يوم ده...انا كده...بدخل سينما واتمشى فى الشارع واشتري حاجات مش محتاجاها وافرقع فلوس وخلاص...مقضياها يعنى :)</strong><br /></div><div dir="rtl" style="text-align: right;"><strong>بحاول بقدر الامكان ابعد فكرة الولادة واللي هايحصل بعد ما اجيب حاجة صغيرة كده بتنزن! على خير انشاء الله!</strong><br /></div><div dir="rtl" style="text-align: right;"><strong><br /></strong><br /></div><div dir="rtl" style="text-align: right;"><strong>احلى حاجة اليومين دول الدلع! بدلع على كل الناس وكله متقبل عادي جدا.. يا .قاعدة بطة فى مكانى يا بخرج...غير كده مش بعمل اي حاجة ...ماما ممكن اشرب؟ "طبعا يا حبيبتي"...ماما انا جعانة..."حالا اعملك ايه؟"....معلش مش قادرة اوطي اجيب البتاعة اللى وقعت منى دي...."لااا اوعى توطي هاجيبهالك انا"....وهكذا...اخر بلطجة.</strong><br /></div><div dir="rtl" style="text-align: right;"><strong><br /></strong><br /></div><div dir="rtl" style="text-align: right;"><strong>برضه الايام دي بتكتر التليفونات من اصحابي علشان ادعي لهم وانا بولد...ومن ناس تانية علشان يأكدوا عليا اقولهم لما اجي اولد علشان يدعولي...وتليفونات من ناس بتطمن لوجه الله :) التليفون بيرن على طول ودي حاجة عجباني اوي...الاهتمام حلو برضه.</strong><br /></div><div dir="rtl" style="text-align: right;"><strong><br /></strong><br /></div><div dir="rtl" style="text-align: right;"><strong>قدامى اسبوع تقريبا وخلاص...اخر علاقتى بالحمل ناقص لها اسبوع...مش عارفة احساسي هايبقى ايه وانا خفيفة كده ومش شايلة قالبين طوب جواها...انا حاليا مش متضايقة...بس عايزة اشوفه شكله هايبقى ايه...فضول يعنى مش اكتر...ابيض؟ اسمر؟ بشعر؟ ولا اقرع؟ هايبقى وحش ومكرمش زي معظم العيال اللى بتتولد جديد؟ ولا وشه مفرود كده ومصحصح؟ رفيع؟ تقيل؟ كده يعنى...انا حلمت بيه حوالي مرتين...فى المرتين كان استغفر الله العظيم :) :) كان صغير اوي كده ومكرمش خالص وشعره احمر!!!! مفيش حد في عيلتنا شعره احمر خالص! المهم كان بيزن كتير كمان...فى المرة التانية كان برضه شكله ضال...بس نرجع ونقول احلام مش مهم!</strong><br /><strong><br /></strong><br /><strong><br /></strong><br /><strong>يا ترى هاقرف منه؟ اصله هايحتاج ان الواحد يعصر على نفسه ليمونتين تلاته علشان يعرف يتعامل مع اشكال كتير من العك واللغوصة! واحدة صاحبة اختى بتستعمل على طول جوانتي طبي علشان تعرف تعيش حياتها معاه كده براحتها!! والهدوم!! يا ترى الهدوم فعلا هاتبوظ منه؟ هدومى وهدومه؟ والملايات والحاجات دي برضه هاتبوظ؟؟ لو حد يعرف يقولي...بس حتى لو هاتبوظ يعنى هاعمل ايه؟ اكيد مش هافرش له اكياس بلاستيك!! ياللا مش خسارة فيه </strong><br /><strong><br /></strong><br /><strong>ناس كتير نصحونى انى امشي كتير...وحتى الدكتور قالي امشي بس متجهديش نفسك...وانا بمشي على اد ما بقدر لغاية ما احس ان مفصل رجلي هايطلع بره ويمشي لوحده من التعب...المشكلة ان بعد كده بكون مش قادرة اتحرك وضهري يوجعنى ورجلي تورم وبيبقى حالتي حالة! واحدة صاحبة اختى برضه بتقولي حاولي تجري!!!!! اجري ازاي يا حاجة؟ لا اجري... حاولي بس تجري. على اساس ان العمود الفقري استانليس ستييل وركبي دي خشب! </strong><br /><strong><br /></strong><br /><strong>لو حد عنده حاجة مفيدة يقولي والنبي...حاسة انى داخلة على حاجة كده مش مفهومة وضلمة شوية!</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1197452047935835489?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-58890632010646641432009-12-02T15:22:00.000+02:002009-12-02T15:22:36.005+02:00يا ام السعد يا ام السعد<div dir="ltr" style="text-align: left;" trbidi="on"><div dir="rtl" style="text-align: right;"><strong>"يعنى ولدتي ولا هاتولدي ولا يه؟"</strong><br /></div><div dir="rtl" style="text-align: right;"><strong>"لا كنت هاولد بس الواد رجع فى كلامه"</strong><br /></div><div dir="rtl" style="text-align: right;"><strong>"ازاي يعنى؟"</strong><br /></div><div dir="rtl" style="text-align: right;"><strong>"والله انا شخصيا معرفش"</strong><br /></div><div dir="rtl" style="text-align: right;"><strong>"خلاص اشربي قرفة كتير ولبن وكلي بلح"</strong><br /></div><div dir="rtl" style="text-align: right;"><strong>"حاضر"</strong><br /></div><div dir="rtl" style="text-align: right;"><strong>"وامشي...المشي الكتير هوا اللى هايخليكي تولدي على طول"</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>دي النصايح اللى بسمعها من ساعة اللى حصل...معرفش البلح واللبن بيعملوا ايه بس اللى اعرفه ان القرفة بتخلي البابي يبقى هايبر شوية! الله اعلم.</strong><br /><strong>رحت الشغل امبارح رغم معارضة الجميع...بس رحت...وكل ما حد يشوفني يقولي "ايه ده؟ لسه؟"...طيب اجاوب بايه؟ واحد قلت له "لا خلاص بس جيت علشان وحشتوني!!!"</strong><br /><strong>انا غالبا مش هاروح الشغل تانى خلاص...دخلت لمديرتي وفهمتها الوضع وانى ممكن اعملها فى اي وقت ومش هاينفع اروح علشان الشغل بعيد عن البيت وعن المستشفى والست بصراحة كانت متفهمة وقالت لى ترجعي بالسلامة وكده. قبل ما امشي الناس كانت بتسلم عليا زي ما يكون طالعة اجاهد ومش هارجع تانى:) بس بجد فرحت انى فارقة معاهم كده بس برضه محدش رحمنى من النصااااايح الغالية...اخر نصايح بقى...قالوا لي اشرب حلبة (قديمة النصيحة دي) واجيب مشط طبي (مسمعتش عن حاجة اسمها مشط طبي قبل كده...هيا قصدها مشط طري للاطفال) علشان البابي بيطلع له في شعره قشر فأشيل القشر ده بالمشط (هوا قشر يوستفندي؟)!! وقالت لى قبل ما تأكلي ابنك استحمي كويس (!!) وانتى بتولدي بقى ادعي للمسلمين جميعا...قولي يا رب اجمع ما بين المسلمين وخليهم ايد واحدة...وادعي لاولاد المسلمين علشان بقى حالهم وحش جدا...اوووووعى تنسي الدعوتين دول!!! </strong><br /><strong>- وتاخدي معاكي ايشارب علشان لما تأكلي ابنك محدش يشوف بياكل كتير ولا قليل علشان الحسد!</strong><br /><strong> (محدش قال انى لافاش كيري وهابقى كده عادي قدام الناس)</strong><br /><strong>- لالالالا كده كده هايحصل قدام الناس مش بمزاجك...هوا انتى تقدري تقولي لحماتك مثلا اطلعي بره؟ ولا تقولي لمامتك؟ يزعلوا </strong><br /><strong>(طيب ما يزعلوا ما دي حاجة مش ادمية يعنى وبعدين مش من حق حد انه يزعل!)</strong><br /><strong>- بيتهألك!</strong><br /><br /><strong>ليه يا جماعة محدش بيدي الست اللى بتولد دي مساحة؟ ليه كله بيبقى واقف على نفسها؟ مش ممكن كده! انا من دلوقتى بفكر هاعمل ايه...مش عايزة حد يشوفني وانا تعبانه قبل العملية ومش عايزة حد يقف معايا فى اوقات محرجة زي اللى هاتحصل...لانها فعلا حاجة غير ادمية بالمرة. مش الحب والاهتمام انك تكبس على نفس اللى معاك...لو بتهتم بحد اهتم بمشاعرهم واهتم بادميتهم...وبلاش بقى الكلام بتاع "الناس تقول كده"...ما تولع الناس!!! انا مش حيوان فى الشارع ولا فى حديقة الحيوانات علشان اولد فى قفص قدام الناس!!! ايه ده؟؟؟ فعلا حاجة مستفزة جدا. وليه محدش يبقى عنده دم ويخرج من الاوضة لما يلاقوا ان الممرضة او الدكتور دخل علشان يكشفوا عليها ولا يغيروا على الجرح ولا علشان يوروها حاجة تعملها للبابي؟؟ ليه كل حاجة لازم حد تانى يكون شاهد عيان عليها؟ فعلا مش عارفة هاعمل ايه ساعتها وحاولت مع جوزي اننا نروح المستشفى من غير ما نقول لحد لغاية ما ادخل العمليات وبعدين نعرف اهالينا انى فى المستشفى...بس طبعا رفض علشان "هايزعلوا"....ما يزعلوا!!! شوية وخلاص هما يعنى هايعلقوا لنا المشنقة؟؟ وبعدين احنا مش اطفال طالعين رحلة ولازم ولي الامر معانا!! وطبعا عمر ما اي راجل هايفهم ازاي بيكون الموضوع ده مهين للست وازاي هيا بتعانى جدا منه...هوا عايز مامته ومامتها واخواتها والجيران والاقارب والاحبة يقفوا جنبه وهوا اعصابه بايظة علشان مراته صوتها جايب اسوان...طيب والست اللى بتلطم دي ماهي فى الاخر برضه بني ادمة! وتعبانه جسديا مش ناقصة كمان تعب نفسي وضغط على اعصابها!!! وايه لازمة ان حد يقعد جنبي وانا بعيط ولا بصوت ولا بشتم مثلا؟ هايعملوا لي ايه؟؟؟ كل واحدة هاتفضل تمصمص فى شفايفها وتبطبط على اي حته منى قريبة منها وخلاص وتقول "معلش استحملي"!!! حد يكلم جوزي ويقوله انى مش عايزة حد بجد!!!!</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-5889063201064664143?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com1tag:blogger.com,1999:blog-4041739309770236534.post-13846434066100209902009-11-29T15:35:00.000+02:002009-11-29T15:35:41.930+02:00لسه بدري<div dir="ltr" style="text-align: left;" trbidi="on"><div dir="rtl" style="text-align: right;"><strong>يا جماعة انا اتبهدلت!!!</strong><br /></div><div dir="rtl" style="text-align: right;"><strong>مع احترامي للمرأة وللمساواه بالرجل واهمية المرأة فى المجتمع وانها نص الدنيا كلها وان من غيرها مش هايكون في بشرية</strong><br /></div><div dir="rtl" style="text-align: right;"><strong>دكاتره النسا دول ينفعوا يشتغلوا فى المدبح...مش مع ستات !!!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>اليوم اللى قبل الوقفة رحت للدكتور (متابعة عادي) وقالي على اربع علامات للولادة...لو اي واحدة فيهم حصلت يبقى انا دخلت فى ولادة واتصل بيه على طول! نفس الليلة دي تعبت - حسيت على الساعة اتنين بالليل بوجع وقلت عادي - يمكن من العربية ولا حاجة ....على خمسة الفجر كنت بشد فى شعري!!! تعبت جداجدا وقلت خلاص ولادة....وبعدين هاتصل بالدكتور ازاي خمسة الفجر دي؟؟ حسيت ان الموضوع بيزداد سوء...فدست على نفسي وحضرت الشنطة بتاعة البابي (اخيرا) وماما ساعدتنى طبعا وحضرت الشنطة بتاعتى وبقيت Stand by ان اي وقت هوب على المستشفى وخلاص! فضلت صابرة لغاية 12 الضهر تانى يوم واتصلت بالدكتور...بمنتهى الهدوء قالي "انتى متحملة الالم؟" (كنت بعيط بالدموع من التعب - بس لسه مضربتش دماغي فى الحيط ) فقلت له اه لغاية دلوقتى متحملاه...قالي يبقى اتصلي بيا كمان ساعتين واحسبي الالم بيجي كل كام دقيقة. </strong><br /></div><div dir="rtl" style="text-align: right;"><strong>ساعتين؟؟؟؟ انا لسه هاستنى ساعتين؟؟؟ انا صابرة بقالي سبع ساعات!! المهم ساعتين عدوا زي ما عدوا واتصلت بيه تانى - قالي لا اصل ممكن الالم ده يفضل كده يومين ولا حاجة!!! اييييه؟ يومين؟ انا هافضل كده يومين؟؟؟ ليه؟؟؟ جمل؟</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>المهم فضلت على الحال ده لغاية حداشر بالليل! وجوزي اتصل بيه بقى المرة دي علشان كده استهبال! الدكتور قاله خلاص روح المستشفى وهيا لو في حالة ولادة هايتصلوا بيا! ورحت المستشفى وياريتنى ما رحت!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>اول حاجة لاي واحدة حامل احب اقولها انك مش هاتصعبي على حد خااااااالص...زيك زي اللى عنده برد! عادي يعنى! فى منك كتير وانتى مش اول ولا اخر واحدة تولد واي صويت ولا عياط ولا اي حاجة من الكلام الفاضي مش بيحوأ معاهم! المهم دخلت اوضة كده للكشف وجت واحدة (بيقولوا دكتورة بس انا اشك فى الموضوع ده) وكشفت على البهيمة اللى قدامها! انا لو شفتها فى اي يوم بتعدي الشارع هاجيبها تحت عجل العربية. معاملة غير ادمية بالمرة...بنت اللى هيا بنته بهدلتني وكانت بتتكلم كده بطريقة "انتى على فكره مدلعه" وقالت لى امشي كتير...انا عندي مشكلة فى اربطة رجلي ولما جوزي قالها طيب هيا دلوقتى عندها تمزق فى الاربطة قالت له خلاص! هيا حره! (انا عارفة ان السؤال ملوش اجابة اوي...بس مش بالاسلوب الرخم ده تكون الاجابة)</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>المهم فى الاخر قالوا لي انتى مش فى حالة ولادة اصلا....طيب يا جماعة اللى انا فيه ده ايه؟؟ لا عادي علشان اول بابي!! ولسه بدري مش قبل بكره بالليل او بعد بكره الصبح ...واتصلوا بالدكتور وقالهم يدولي حقنتين مسكن الام!!!! وقالت لى كل ما تحسي انك تعبانه خدي بانادول!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>المهم تانى وتالت يوم كان فى اعراض تانية للولادة برضه غير الالم ولما اتصل بالدكتور يقولي لسه !</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>النهاردة تالت يوم العيد و "لسه" برضه...بس الجديد انى مش حاسة باي حاجة خالص :) شكل الواد كان بيهزر معايا! بصراحة مكسوفة من الدكتور مش عارفة بعد كل التليفونات اللى قرفته بيها وفي الاخر مش هاولد دلوقتى دي هافسرها ازاي! </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>وفي سؤال تانى مهم ... المفروض هاروح الشغل بعد بكره - اروح ولا مرحتش؟ طبعا الاجابة المنطقية انى مرحش بس يا ترى هاجيب اجازات منين؟ طيب لو فضلت كده مثلا اسبوعين كمان...حد فى الشغل هايصدق انى فعلا كنت تعبانه ومش بستهبل؟ طيب اخد اجازة بدون مرتب اسبوعين مثلا؟ ما انا لو خدتهم دلوقتى مش هاخد اجر اجازة الوضع بالكامل! وقصة وفيلم وحدوته علشان اعمل اقرار عودة وبعدين اعمل اجازة وضع. </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>ممكن حد يقولي اعمل ايه؟ علشان فعلا مش عارفة ومتضايقة اوي!!!</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1384643406610020990?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com2tag:blogger.com,1999:blog-4041739309770236534.post-79785330321886361602009-11-25T17:02:00.001+02:002009-11-25T17:03:01.973+02:00ياللا شدي حيلك واولدي بقى<div dir="ltr" style="text-align: left;" trbidi="on"><div dir="rtl" style="text-align: right;"><strong>"ها ولدتي؟" </strong><br /></div><div dir="rtl" style="text-align: right;"><strong>"لا لسه!"</strong><br /></div><div dir="rtl" style="text-align: right;"><strong>"ما تولدي وتخلصي بقى"</strong><br /></div><div dir="rtl" style="text-align: right;"><strong>"حاضر من عيني بس كده؟ هاعلي النار شوية علشان يستوى بسرعة"</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>ده اول حوار فى اي مكالمة تليفون! يعنى هوا انا هاخلله جوا؟ هاسيبه للاعدادية؟ لما اولد الناس هاتعرف - خلاص بقى! وبعدين حتى لو ولدت فعلا هايعملوا لي ايه يعنى؟ هايقولوا لي مبروك وعقبال ما تخاويه! وتبدأ فصول مأساه تانية مع الناس وهي "انت ناوية تانى امتى؟" - زي ما يكون الحمل والولادة زي طالعة مارينا فى الصيف كده!!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>ولما حد يقابلني وجها لوجه الايام دي بيكون الحديث كالتالي:</strong><br /></div><div dir="rtl" style="text-align: right;"><strong>"كل سنة وانتى طيبة"</strong><br /></div><div dir="rtl" style="text-align: right;"><strong>"وانتي طيبة"</strong><br /></div><div dir="rtl" style="text-align: right;"><strong>"السنة اللى جاية يبقى ابنك على كتفك"</strong><br /></div><div dir="rtl" style="text-align: right;"><strong>"انشاء الله"</strong><br /></div><div dir="rtl" style="text-align: right;"><strong>"او واحد على كتفك وواحد جوا"</strong><br /></div><div dir="rtl" style="text-align: right;"><strong>"..."</strong><br /></div><div dir="rtl" style="text-align: right;"><strong>"ولا انتى مش ناوية تاني؟ اصلها موضة اليومين دول الواحدة تخلف مرة واحدة بس!!"</strong><br /></div><div dir="rtl" style="text-align: right;"><strong>"والله لما يبقى الاول يجي بس وكله بتاع ربنا"</strong><br /></div><div dir="rtl" style="text-align: right;"><strong>"لاااااا بس اوعى توحديه فى الدنيا حرام! ربنا يسئلك على كده"</strong><br /></div><div dir="rtl" style="text-align: right;"><strong>"كله رزق"</strong><br /></div><div dir="rtl" style="text-align: right;"><strong>"ما طبعا يا حبيبتي كله رزق هوا حد قال حاجة؟ بس برضه يعنى متمنعيش انتى خليها على ربنا"</strong><br /></div><div dir="rtl" style="text-align: right;"><strong>"..." دموعى بتلمع فى عيني من كتر الغيظ ولسانى السليط هايفطس ويرد بس بحاول جاهدة انى افضل ساكته!!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>هيا بقى الناس كده! محدش بيعجبه حاجة ومحدش بيسكت وخلاص غير قليل جدا. يعنى مثلا ناخدها كده خطوة خطوة من ايام المدرسة (ايوه المدرسة) من اعدادي يبدأ سؤال "علمي ولا ادبي"...وتيجي الثانوية العامة ويبدا سؤال "كلية ايه؟" ولما تيجي الكلية "ناوي على ايه بعد الجامعة؟" ولما نتخرج "ها ناوي تقدم فى شغل ايه ولا تكمل دراسات عليا؟" ولما يجي الشغل "ياللا بقى شوف لك عروسة (ولو بنت يتقال لها شدي حيلك!!!!!)" وبعد ما تشد حيلها ويجي ابن الحلال يتقالها "ها وامتى بقى الفرح؟" ويجي الفرح ويبدا السؤال الابدي الممل "اييييه مفيش حاجة فى السكة؟؟؟" وكلام زي "عايزين نفرح بيكي" "ياللا بقى هاتي لك حته عيل كده يملى عليكوا البيت" ولما تبقى المسكينة فعلا حامل يتقالها "امتى تولدي" ولما تولد "سنن ولا لسه؟ طلع له كام سنة؟" ولما يطلع له اسنان "ها مشي ولا لسه؟" ولما يمشي </strong><strong> "امتى تفطمي" ولما تفطم "لسه بيلبس بامبرز ولا اتعود خلاص من غيره؟" ولما يتفطم من البامبرز يتقال </strong><strong>"امتى تحملي تانى" ولما تحمل تانى "ناوية كمان مرة و لا خلاص كده؟ انا رايي ان تلاته كويس علشان لما حد فيهم يتجوز متلاقيش نفسك لوحدك" ولما يحصل او مايحصلش يبدا الحوار بتاع "هايدخل حضانة؟ ولا هاتاخدي اجازة من الشغل؟ حرام عليكي تسيبي العيل كده فى الحضانة يجيله امراض" ولما يكبر ويبقى في سن المدرسة "لغات ولا عربي؟ خاص ولا حكومي" ............الخخخ...كفااااية بجد! تدخل الناس المميت فى حياة بعض بقى غير عادي وبقى سخيف جدا ولا يطاق!!! انا لو فضلت اكتب الكلام الفاشل اللى بيتقال فى جميع المناسبات لجميع الناس الكي بورد هاتدوب تحت ايدي!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>يا ريت نرحم بعض شوية ويا ريت اللى بيقرا البتاعة دي ويعرفني يبطل يقولي "ياللا شدي حيلك" !!!</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-7978533032188636160?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com3tag:blogger.com,1999:blog-4041739309770236534.post-90107254726863458682009-11-25T00:49:00.001+02:002009-11-25T00:49:26.122+02:00السنة اللى جاية اشوفك فى بيت العدل<div dir="ltr" style="text-align: left;" trbidi="on"><div dir="rtl" style="text-align: right;"><strong>كل سنة وانتوا طيبين </strong><br /></div><div dir="rtl" style="text-align: right;"><strong>انا بقالي فترة مش بكتب لانى مكنتش فاضية بصراحة - كنت اخيرا اخيرا اخيرا فى بيتي!!! احساس رائع بجد انى افضل فى بيتي كذا يوم ورا بعض (بما ان ده غير متاح ليا من فترة يعنى )</strong><br /></div><div dir="rtl" style="text-align: right;"><strong>المهم...</strong><br /></div><div dir="rtl" style="text-align: right;"><strong>من يومين تقريبا كنت فى الشغل ودخلت الاسانسير وقابلت واحد من ادارة تانية - قالي كل سنة وانتى طيبة وانشاء الله السنة اللى جاية تبقى فى بيت العدل!!!! عدل؟؟!! انا ؟؟؟ ليه؟ عدل اكتر من كده يبقى افترا!! المهم قلت له الحقيقة انى حامل فى التاسع! قالي مخدتش بالي!!!</strong><br /></div><div dir="rtl" style="text-align: right;"><strong>وانت طيب والسنة اللى جاية نبقى على عرفات!</strong><br /></div><div dir="rtl" style="text-align: right;"><strong><br /></strong><br /></div><div dir="rtl" style="text-align: right;"><strong>رحت ابص على البابي كده اخباره ايه - برضه متأكدتش هوا ولد ولا بنت...اصلي حلمت انه بنت! ولما بروح للدكتور مش بيقولي ولد ولا بنت ....انا رحت مرة واحدة بس فى الشهر الخامس اشوف ولد ولا بنت وطلع واد...بس برضه قلبي مش مطمن!</strong><br /></div><div dir="rtl" style="text-align: right;"><strong>بس حتى لو بنت...هاعمل ايه؟ ولا حاجة...البنات حلوين برضه جدا على الاقل الاقي حاجة ادلع فيها واسرح فى شعرها!</strong><br /></div><div dir="rtl" style="text-align: right;"><strong></strong> </div><div dir="rtl" style="text-align: right;"><strong>معظم الكلام حاليا بيدور كالاتي:</strong></div><div dir="rtl" style="text-align: right;"><strong>"هيا كلها اسبوعين "</strong></div><div dir="rtl" style="text-align: right;"><strong>"لا لا اسبوع بالكتير"</strong></div><div dir="rtl" style="text-align: right;"><strong>"لا هما من اسبوعين لتلات اسابيع"</strong><br /></div><div dir="rtl" style="text-align: right;"><strong>فانا اقول علشان انهي الحوار ده "يا جماعة كله فى ميعاده! انا مش مستعجلة!" فيبدا حوار تانى خالص عن تعب العملية والولادة وقبل واثناء وبعد والخ الخ الخ...انا تعبت نفسيا من دلوقتى من موضوع الولادة ده لانى كمان مش عارفة انا داخلة على ايه بالظبط!!</strong><br /></div><div dir="rtl" style="text-align: right;"><strong><br /></strong><br /><strong>الهاجس المسيطر عليا الايام دي (اصل انا كل فترة بهسهس شكل) ان البابي اللى جاي ده هايفرق بيني وبين جوزي مش هايقرب بينا زي ما الناس فاكرة! اصل انا انانية شوية ... محبش ان جوزي مثلا يهتم بحاجة او حد اكتر منى...فلو جه البابي ولقيته اهتم بيه اكتر منى ممكن اقعد علي الواد افطسه!! زي مثلا محبش انى اكون قاعدة معاه وبتكلم وهوا يرد عليا من باب انه يسكتنى وفي حين انه مركز مع حاجة فى التليفزيون! بحس ان نفسي فى طوبة احدفها على الشاشة علشان يبقى معايا!</strong><br /><strong><br /></strong><br /><strong>وحشة انا صح؟ بس انا بقى كده ومعرفش هاتغير ولا لا لما يجي "الواد"...معظم اصحابي بيقولوا لي ان اول ما يجي البابي مش هاعبر جوزي خالص وهايبقى ابني هوا اللى واخد كل عقلي ووقتى ومجهودي ومش هافكر اصلا جوزي عايز ايه! بس ماظنش هاعمل كده...واحدة صاحبتى تانية بس هيا بصراحة واقعية وانا بحب اسلوبها اوي بتقولي ان في واحدة معرفتها قالت لها انتى اول ما تشوفي ابنك هاتلاقي شلال عواطف طالع منك! ولما جه ابنها فعلا وبصت له...محستش زي ما قالت صاحبتها!! بس كانت اه طبعا بتحبه بس اول طله دي مأثرتش اوي معاها...انا حاسة انى هابقى كده برضه...اصلي مش حاسة بحاجة دلوقتى ...مفيش مشاعر امومة يعنى مسيطرة عليا حاليا ومش مستنية بقى بفارغ الصبر اشوف البابي والحاجات دي!!! انا نفسي اولد علشان انا تعبت من الحمل!! ربنا انشاء الله يجيبه بالسلامة وانشاء الله احبه وكله...بس مش بصحى وانام وانا بحلم بس انى ابوسه! لا!! انا بفكر دلوقتى فى جوزي اكتر معرفش ليه! خايفة البابي اللى يجي يعمل حاجز بيني وبينه!</strong><br /><strong><br /></strong><br /><strong><br /></strong><br /><strong><br /></strong><br /><strong><br /></strong><br /><strong><br /></strong><br /><strong><br /></strong><br /><strong><br /></strong><br /><strong><br /></strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-9010725472686345868?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-30512068455980323862009-11-18T13:42:00.000+02:002009-11-18T13:42:52.859+02:00على الله يتمر بس<div dir="ltr" style="text-align: left;" trbidi="on"><div dir="rtl" style="text-align: right;"><strong>خرجت امبارح مع واحدة صاحبتى اوي - ورجعت من بره فى منتهى الانشكاح بصراحة! اصل بقالي كتير مخرجتش مع حد من اصحابي...وقلت بالمرة اتمشى شوية بما انى دخلت فى التاسع. وكلت برجر وبيبسي (خروجه بقى وكل حاجة مباحة حتى الممنوع ومنعت نفسي انى احس بالذنب - انا خارجة انبسط!) واتمشينا شوية. يا سلاااااااااام احساس الواحد وهوا بيجر عربية عفش وراه احساس غريب اوي! بقالي كتير مخرجتش واتمشيت كده...حسيت فعلا انى حامل فى طوب وزلط! تقل رهيب...بس المهم انى اتبسطت</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>رجعت البيت مبسوطة وحالتي النفسية كويسة الحمد لله - اصل الحامل بيجيلها نوبات اكتئاب كتير جدا - وسمعت ان اللى لسه والدة بيجيلها اكتئاب اكتر (ربنا يستر). انا شخصيا مريت بفترات الاحباط والاكتئاب دي...وطلعت كله فى وش جوزي (اصل هاطلع الكئابه على مين غيره؟ مش هوا السبب فى اللى انا فيه ولا ايه؟!) في اول الحمل خالص كنت بتضايق من اهيف حاجة واتعصب على كل حاجة ومش عاجبني حاجة خالص! اعتراض لمجرد الاعتراض...الموود بيتغير بسرعة جدا...فى ثانية اقلب وابقى عصبية ومتضايقة ومش عاجبني حاجة والدنيا سوداااا...بعد ما كنت عادية اوي وبضحك! شغل جنان! وبعدين بيجي نوبات عياط كتير! برضه من غير سبب! اهو نكد والسلام.</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>في الفترة الاخيرة العياط برضه شغال معايا لسه ... بس على طول عندي خوف ان حد يموت وكنت بدعي كتير انى اموت الاول او اموت وانا بولد (انا عارفة ان ده حرام بس كان غصب عنى وانا فى وسط نوبة العياط دي بفضل ادعي ان محدش يموت قبلي) زي ما يكون اللى يموت الاول هاياخد الكاس!! المهم...لو في حد بيقرا البتاعة دي ومراته حامل وعصبية عليه و متضايقة ومش طايقة حاجة فى الدنيا...اعذرها لانه فعلا غصب عنها.</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>التغيرات فى الشكل والحجم واللون بتعمل شغل عالي اوي فى تغير الموود خصوصا طبعا فى الاخر لما يبدا اللون يختلف! الكلف ده من الحاجات اللى بتضايق برضه! والكلف ده للى مش عارف هوا تغير فى لون الجلد وبيكون زي بقع سمرا واغمق من اللون العادي وبتطلع فى الرقبة واماكن تانية متفرقة. ومش كل الحوامل بيحصلها كده. المهم غلطت وبصيت فى المرايه (اصلي بتجنب اختراع المرايه ده من فترة علشان الحالة النفسية برضه) ولقيت ان رقبتي زي ما يكون مش نضيفة! فهمت ان الكلف جالي برضه...الحمد لله مفيش حاجة مجربتهاش!! بس شكله سخيف جدا زي ما يكون لابسة سلسلة فالصو وصدت على رقبتي! وعلى فكره ملوش حل - هوا كله هايطلع فى الغسيل بعد الولادة انشاء الله! </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>ما علينا </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>يا جماعة انا لاحظت حاجة غريبة اوي - لبس الاطفال غاااااااااالي جدا! ليه؟ ده كله ربع متر قماش! وبيكون اغلى من لبس الكبار. واختراعات بقى...بنطلون تحت الهدوم - فنلات بكم ونص وكت - سالوبيت تحت السالوبيت بتاع الخروج - جاكيت للخروج - بطانية خروج و بطانية للبيت - كوفرتة خروج وواحدة للبيت - شراب - زعبوط - ايس كاب (متهيالي زي الزعبوط كده) - بافيتات احجام منها الصغير والكبير واللى بيتلبس زي جاكيت بالعكس وفي بافيتات بلاستيك! - رباط للبطن - فوط صغيرة علشان لما يقشط - فوط ناعمة علشان لما يستحمى - بشكير اطفال ....وحاجات تانية كتيييييييير.</strong><br /></div><div dir="rtl" style="text-align: right;"><strong>ده غير الحاجات التانية زي</strong><br /></div><div dir="rtl" style="text-align: right;"><strong>ترمومتر اطفال ديجيتال! - شامبو اطفال - لوشن - بابي اويل - بلسم (مش عارفة هايعمل ايه بالبلسم فى السن ده) - بارفان اطفال (ناقص يعملوا له افتر شيف) - سافنجة يستحمى بيها - بابي كريم - زنك كريم - كباية للمياه ببوز طري - واحدة ببوز ناشف - بودرة تلك (وترجع الناس تقول البودرة غلط) - و"وايبس" مناديل مبللة يعني - وتيتينه (علشان اول ما يفتح في الزن اسكته بيها وفي ناس تانية بتعمل حركة غريبة اوي - بتحشر الاكل فى بؤ الطفل من هنا ووراه على طول التيتينه علشان يبلع!! وله فى ذلك حكم) - ببرونات كبيرة وصغيرة وبلاستيك وازاز - معلقة بلاستك طري زي الكاوتش شوية - عضاضة (من دلوقتى؟؟) - فرشاه ناعمة للشعر ومشط (المشط لازمته ايه انا مش عارفة بجد) - دبابيس اطفال (ممكن لو حد عارف لازمتها ايه يقولي؟ علشان انا جهلة شوية ) - قصافة او مقص للضوافر (انا موافقة على دي) - وحاجات تانية كتير بالهبل مش فاكراها بقى </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>بصراحة بصراحة بصراحة - انا جبت معظم اللى قلته دلوقتى!! مع ان في حاجات انا مش مقتنعة بيها بس جبتها برضه - ولما جيت من فترة كده اشوف صرفت حوالي كام على حاجات الاستاذ جالي صدمة نفسية! بجد كتير! كتير جدا! هوا مش خسارة فيه - بس في حاجات انا استهبلت وجبتها وملهاش لازمة اساسا. مقدرش المرة دي كمان اعلق خيبتي على "كلام الناس" ... طريقة العرض والصور والوان الحاجات فى المحلات بتخلي الواحد هايتجنن ويشتري كله كله. وانا كنت من الهبل اللى طريقة العرض اثرت فيهم زيادة.</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>على الله يتمر في "الواد"!</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-3051206845598032386?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-65112376580092205772009-11-16T16:26:00.001+02:002009-11-16T16:33:21.114+02:00عين الحسود فيها خاذوق<div dir="ltr" style="text-align: left;" trbidi="on"><div dir="rtl" style="text-align: right;"><strong>"ولد ولا بنت؟"</strong><br /></div><div dir="rtl" style="text-align: right;"><strong>"ولد"</strong><br /></div><div dir="rtl" style="text-align: right;"><strong>"خلاص اوعى تقولى لحد!"</strong><br /></div><div dir="rtl" style="text-align: right;"><strong>كتير من الناس (اسفة الستات بس) كان ده رد فعلها لما قلت انى حامل فى ولد! هيا البنت مثلا ايه؟ راس ثوم؟؟ مالها البنت؟ اشمعنى يعنى الولد هوا الاملة اوي؟ ما اهلى فرحوا بيا عادي ولما جت اختى مزعلوش انها بنت ومش ولد - ولما مجابوش ولاد مكانتش فارقة معاهم اي حاجة خالص!</strong><br /><br /><strong>في ناس كتير اوي بتخاف من الحسد بطريقة مبالغ فيها - انا شخصيا اعتقد ان ده قلة ايمان - وبعدين تيجي تناقشهم فى الموضوع ده يقولوا "العين فلقت الحجر" - جميل جدا الكلام ده بس مستحيل كل ما واحد يجيله مثلا عشرة جنيه زيادة يخاف من عين الناس!! معظم الناس دلوقتى بتتعامل من المنطلق ده...فلان عينه وحشة - فلان عينه صفرا...فلان عينه مدورة...فلان سره باتع وهكذا! </strong><br /><strong>بصراحة بصراحة - انا تعرضت لمواقف كتير كان تفسيرها الحسد ... بس في ناس كتير (خصوصا فى المستويات الاجتماعية والتعليمية المتدنية) ماشية وحاطة الحسد ده بين عينيها وانه هايحصل فى اي وقت. المشكلة ان الحسد بيخلي الانسان مايفرحش بحاجة ولا يستمتع بحاجة فى حياته لانه معتقد دايما ان لو حد تانى عرف الحاجة دي هاتبوظ. انا معايا فى الشغل ناس كتير اوي كده.</strong><br /><strong>مثلا...لما قلت انى هاتخطب وان اتقرفت فتحتى...واحدة خدتنى على جنب وقالت لى "انتى زي اختى" (الجملة اللى بقلق منها دي) "مكنش المفروض تقولي انك هاتتخطبي" سئلت ليه؟ "قالت لى كده وحتى لما تلبسي دبلة تيجي والدبلة مش في ايدك" - لا اله الا الله ليه برضه؟ "علشان الجوازة تكمل!" - طيب يعنى اقول للناس بكره فرحي فجاه كده؟ - "انتى اصلك هبلة ومش فاهمة حاجة - داري على شمعتك تإييد"</strong><br /><strong>انا موافقة انى مقولش ان في حد متقدم لي - علشان الناس متتكلمش على انى هاتخطب والموضوع يبوظ ويبقى شكلي وحش....بس انا خلاص اتقرت الفاتحة واتفقنا على ميعاد الخطوبة...ليه بقى؟ "انتى عايزة الموضوع يبوظ ولا ايه؟"</strong><br /><br /><strong>المهم لما كنت بجهز الشقة - فعلا كان في حاجات بتحصل غريبة شوية - زي مثلا انى افتح علبة فيها كاسات والاقي كاس مكسور نصفين متساويين تماما - ومن ولا حاجة تحصل خناقة مع خطيبي - بعد ما عملنا حفلة الخطوبة انا تعبت ورحت المستشفى (الدكتور قال معنديش حاجة) وخطيبي كمان تعب جدا (صدفة احتمال)...وماما كمان تعبت (صدفة؟ معرفش)...يوم ما رجعت من شهر العسل واول يوم انزل فيه الشغل هدومى باظت من شحم معرفش جه منين! واحنا فى شهر العسل الشاليه غرق مياه وفضلنا تلات ساعات نمسح المياه دي - وعملنا حادثة - وشوية حاجات من دي.</strong><br /><br /><strong>فى ناس برضه لما تقولها "ماشاء الله حلوة دي" (على اي حاجة) تلاقيها سكتت شوية وتقول "مرسي اتفضلي" عارفين بيتاخروا ليه فى الاجابة؟؟ علشان بيقروا "قل اعوذ برب الفلق" - ده بجد على فكره مش تهريج!</strong><br /><br /><strong>وبالتالي كل ما حد يقول لحد على حاجة انها حلوة يتضايقوا؟؟؟ طيب لما اجيب لبس جديد والبسه ما طبيعي عايزة اعرف رد فعل الناس ايه...حلو؟ وحش؟ مش لاييق عليا؟ - طبيعي يعنى هاستنى تعليقات لو حتى من اقرب الناس</strong><br /><strong>الاعتقاد الزيادة ده بيبوظ فرحة الواحد باي حاجة.</strong><br /><br /><strong>ليا صديقة لااااازم تحط رقم خمسة فى اي جملة مفيدة ... لما كانت واحدة بستئلني انتى فى الشهر الكام الاقيها صاروخ بترد عنى "فى الخامس!" وانا مش فى الخامس ولا حاجة. او اي حد يسئل عن "جبتي البتاع ده بكام؟" تقول رقم فيه خمسة (75 مثلا)...ولو سئلتها حلو ده جبتيه امتى؟ هاتجاوب (الخميس اللى فات)...لازم الخميس!! على فكره والله انا فعلا مش بهزر...ده بيحصل قدامي كتير جدا. ولما تشتري حاجة تفضل يكون لونها ازرق...وهكذا...لما حد بيشوف ولادها بقى بتجنن! ما انتى مش هاينفع تحطيهم فى فاترينة فى البيت...ولو حد من اولادها جاله اي مرض او تعب شوية "هيا فلانه سلمت علي الولد النهاردة - ربنا يعفينا من عينها وشرها...هيا ليه الناس بتستكتر على الواحد النعمة ويبص لهم؟"...لا تعليق</strong><br /><strong></strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>من النصايح اللى بتتقالي دلوقتى : اوعى تحطي صور ابنك على فيس بوك! هايتحسد! اوعى تخلي حد يشوف الولد غير لما يكبر شوية لحسن يحصله حاجة وهوا صغير كده! </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>قل لن يصيبنا الا ما كتب الله لنا!</strong><br /></div><div dir="rtl" style="text-align: right;"><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-6511237658009220577?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-6888986976983864262009-11-13T12:43:00.000+02:002009-11-13T12:43:48.622+02:00بكره نقعد جنب الجيطة ونسمع الزيطة<div dir="ltr" style="text-align: left;" trbidi="on"><div dir="rtl" style="text-align: right;"><strong>"حضرتى شنطة المستشفى؟"</strong><br /><strong>"لا لسه"</strong><br /><strong>"انتى متخيلة ان البابي هايستأذن قبل ما ينزل يعنى؟ مستنية ايه ما تحضريها"</strong><br /><strong>"حاضر! بس انا مش عارفة اخد ايه معايا اصلا"</strong><br /><strong>"طيب ما تسئلي مامتك"</strong><br /><strong>"ما انا معتمدة عليها فى الموضوع ده بصراحة"</strong><br /><strong>"ومامتك ليه محضرتش الشنطة"</strong><br /><strong>"لااااااا محدش يجيب سيرة امى بقى!!!"</strong><br /><strong>اصل كل فترة ليها حوار خاص بيها - مع بعض الثوابت اللى تفلق الواحد طول الحمل كله - الفترة دي بقى فترة الشنطة والبامبرز و.... :</strong><br /><strong>- جيبي شبشب شيك للمستشفى - هاتلاقي حاجات حلوة اوي فى التوحيد والنور (هيا اللى بتخلف دي لازم تزور سيدنا التوحيد والنور فى كل حاجة؟ الفقر بيضربها ضربة قاضية ولازم تجيب من ابو اتنين جنيه ونص!)</strong><br /><strong>- اوعى تعملي شعرك فى الكوافير قبل الولادة - اصله هايتغسل فى نفس اليوم وهايبوظ (والله ما هارد)</strong><br /><strong>- خدى معاكي مشط وفرشاه وليفة وكريم ايد علشان انتى هاتولدي فى الشتا (خلاص بقى القشف هايطلع فى المستشفى بس؟ طيب اخد فلاية ولا ملوش لازمة؟)</strong><br /><strong>- خدى معاكي شراب (اعمل بيه ايه؟) برضه الدنيا بتكون برد والحامل اول ما بتولد بتحس انها متلجة (عندكوا حق اصلي هاولد فوق السطوح)</strong><br /><strong>- خدى معاكي "فانلات" للعيل كتير (وفوطة الف الواد فيها حاضر)</strong><br /><strong>- لازم فى الشنطة تاخدى جلابية (انا مش بلبس جلاليب ) انتى بتهرجي صح؟ لاااازم تلبسي جلابية! (بكره شكلها ومعنديش ولا واحدة ومش هاجيب يعنى مش هاجيب ) خلاص هاجيب لك انا واحدة هدية (ياااااااااااا رب ارحمنى)</strong><br /><strong>- خدى معاكي روب (حاضر) عندك روب حلو؟ (اه عندي) بصى انا عندي واحد والله لبسته مرة واحدة بس جاي لي من بره - خديه انا مش عايزاه (متشكرة اوي بس انا عندي والله) طيب تخيلي انا كده زعلت!!! كده؟ مش احنا اخوات برضه ولا ايه؟ (اه اخوات طبعا بس هالبس اتنين فوق بعض؟)</strong><br /><br /><strong>نخلص من حوار الشنطة ومحتواياتها (اسفة شنطتين بتوعى انا والواد) ونيجي بقى لحوار هاتعملي ايه بعد الولادة...بعد ما تروحي لمامتك مين هايبات معاكي فى الاوضة (معلش فى السؤال يعنى....وانتوا مالكوا؟)</strong><br /><strong>- لا مامتك هي اللى تبات معاكي فى الاوضة </strong><br /><strong>- ليه؟</strong><br /><strong>- علشان هيا خبرة برضه وانتى مش هاتعرفي تعملي حاجة لوحدك</strong><br /><strong>- حاجة اللى هيا ايه؟ وبعدين انا مبحبش حد يعملي حاجة وده ابني يعنى انا اللى لازم اخد بالي منه من اول يوم </strong><br /><strong>- هاهاها (ضحكة سخرية) بكره نقعد جنب الحيطة ونسمع الزيطة - بكره تقولي يا ريتني ارجع حامل تانى </strong><br /><strong>- ده ايه علاقته وبين ان حد يخدم ابني؟</strong><br /><strong>- خلاص بكره نشوف!</strong><br /><br /><strong>ليه الستات بتشمت في بعض؟ اصلي لاحظت الموضوع ده...قبل ما اتخطب في ستات متجوزة وبنات مخطوبة كانوا بيحسوا انهم متفوقين عليا علشان ليهم "بعل" وانا لا! بعد ما اتخطبت كان في ناس شمتانة انى خلاص فقدت حريتي (الله؟ مش انتوا برضه اللى كنتوا بتقولوا الست اللى من غير راجل زي الحلة اللي من غير غطا؟) ولما اتكتب كتابي كانوا فرحانين اوي انى مش هاقدر اخرج براحتى ولازم اخد اذنه (وايه يعنى؟ ما انا كنت باخد اذن بابا...ايه معنى الشماته برضه؟) ولما اتجوزت بقى كله ظهر وبان عليه الامان وفرحة رهيبة انى انضميت لطابور البائسات!!! ولما بقيت حامل بقوا فرحانين جدا ان بكرة ملاقيش وقت اسرح شعري حتى وهابقى "لافاش كيري" مهمتها الاولى انتوا فاهمينها كويس!</strong><br /><strong>وكان في جمل دايبة اتقالت كتير اوي اول ما اتجوزت </strong><br /><strong>- بتخرجي مع اصحابك؟ (مش اوي والله) هاهاهااها...مش قلنا لك!! هوا كده خلاص تتجوزي تنسي بقى ان ليكي اصحاب!!!</strong><br /><strong>- بتروحي لحماتك؟ (هيا مع اهلي فى نفس العمارة وبروح لها اكيد) بكره تقعدي عندها على طول (ليه بيتنا هايقع؟)</strong><br /><strong>- انتى قصيتي ضوافرك ليه؟ (لا ابدا بس علشان كنت بعمل اكلة وكان لازم اعجن حاجة بايدي وقلت ماينفعش وضوافري طويلة) هاهاهاهاهاها (ضحكة شماته برضه) مش قلنا لك الجواز بهدلة وانتى مكنتيش مصدقة... بكره تنسى تستحمى (!!!)</strong><br /><strong>- مالك مش عوايدك يعنى (مالي؟) اصلك مش بتهزري وتضحكى كده زي كل يوم (السيرك قافل النهاردة) انتى متخانقة مع جوزك؟؟؟ ( والجملة دي مصاحبه بفرحة ولمعان فى العين) </strong><br /><strong>- معلش هما الرجالة كده (مال الرجالة؟) نكدييين - متزعليش نفسك - الا هوا ايه اللى حصل؟؟ (انا مش متخانقة!!!) يابنتى سرك فى بييير (ايوه فعلا ... سري فى اذاعة لندن)</strong><br /><strong>- هاتطبخي ايه النهاردة؟ (مش عارفة) طيب الحقى بقى اعملي حاجة بسرعة لحسن جوزك يرجع بدري من شغله ومايلاقيش اكل (افرضوا مثلا ده حصل...ايه المشكلة؟)</strong><br /><strong>- هاتعملي ايه اخر الاسبوع؟ (لسه مش عارفة والله) يوم الجمعة نضفي الشقة كلها بقى ويوم السبت اعملي اكل الاسبوع (هاكل اكل بايت اسبوع بحاله؟؟) ايوه امال تروحي كل يوم تطبخي؟؟ </strong><br /><strong>- هاتجيبي لبس فى العيد (والله عندي لبس كتير اوي وفى حاجات لسه ملبستهاش) ماهوا كده بعد الجواز تنسي نفسك (انا مش ناسية نفسي بس عندي لبس) مكسوفة من ايه ما كلنا كده!! مش حاجة تكسفك يعنى!! (عندي هدووووم والله جديدة) يا حبيبتي متتكسفيش (!!!)</strong><br /><br /><strong>وكلمة "معلش بكره تشوفي" دي بتتقال كتير كتير كتيييييير اوي - الناس بتفرح اوي فى غيرها مع ان الموقف اصلا مش محتاج شماته ولما بقيت حامل واقول انى نفسي اولد واشوف البابي بيتقالي:</strong><br /><strong>- بكره تقولي ياريتني ما ولدت (بمزاجي اصه!)</strong><br /><strong>- بكره تقولي يوم من ايام تعب الحمل ولا يوم من قرف العيال (ماظنش!! انتوا بس نسيتوا التعب عامل ازاي)</strong><br /><strong>- بكره لما يعيط تبقى عايزة تخبطيه فى الحيطة علشان يسكت (نعم؟؟؟؟)</strong><br /><strong>ولما اقول انى مش عايزة ابني يقعد عند حد ولازم يفضل معايا انا يتقالي "بكره تقولي عيل للبيع"</strong><br /><br /><strong>مع ان نفس الناس دول اللى اول جوازي كانوا بيسئلوا "ايه مفيش حاجة فى السكة!!"</strong><br /><br /><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-688898697698386426?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-7523833971793538222009-11-12T15:01:00.000+02:002009-11-12T15:01:02.632+02:00الواد ينزل يتحط مكانه فرخة<div dir="ltr" style="text-align: left;" trbidi="on"><div dir="rtl" style="text-align: right;"><strong>"لا عادي! علشان الحمل بس"</strong><br /></div><div dir="rtl" style="text-align: right;"><strong>الجملة دي بتكون اجابة اسئلة كتير...منها "دكتور انا عندي امساك على طول على طول" والاجابة علشان حامل - زائد الكالسيوم والحديد اللى بيتاخد خلال الحمل بيعمل برضه كده! اكتشفت ان الحامل بتعانى من حاجات كتير اوي - يا رب يجعل مثوانا الجنة! المهم يجي السؤال اللى بعد كده "طيب يا دكتور فى حل لو سمحت؟ اصل كده معاناه لغاية التاسع؟؟" وتيجي الاجابة العظيمة "الملينات غلط علشان بتعمل انقباض فى الرحم" - والحل؟ - "اشربي مياه!!" طبعا مش هاتقوله ما المياه برضه مشكلة!! واعتقد انا اتكلمت في الموضوع ده من كام يوم!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>المهم معلومة لكل الناس اللى بتعانى (حامل او مش حامل) المياه مهمة اه - والالياف بس اللى بيجيب نتيجة فعالة جدا هوا التمر! انا عارفة انه موضوع بايخ جدا انى اتكلم فيه بس والله ستات كتير بتعانى ومش بتتكلم علشان محرجين! بس لا حياء فى العلم بقى! التمر رائع هوا والتين (العادي) (يا ريت لو حد نفع معاه الموضوع ده يدعي لي بليييز) </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>من برضه الحاجات ام اجابة "عادي اصلك حامل" انى اصحى الصبح على تشنج عضلي (محصلتش كتير الحمد لله) او على - طبعا - الحموضة او على تنميل فى الاطراف! التشنج العضلي حله الموز! الحموضة حلها من عند ربنا او انك تولدي!! والتنميل اقعدي شوية هوا هايروح لوحده - بسيطة مش كده؟ كله بسيط جدا بس بلاش حد يتخض وكله هايروح مع نفسه </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>من الطب الشعبي برضه فكره ان اللى تولد تفضل تضرب في مغات! "بس المغات بتخن جدا لانها اصلا معمولة بسمن كتير اوي وبتجيب حمووووضة رهيبة" - لا لازم علشان الحلبة اللى فيها!! طيب ما اسهل انى اشرب حلبة لوحدها! "لا المغات مفيدة اوي اوي اوي - انتى عايزة العيل يبقى هفتان؟" - لا ازاي؟ الواد مايبقاش هفتان وابقى انا زي الجمل (ابو سنمين مش سنم واحد)</strong><br /><br /><strong>حاليا كل الكلام اللى بيدور بيكون عن اشرب واكل ايه بعد الولادة - ما كلها شهر ولا حاجة وافقس انشاء الله ! واللى عرفته ان الحلبة مهمة بس للاسف بتفتح الشهية جدا...وبعدين من المعتقدات والفلكلور الشعبي ان الواد ينزل من هنا يتحط مكانه فرخه على طول!! وانى اكل عسل اسود كتير وحلاوة! عامة الكلام ده مش مظبوط وكلام مصاطب! اهم حاجة بعد الولادة شرب المياه والسوائل الطبيعية بانواعها والعصاير الفريش! وفاكهة وخضار علشان صحة الام كمان. وبعدين ماينفعش الوالدة دي تقعد بطه كده في البيت تضرب فى اكل وتنام وبس!! لازم حركة ولازم تمارين علشان كل حاجة ترجع زي ماكانت! ولو كسلت من الاول هايفضل شكلها زي القرع العسل على طول!</strong><br /><br /><strong>كفاية حقائق علمية بقى :) اول مرة رحت اشوف البابي فى السونار كان احساس غريب جدا...اول مرة خالص الدكتور ماشفش حاجة وقالي لازم تيجي المرة اللى جاية شاربة مياه كتير...المرة اللى بعدها رحت وشاربة كمية مياه تكفي حي بحاله! طبعا كانت ازمة بعد ما خلصت الدكتور!! المهم اول مرة هوا يشوف البابي انا مشفتش حاجة - ظهر على السونار حاجة كده لوها فاتح جوا حاجة تانية اغمق شوية!! مين ده؟ ده البابي؟ "ايوه ده الجنين" - مممممم هوا عامل كده ليه؟ (طبعا السؤال ده كان جوايا علشان الراجل مايطردنيش بره العيادة) المهم بعد كام شهر رحت اعمل سونار بره وكان البابي كبر شوية بس مكنش لسه باين ولد ولا بنت ... دخلت لوحدي...ولما ظهر على الشاشة...لقيته عامل زي الجمبري كده - صغنطوط وعامل زي حرف C بس الدكتور كان ظريف اوي بجد ولما عرف ان ده اول طفل ليا اهتم اكتر وورانى فقرات ضهره ورجله وايده وكان ساعتها البابي بيتحرك (بس انا مكنتش حاسة بحركته لسه) وفضل يحرك ايده ورجله زي الفراشة كده!! احساس غريب جدا...حسيت ان جسمي قشعر اوي ...وبعدين فتح الصوت وسمعنى نبضات قلبه!!! دمعت لما سمعتها...وحسيت انى بحبه اوي حتى من غير ما اعرف شكله ولا نوعه ولا لونه ولا اي حاجة...وحسيت بالذنب ان جوزي واقف بره ومشافش اللى انا شفته ده!! زعلت وكان نفسي يكون واقف جنبي هوا كمان يشوف ابنه! لما خرجت وقلت له اللى حصل حسيت انى زعلانة اكتر! فضلت فترة كبيرة معملش سونار ولو عملته عند الدكتور مكنتش بفهم منه حاجة ولا بشوف حاجة....وبعدين رحنا عملناه بره تانى وصممت ان جوزي يكون موجود المرة دي...كان البابي كبر شوية وعرفت انه "واد" - وبصيت على وش ابو الواد لما شاف ابنه...صعب اوصف المشاعر اللى كانت مرسومة على وشه ... وطلبت من الدكتور نسمع صوت النبض...وبرضه ورانا قلبه وهوا بينبض - ومسار الدم بلونين احمر وازرق...وجاب وشه!! بس كان بيتقلب كتير فوشه بيستخبى تانى - الدكتور قالي ابنك شقى اوي! انا معملتش السونار ال3D (ثلاثي الابعاد)...ومش هاعمله .... خلي شكله مفاجاة!</strong><br /><br /><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-752383397179353822?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com2tag:blogger.com,1999:blog-4041739309770236534.post-65149188731374391202009-11-12T01:47:00.001+02:002009-11-12T01:47:01.858+02:00لا تجيبي فستان فرح ولا تلاجة<div dir="ltr" style="text-align: left;" trbidi="on"><div dir="rtl" style="text-align: right;"><strong>"بعد الولادة هاتقعدي فين؟"</strong><br /></div><div dir="rtl" style="text-align: right;"><strong>"عند بابا وماما"</strong><br /></div><div dir="rtl" style="text-align: right;"><strong>"وجوزك؟"</strong><br /></div><div dir="rtl" style="text-align: right;"><strong>"عند اهله"</strong><br /></div><div dir="rtl" style="text-align: right;"><strong>"ليه؟؟"</strong><br /></div><div dir="rtl" style="text-align: right;"><strong>حديث طلع عليه طفيليات من كتر ما اتقالي! تفرق ايه عند ماما ولا في بيتي ولا حتى فى القمر؟ تفرق ايه مع الناس؟؟؟ اهو حشر مناخير وخلاص...عارفين لو سؤال ورديت عليه وخلاص؟ والله انا معنديش مانع بجد...بس حد يناقشني ليه وعلشان ايه واعملي كذا بدل كذا!! لا بقى!!! اي واحدة بتفقس يا بتقعد عند مامتها يا بتقعد في بيتها ومامتها تبات معاها. كلمة "ليه" دي الناس بتموت فيها. يعنى لما جيت اتجوز اتسئلت "انتى هاتقضي شهر العسل فين؟" - فى الساحل انشاء الله - "ليه مش شرم؟" </strong><br /><br /><strong>حوار شرم الشيخ ده خد مني رقات فوق رقات! "ايه ده مش هاتروحي شرم الشيخ؟؟" زي مايكون مثلا رحت احج من غير ما اطلع عرفات!! ايه علاقة شهر العسل بشرم؟ هوا يعنى كان نزل فى القران؟ (استغفر الله العظيم) وبرضه اتقالي "هوا انا معاكي ان الدنيا حر هناك اوي بالزات فى الصيف - يبقى تلحقي من دلوقتى تحجزي علشان تطلعي هناك فى الشتا - الحجز من دلوقتى بيكون فى الرخيص" - يعنى الفلوس اللى معاه نطلع بيها شهر العسل ولا نحجز بيها رحلة للشتا ولا ايه؟ ولما جه الشتا "ها هاتروحي شرم امتى؟" - لا والله مش هاروح "ايييه ده؟؟؟ معقول؟ حتى انتى مرحتيش فى شهر العسل! مش قلتي انك هاتحجزي؟" - لا الحقيقة انتوا اللى قتلوا مش انا وبعدين ربنا غفور رحيم بقى، ربنا يسامحنى فى الغلط ده فى حق نفسي وفي حق جوزي!!!</strong><br /><strong>اتسئلت برضه "وهاتروحي فندق ايه فى السحال؟ عايدة ولا هيلتون برج العرب؟" - لا والله اهل جوزي ليهم شاليه هناك هانروحه!! "ايه ده؟ مش هاتنزلي فى فندق؟ يعنى حتى فى الهاني موون تطبخى وتغسلي وتروقي؟؟" - اولا انا مش هاطلع شايلة بصل وخيار وبطاطس وفراخ متبلة ولحمة مجمدة! وحتى لو انا كنت ناوية اعمل كده جوزي مش هايرضى لاننا مش طالعين مخيم! وبعدين اروق ايه وانضف ايه؟ احنا مش طالع معانا عيال!! وبعدين الغسيل...ما في غسالة انا مش هاخد الغسيل فمين يعنى فى الطشط!!! - "بس حقك كنتى برضه حجزتي فى فندق!!" - ما احنا قلنا بدل ما ندفع الفلوس في خمس او ست ايام فى اوتيل - نسافر بيهم فترة اكبر - "انتى هاتوفري له من دلوقتى؟؟" - ياااا رب يا تاخدنى يا تاخدهم وترحمنى!</strong><br /><br /><strong>اتقالي من ضمن الحاجات برضه انى اخد معايا جاكيت! انا متجوزة فى شهر اغسطس!! والساحل الشمالي مش على حدود سايبيريا! الناس تعشق الافتاء! وانا عانيت جدا من الموضوع ده في حياتى و</strong><strong>من ضمن فتاوى القهاوى اللى اتقالت كانت عند جوازي وايام الخطوبة. ستات كتير اقترحت عليا مثلا:</strong><br /><strong></strong><br /><strong>- جيبي هما تلات ملايات بس علشان هاتزهقي منهم وبعدين هاتحبي تغيري وتشتري جديد (لا تعليق)</strong><br /><strong>- اووووعى تجيبي لبس كتير – هاتتخنى بعد الجواز وكله هايترمي فى الزبالة (يعنى جوزي يقول عليا عره واهلي بخلاء؟ ما اجيب مقاس كويس وخلاص) لالالالا انسي وبعدين الموضة بتتغير...ما علينا </strong><br /><strong>- جيبي حلل الامونيا متجيبيش الاستنليس بتتحرق!! (انا بجهز بيتي مش بفتح محل كشري علشان اجيب الامونيا – وبعدين دي خطر على الصحة)</strong><br /><strong>- جيبي اطباق ميلامين لاستخدام البيت (ميلامين؟؟ هوا الشئ ده لسه حد بيستعمله؟ وبعدين ده خطر اوي على الصحة برضه) لييييه؟ ما طول عمرنا بنستعمله – عيشي عيشة اهلك!!! (يعنى لو مجبتش اطباق ميلامين وبلاستيك ابقى بتعالى عليكوا؟) سبحان الله!</strong><br /><strong>- جيبي بياضات علشان العفش مايبوظش! ( معلوماتى بتقول ان البياضات دي بتتحط فى اوضة المسافرين وعلى الكنب الاسطانبولي! محدش دلوقتى بيعمل كده وبعدين انا مش هاسكن فى الكفر!)</strong><br /><strong>- متعمليش فرح – ملوش لازمة التكاليف (انا حره) ولو عملتي اعملي حاجة صغيرة (وانتوا مالكوا؟) وبعدين ايه لازمة البوفيه الكبير؟ خلي كل واحد يجي له طبقه لغاية عنده ارخص وخليه هاي تيي high tea مفيش داعي يعنى التكاليف (يعنى بدل ما الناس تاكل اكل – هاتاكل وشنا – ودي مش خطوبة علشان الهاي تيي – ده فرح! )</strong><br /><strong>- متجبيش فستان فرح – شوفي أي حد من اصحابك ولا قرايبك وخدي فستانها علشان حرام الفلوس! اصلها كام ساعة وخلاص مش هاتلبسيه تاني! (هوا انا هاتجوز كام مرة؟ والكام ساعة دول هايفضلوا فى ذهني طول حياتى والصور هاتفضل قدامى طول العمر وبعدين انا هافرح بنفسي وجوزي كام مرة فى العمر كله؟؟) فى حاجات ماينعفش فيها الاستخسار.</strong><br /><strong>- جيبي تلاجة صغيرة – مفيش داعي للتكاليف ده هما انتوا اتنين بس؟ (طيب لما اخلف؟ اجيب الاكل يوم بيوم علشان مفيش مكان؟)</strong><br /><strong>- لما الناس تجيلك تبارك لك قدمي لهم كحك وغريبة وبيتي فور (كحك؟؟ ليه؟) ايوه كحك العروسة ده مهم جدااااا (انا قلت من كام سطر فاتوا انى مش هاسكن فى الكفر ولا فى الفلاحين)</strong><br /><br /><strong>انا لسه مستنية لما اجيب الواد انشاء الله علشان اكمل فصول المسرحية...انا عارفة ان هايتقالي اعمل ايه لما يعيط ولما ياكل ولما يغير ولما يسخن (دي بقى انا عارفة انه هايتقالي حطي له جرنال على صدره)...ولما يمشي ولما ولما ولما...وبعد كده يتقالي "انتى مش هاتخلفي تانى ولا يه؟ الحقي ربي الاتنين مع بعض واخلصى واهو سنهم يبقى قريب من بعض ويبقوا اصحاب"</strong><br /><br /><strong>وزغرطي ياللى انتى مش غرمانه!! <br /></strong><br /><strong></strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-6514918873137439120?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-21307815273413507622009-11-11T14:33:00.002+02:002009-11-11T15:19:27.440+02:00ايه مفيش حاجة فى السكة؟<div dir="ltr" style="text-align: left;" trbidi="on"><div dir="rtl" style="text-align: right;"><strong>"الف مبروك...عقبال البكاري" دي الجملة اللى معظم الناس بتقولها مجاملة عند الجواز...وبعد الجواز الناس بتستنى بقى "البكاري" دي! واول ما شهر العسل يخلص الناس تبدا:</strong><br /></div><div dir="rtl" style="text-align: right;"><strong>"ها؟ مفيش حاجة في السكة؟" (الاتوبيس هايوصل متقلقوش)</strong><br /></div><div dir="rtl" style="text-align: right;"><strong>"ها؟ مفيش حاجة كده ولا كده؟" (الجمعية منزلة فراخ هايلة روحي شوفي)</strong><br /></div><div dir="rtl" style="text-align: right;"><strong>يعدى شهر واول ما يبدا التانى "ها؟ ايه الاخبار؟" (كله تمام الحمد لله) </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>الناس بتفضل تلاحق الواحد باسئلة رخمة وغبية جداااااا مستنيين "البكاري"! طيب افرضوا مثلا فعلا جت البكاري...انتوا هاتعملوا ايه؟ ولا حاجة! المهم بس يحصل ان يكون في طفل وخلاص...وبعد بالظبط تلات اربع شهور يبدا فصل جديد من الفيلم الهزلي وكل الكلام هاتلاقوه يبدا بالجملة دي "طبعا انتى زي اختى وانا بكلمك والله زي ما بكلم نفسي بالظبط" (على اساس ان واحدة هاتقعد مع نفسها قعدة صفا كده وتنصح نفسها) وهااااات يا نصايح ووصفات شعبية وخرافات ومنها (طبعا اللى ممكن يتكتب هاكتبه والباقى انتوا افهموه من بين السطور)</strong><br /></div><div dir="rtl" style="text-align: right;"><strong>- انتى بس كده ركزي (اركز ازاي يعنى؟ هوا انا داخلة الثانوية العامة؟)</strong><br /></div><div dir="rtl" style="text-align: right;"><strong>- اعملي جنب الاكل سلاطة وحطي فيها جرجير (...)</strong><br /></div><div dir="rtl" style="text-align: right;"><strong>- كارفور منزل جمبري هايل - لو مش فاضية اروح اجيبلك انا 14 كيلو كده ولا حاجة (حلاليف هاتاكل جمبري)</strong><br /></div><div dir="rtl" style="text-align: right;"><strong>- انتوا بايتين عند اهاليكوا النهاردة؟ (ايوه في حاجة؟) يعنى اصل النهاردة اخر الاسبوع ماتقعدي فى بيتك احسن (طيب ما تتفضلي معانا)</strong><br /></div><div dir="rtl" style="text-align: right;"><strong>- انا لسه جايبة عسل ابيض غذاء ملكات النحل - اجيب لك؟ (انا بستعمل زيت شعر بزيت نوعه كويس مش محتاجة اكل عسل!!!) </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>الناس ماينفعش معاها غير التناحة! الواحد يصدر الوش التنح ويعمل اهبل وعبيط ويوقع اللى قدامه فى الكلام علشان يركبه الغلط! </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>يا جماعة فى حاجة مهمة جدا ... التوتر والقلق والانتظار ان يحصل ويكون في طفل من الاسباب الاساسية والرئيسية ان مايحصلش حمل!! ده بجد مش كلام نواصي! افرضوا مثلا ان الاتنين دول مأجلين الخلفة مثلا ... لظروف فى حياتهم او مستنيين ينقلوا شقة تانية او ان الراجل يلاقي وظيفة افضل علشان يعرف يعيش ابنه فى ظروف احسن... كل واحد عارف ظروفه ايه ودي حاجات شخصية جدا ماينفعش تتناقش مع حد! والضغط ده ممكن يخليهم يغيروا رأيهم علشان "الناس تفرح بينا" وبعدين يجي الطفل والظروف مش مناسبة ليه..ويحصل مشاكل ومشادات وممكن فى لحظة يحسوا ان الطفل ده عبئ عليهم مش زرق جاي لهم. سيبوا الناس فى حالها بقى!!!</strong><br /></div><div dir="rtl" style="text-align: right;"><strong> الضغط على الزوجين غالبا بيكون من ناحية الاهل...كلام الاهل بيكون ليه اثر قوي جدا والجمل المستهلكة بتتقال برضه:</strong><br /></div><div dir="rtl" style="text-align: right;"><strong>- نفسي افرح باولادكوا قبل ما اموت (يا ستى ربنا يديلك طولة العمر والصحة وتربي اولادنا كمان) لا عمر ايه وصحة ايه؟ ما خلاص بقى!! هوا اللى جاي اد اللي راح؟!</strong><br /></div><div dir="rtl" style="text-align: right;"><strong>- دي فلانه بنت فلان خلفت ماشاء الله...عقبال ما افرح بعوضك! (كله زرق الحمد لله) ايوه بس برضه الطب اخترعوه ليه؟ (وهنا تيجي الخطوة اللى جاية)</strong><br /></div><div dir="rtl" style="text-align: right;"><strong>- خد هات الدوا ده - "ايه ده؟ انتى عيانه يا ماما؟؟؟؟" - لا يا حبيبي ده ليك انت - "ليه ؟" - يعنى شوية فيتامينات كده تقويك!!!!! (...) </strong><br /></div><div dir="rtl" style="text-align: right;"><strong>- ما تروح تحلل (جملة وش كده من غير مقدمات ولا مؤخرات ولا استئذان) - ليه يا ماما؟ - يعنى يا حبيبي برضه العلم تقدم وتطمن بالمرة - بس مفيش فى عيلتنا حد جاله السكر احلل ليه؟ (برضه الوش التنح بينفع مع الاهل على فكره)</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>انا شفت ناس كتير من اصحابي بيعانوا من الموضوع ده - وبعدين بعد الضغط من الاهل والاصدقاء الاحبةوطنط سوسن من طنطا - الزوج يحلل ويطلع انه "صاغ سليم" والحمد لله - نقلب بقى على البنت الغلبانة بنت ال.... "هيا السبب" وبعد ما كان الكلام على استحياء(طبعا ام الراجل هيا اللى بتتكلم) دلوقتى الكلام بالساطور:</strong><br /></div><div dir="rtl" style="text-align: right;"><strong>- ما تروحي يا حبيبتي كده تكشفي ولا حاجة (...) غالبا بتكون البنت هاتموت وتعيط بس كبريائها مانعها</strong><br /></div><div dir="rtl" style="text-align: right;"><strong>- انتى مابتكليش ليه؟ ما طبعا انتى عايزة يعنى تحملي وانتى ضعيفة كده؟؟ ما انتى لو كنتى بتاكلي كويس كان زمان ابنك على كتفك</strong><br /></div><div dir="rtl" style="text-align: right;"><strong>- بطلي تشربي قهوة وشاي كتير...(ده مصاحب مع مصمصة الشفايف - مع ان القهوة والشاي اصلا ملهمش علاقة بحاجة فى الحياه غير الصداع والضغط الدم)</strong><br /></div><div dir="rtl" style="text-align: right;"><strong>بعد فترة يبدا الراجل هوا كمان يقلب على مراته الغلبانه ويبقى هوا كمان مستعجل انها تبقى حامل (الزن على الودان امر من السحر) وان كانت الست الحاجة بتقول كده فى وشها - تخيلوا انتوا الكلام اللى من ورا ضهرها. المهم تلاقي ان الحماة دي بتصلي وبتصوم وبتقرا قران واحتمال كمان تكون بتحفظة بس "دي نقرة ودي نقرة اخرى" محدش بقى بيقول ان ده رزق من ربنا وكل واحد مكتوب له رزقه بميعاد معين...لا هيا عايزة "افرح بيك قبل ما اموت" وخلاص!!</strong><br /><br /><strong>نيجي بقى للاحتمال التانى وهوا لو كان الراجل حلل وطلع فعلا هوا السبب...هاتلاقي والدته بتكرر كلام كتير زي "كل شئ نصيب وكل حاجة بميعاد" وتبدا فى سرد قصص عن المشاركة والشعور بالطرف الاخر وان كل شئ بايد ربنا. فى كلا الحالتين شعور الزوجين اتجاه بعض بيضطرب جدا خصوصا الراجل بيحس ان كل ده فى وشه هوا والمجتمع اللى احنا فيه دايما بيجي على الراجل فى النقطة دي...لانه لو السبب منه الناس بتفسرها حاجة تانية ولو مش هوا السبب "طيب ما تتجوز تانى" على اساس ان الست مهمتها فى الحياة زي الجاموسة العشر بالظبط!!.. موضوع الزن على الخلفة ده برضه بؤدي الي ان المسافة بتكبر بين الطرفين والشعور بالجفاء بيزيد حتى لو ظاهريا مفيش اختلاف عن الاول - بس بيكون في حاجة اتكسرت فيهم وفي علاقتهم...وكل ده بسبب "اشوف عدلك يا رب"</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>حسبي الله ونعم الوكيل!</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-2130781527341350762?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-48856585543702423892009-11-11T01:14:00.000+02:002009-11-11T01:14:52.038+02:00مناخيرك اد الكوز<div dir="ltr" style="text-align: left;" trbidi="on"><div dir="rtl" style="text-align: right;"><strong>غلطت النهاردة واتفرجت على صور فرحي!! ده انا؟؟ احتمال</strong><br /></div><div dir="rtl" style="text-align: right;"><strong>"ده زمان انا كنت قمر" الجملة دي بسمعها من ناس فوق الخمسين - بس تقولها واحدة مجابتش التلاتين ا؟!...صعبت على نفسي بصراحة. عامة انا عايشة على امل ان كله هايطلع فى الغسيل (بعد الولادة انشاء الله ربنا يسهل كده واشوف لي دكتور تجميل)</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>النهاردة قابلتنى واحدة جارة ماما ومخدتش بالها ان ده انا...بصت ومشيت وبعدين رجعت تانى...وقالت لى "انا معرفتكيش اول مرة" مخدتهاش فى نفسي ولا اي حاجة ...عادي نيو لووك!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>النهاردة كان يوم حافل بالاحداث...السخيفة!! فى المكتب الناس مصممين ان مفيش تكييف يتفتح </strong><br /></div><div dir="rtl" style="text-align: right;"><strong>- "طيب يا جماعة الدنيا حر"</strong><br /></div><div dir="rtl" style="text-align: right;"><strong> - لا انتى بس اللى حرانة علشان حامل </strong><br /></div><div dir="rtl" style="text-align: right;"><strong>- "طيب نفتحه شوية وبعدين نقفله؟ بس الدنيا متبقاش حر كده" </strong><br /></div><div dir="rtl" style="text-align: right;"><strong>- انتى هاتولدي امتى بقى؟ وبعدين مش ممكن علشان كده هاناخد برد... معلش استحملي شوية!!!</strong><br /></div><div dir="rtl" style="text-align: right;"><strong> - برد ايه فى الجو ده؟</strong><br /></div><div dir="rtl" style="text-align: right;"><strong> - بصى من تعليمات الوقاية من انفلونزا الخنازير ان التهوية تكون عن طريق الشباك مش التكيف!</strong><br /></div><div dir="rtl" style="text-align: right;"><strong>وقضيت باقي اليوم هاموت من الحر وبالتالي باورم اكتر وبتنرفز اكتر!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>الحامل على فكره بتحس بالحر بشكل غريب حتى لو الدنيا مش حر ولا حاجة! يعنى جوزي من كام يوم كان تقريبا لونه بدأ يقلب على ازرق فى بنفسجي من التكيف وانا عادي ولا حاجة! بس بصراحة صعب عليا فى الاخر وقلت اضحى شوية واقفله واخلي الشباك كفايه...برضه احساس الامومة بيخلي الواحد قلبه يرق!! (ال يعنى) </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>فى نص النهار كنت مستنية الاسانسير وواحدة جت وقفت هيا كمان...نعرف بعض بالشكل كده بس بحكم اننا فى شغل واحد بس معرلفهاش شخصيا. فسئلتنى:</strong><br /></div><div dir="rtl" style="text-align: right;"><strong>- "هوا انتى حامل؟" (السؤال ده لو خدت عليه جنيه فى كل مرة استئله - هاجيب تمن الولادة)</strong><br /></div><div dir="rtl" style="text-align: right;"><strong>- "اه حامل"</strong><br /></div><div dir="rtl" style="text-align: right;"><strong>- "في الشهر الكام؟"</strong><br /></div><div dir="rtl" style="text-align: right;"><strong>-"التامن"</strong><br /></div><div dir="rtl" style="text-align: right;"><strong>- "اصل باين على وشك"</strong><br /></div><div dir="rtl" style="text-align: right;"><strong>- "على وشي بس؟؟؟ كل ده مش باين؟" </strong><br /></div><div dir="rtl" style="text-align: right;"><strong>- "ولد مش كده؟"</strong><br /></div><div dir="rtl" style="text-align: right;"><strong>- "ايوه فعلا"</strong><br /></div><div dir="rtl" style="text-align: right;"><strong>- "باين من مناخيرك" (هوا كل الناس بتعلق على مناخيري ليه؟ امال لو كانت اصلا كبيرة كانت هاتغطي على عيني؟؟"</strong><br /></div><div dir="rtl" style="text-align: right;"><strong>- "..." ابتسامة علشان مش عارفة اقول ايه ... وتقريبا الابتسامة دي كانت دعوة انها تقول اللى في نفسها كله ...هيا بقى صاروخ كلام وانا كنت تقريبا مش لاقية فاصل اعلانى علشان ارد فى النص</strong><br /></div><div dir="rtl" style="text-align: right;"><strong>- اصل انا جوزي دكتور نسا... انا لسه طالعة من ولادة من شهرين (معلش ايه اللى جايبك الشغل؟ المفروض ليكي تلات شهور اجازة وضع قانونا...ساعتها خدت الكلام مسلم بيه وخلاص بس لما بسترجع الكلام بكتشف انها كانت بتفسحنى) انتى اول بابي ليكي؟ لا متخافيش بعد اول بابي كله بيروح عادي - التانى هوا اللى بيبدا بقى يسيب اثاره فى الجسم - بصي انا عندي بطن من تانى حمل مش من اول واحد...وبعدين اصل الواحد بيكسل يعمل تمارين. جوزي بقى لما بيشوفني وانا حامل بيفضل يقولي انا زهقت اوي من المنظر ده - اصل مش ممكن طول النهاردة فى العيادة وكمان ارجع بالليل الاقي الشكل ده قدامى هاهاهاها ... وبعدين قلت له هوا يعنى علشان بتكشف عليا ببلاش هاهاهاها (هيا بتضحك مع نفسها بس مرضتش انكد عليها صفو اللحظة فسبتها وكنت بضحك على ضحكها بصراحة) بس عارفة علشان جوزي دكتور بقى فعادي جدا بالنسبة له اي تعب مثلا امر بيه - اصله شاف كتير هاهاهااها</strong><br /></div><div dir="rtl" style="text-align: right;"><strong>والحمد لله الاسانسير جه وكان جواه راجل فهيا مكملتش ضحك!!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>دخلت لمديرتي النهاردة وبرضه كان نفس الحوار الحمضان بتاع "مناخيرك اد الكوز وهاتولدي امتى واسم الواد ايه ...الخ الخ الخ" المهم فى الاخر طلبت منى ادعي لها وانا بولد. على فكره ناس كتير اوي بتطلب منى الطلب ده وانا فاكرة قبل كده كنت بطلب برضه من اصحابي يدعولي وهما بيولدوا ولما بشوفهم بعد كده واسئلهم افتكرتوا "يقولوا لي بصراحة لا! الموقف بيكون مش عادي خالص ومش بنفتكر حتى ندعي لنفسنا ولا للبابي"!! انا فعلا نفسي اكتب ورقة بالناس اللى بتوصيني ادعيلها فى الوقت ده...بس ياترى ممكن يدخلوني بورقة الاوضة؟ بس شكلها هايبقى بايخ اوي مش كده؟ </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>امبارح كنت بتكلم مع واحدة صاحبتي وكنت بقولها انى بقيت زي الترابيزة ومتضايقة من شكلي وخايفة بعد كده منزلش خالص...بتقولي لالالا عادي خالص...هوا كل بابي كده تشيلي له عشرة كيلو! قلت لها يعنى ايه عشره كيلو؟ قالت لى يعنى تزيدي عن وزنك الطبيعي عشرة كيلو فى كل طفل. يعنى لو خلفت تلات اطفال ازيد تلاتين كيلو؟ قالت لى بكل بساطة "اة! عادي" على كده محدش يستغرب من ان كل راجل بيكره يروح البيت ولا "الخرس الزوجي" اللى بنقرا عنه كتير ولا يستغرب ان واحد تبقى عينه فارغة او يعاكس فى الشارع ... ما في البيت فى غفير مستنيه - يعنى لا بره ولا جوا؟ ما الراجل بشر برضه!! طبعا ده مش مبرر للي بيحصل بس مجرد تفسير!</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>حد عايز يكثب ثواب؟؟ اللى يعرف دكتور تجميل كويس يقولي</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-4885658554370242389?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-38693194984318115672009-11-10T16:54:00.004+02:002009-11-11T00:47:22.543+02:00اصلي لامؤاخذة حامل<div dir="ltr" style="text-align: left;" trbidi="on"><div dir="rtl" style="text-align: right;"><strong><span style="font-family: inherit;">- "هاتولدي طبيعي ولا سيزيريان؟"</span></strong><br /></div><div dir="rtl" style="text-align: right;"><strong><span style="font-family: inherit;">- لسه والله مش عارفة</span></strong><br /></div><div dir="rtl" style="text-align: right;"><strong><span style="font-family: inherit;">- "ايه ده؟ هوا الدكتور مقالش؟"</span></strong><br /></div><div dir="rtl" style="text-align: right;"><strong><span style="font-family: inherit;">- ولا جاب سيرة</span></strong><br /></div><div dir="rtl" style="text-align: right;"><strong><span style="font-family: inherit;">- "غيري الدكتور"</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">شراب هوا علشان اغيره بسهولة كده! وبعدين انا دفعت له كل فلوسه خلاص "حد يعمل كده برضه؟ انتى عبيطة؟" - اصله مش كهربائي علشان احجز شوية من حسابه لغاية ما يخلص الشغلانة!</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">موضوع بقى هاتولدي ازاي ده قصة تانية خالص. الناس بتعشق الافتاء! تحب كده ترغي فى اللى تعرفه واللى متعرفوش ومفيش مانع تألف حته كده من عندهم لزوم القعدة الحلوة. يعنى اتقالي الطبيعي احسن علشان كل حاجة بترجع زي ما كانت والجسم بيرجع زي الاول بعد فترة صغيرة (دي حقيقة علمي فعلا) بس الطبيعي بقى مشكلته فى حقنة الضهر (دي حقنة تخدير نصفي بتتاخد فى مكان بي فقرتين فى الضهر) علشان الحقنة دي ممكن تجيب شلل نصفي!!! شلل مرة واحدة؟ محدش قال انى هاولد تحت شجره ولا عند الفكهانى ولا ان حلاق الصحة اللى هايديهالي! والكلام اللى جاي اتقالي كتير:</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">- القيصري تدخلي كده بكرامتك من غير تعب ولا صويت (اوكيه بس بعد الولادة هاقعد بتاع اسبوعين من قادرة اعمل اي حاجة خالص من الجرح ولازم حد يخدمنى خدمة العبد للسيد!!)</span></strong><br /></div><div dir="rtl" style="text-align: right;"><strong><span style="font-family: inherit;">- الطبيعي خطر! ممكن الدكتور يشد "الواد" غلط ويحصله عاهة فى دراعة ولا حتى يشده من رقبته (انا قلت مش هاولد عن حلاق الصحة ولا حتى الجزار"</span></strong><br /></div><div dir="rtl" style="text-align: right;"><strong><span style="font-family: inherit;">- الطبيعي وحش اوي - علشان بيشفطوا العيل بجهاز كده زي المكنسة وممكن يجيب اعاقة ذهنية فى المخ (ليه هايجيبوه من تحت السرير؟)</span></strong><br /></div><div dir="rtl" style="text-align: right;"><strong><span style="font-family: inherit;">- السيزيريان وحش اوي - الحرج يتفتح تلات مرات بس ولو عايزة تخلفي تانى ماينفعش ( طبعا الكلام ده فى الجنينة! علشان الجرح الواحد بيتفح تلات مرات بس فعلا ولكن ممكن يفتح مكان جديد! اصلها مش سوسته هاتتفتح وتتقفل! وغير كده مجنونة مين اللى عايزة تخلف اكتر من تلات مرات؟ هوا كل عيل زيادة هاخد عليه Score اعلى ولا ايه؟)</span></strong><br /></div><div dir="rtl" style="text-align: right;"><strong><span style="font-family: inherit;">- الطبيعي احسن - ده زمان كانت الست الفلاحة تولد من هنا انشالله حتى فى الارض (الزراعية) وتشيل الواد وتمشي على بيتها وتعشي جوزها (ده تبع سيستم system الجاموسة ولا زمان كانت الستات استانليس ستيل؟؟)</span></strong><br /></div><div dir="rtl" style="text-align: right;"><strong><span style="font-family: inherit;">- القيصري احسن علشان وجع الولاده كله مش هاتحس بيه وتحافظي على ادميتك - تدخلي كده بمكياجك وبارفانك وعلى رجلك مش على ضهرك !! (مش لما ابقى احط بارفان ولا مكياج من دلوقتى اصلا ابقى اتعايق وانا داخلة اولد!!؟)</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">في الاخر خالص مفيش كلام محدد حد يقدر يعتمد عليه فعلا...علشان كل واحدة وتجربتها الشخصية بتختلف عن التانية. وبعدين اصل مفيش حل تالت...ماينفعش مثلا اسقف فيطلع العيل من البرنيطة او اولد من وداني!! ربنا يستر</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">سيبنا من موضوع الولادة...نيجي لموضوع تانى بيحصل كل يوم ومتعب اوي - الاكل! الجوع هوا سيد الموقف حاليا وبعدين لما باكل بتعب وضربات قلبي بتزيد اوي وبالتالي نفسي بيضيق علشان "الواد ابن ام الواد" واخد حيز جوا ولما باكل الحجاب الحاجز بيبقى مش عارفة يروح فين! طبعا سؤال "ايه ده؟ انتى بتنهجي ليه؟ هوا انتى حتى قمتي من مكانك علشان تنهجي" بيتقالي كل ما الحركة دي تحصل قدام حد. ولما اقول السبب اللى قدامي لاااااازم ولابد وحتما وضروري يضحك...ولو واخد عليا هايقولي "خلاص بطلي اكل شوية" (حاضر هاركب محاليل اريح بصراحة)</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">برضه موضوع الوضوء ده محتاج شوية اكروبات وتوازن و لياقة بدنية مفقودة حاليا من عندي...ونتيجة ده بيكون تشنج فى مفصل الرجل وطرقعة غريبة فى اخر الضهر - بحاول مركزش بصراحة فى الموضوع ده. دلوقتى ظهرت اعراض تانية للحمل وهي تبلد الاحساس!! تلاقي مثلا حد تعبان...عااااااااااااااادي جدا لانك اكيد تعبانه اكتر...حد مش قادر يقوم من مكانه (وايه يعنى انا بقالي كده كذا اسبوع)....حد جعان ومش عارفة ياكل ايه (ياسلام؟ ما ان جعانة على طول حتى لو مفيش مكان للاكل وبقى ده اصلا الشعور الdefault عندي)</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">في بقى حاجة سخيفة تانية...الحمام!! اسفة طبعا انى بجيب السيرة دي بس لازم اكون واضحة وصريحة علشان لو حد بيرخم على واحدة حامل يتلم ويبطل! المشكلة ان الطفل واخد حيز كبير وبعدين هوا هاجيب مكان منين؟ ماهو طبيعي هايضغط على كل الاعضاء اللى جوا...فلو الحامل شربت "بؤ" مياه كلها شوية صغيرة ولازم تدخل الحمام. من الاسئلة الظريفة بقى "انتى كل شوية بتدخلي الحمام ليه؟ - لاعادي اصلي (لامؤاخذة) حامل - "لا اصل مش كل الحوامل كده" - ايوه فعلا بس اصل الاوبشن ده نازل على ا لموديل بتاعى انا بس - "روحي حللي سكر! انتى اكيد جالك سكر حمل!!" حاجة محرجة اوي انك تناقش واحدة بتدخل الحمام ليه!! خصوصا لما يكون راجل اللي بيسئل!! طيب هاتفرق معاه في ايه؟ وبعدين هيا الحامل دي كانت بتدخل حمام بيتكوا؟ سيبوا كل واحدة فى حالها حرام عليكوا!</span></strong><br /></div><div dir="rtl" style="text-align: right;"><br /><strong><span style="font-family: inherit;"></span></strong><br /></div><div dir="rtl" style="text-align: right;"><strong><span style="font-family: inherit;">هاقوم احاول اتوضى من غير ما اقع!</span></strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-3869319498431811567?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-70368790861248644262009-11-09T13:04:00.004+02:002009-11-09T13:17:55.478+02:00هيا الدبلة فين؟-"عتريس عامل ايه؟"<br />-"..." ده انا <br />-"بيلعب؟"<br />-"..."<br />-"خليه يلعب براحته"<br />-"..."<br />زمان كان الناس بتقابلني وتقولي "اخبارك ايه؟" دلوقتى الوضع اتغير...حاجة سخيفة جدا ان الناس كلها تكون شايفاني من خلال بطني بس!!! وبعدين اسئلة مستفزة... هايكون عامل ايه يعنى؟؟؟؟؟ أي رد على أي من الاسئلة دي يعتبر دعوة لمزيد من السخافة!! فانا يا بعمل نفسي مش سامعة يا بضحك ضحكة صفرا وخلاص! اصل ساعات بتكون ناس كبيرة اللى بتسئل وماينفعش اقل ادبي اوي يعنى !<br /><br />من كام يوم غلطت ودخلت محل هدوم علشان اشوف حاجة لاختى ... مسكت بلوفر وبتفرج عليه وجت جنبي بنت من بتوع المحل فى لمح البصر وسئلتي "ده ليكي؟؟؟" تقريبا كانت خايفة اتجنن واقيسه فيمط ويبوظ وتدفع هيا تمنه!!! قلت لها لا – "طيب عايزة مقاس كام"!! خايفة لاكون بكدب عليها غالبا<br /><br />بعد الحمل كل المسميات بتختلف...الاول خالص طبعا كان بيتقالي يا انسة او يا "مزمازيل" – وبعد الجواز كان برضه بيتقالي كده بس لما حد بيشوف الدبلة بيتقالي يا ابلة! النهاردة كنت بجيب حاجة من ماركت وواحد من الواقفين قال "يابنى شوف الست عايزة ايه" – الست؟؟؟؟ الست دي بتتقال على واحدة بتجر وراها اربع عيال وهيا اد الكنبة! هوا انا بقيت اد الكنبة خلاص؟! حسبي الله ونعم الوكيل<br /><br />على فكره الحمل مش مرض. ليه الناس بتتعامل على اننا عيانين وهانخف قريب و"هانت" خلاص؟! وبعدين فى شوية جمل مستهلكة بتتقال للحامل "كل يووووووم" لغاية ما تكره ابنها قبل ما يجي (انا مش هاكرر الكلام اللى قلت عليه قبل كده)<br />-جوا احسن من بره <br />-بكره تقولي ولا يوم من ايام الحمل (محدش بيحب يفضل وارم على طول على فكره)<br />-ياااااااه انتى اتغيرتي اوي (مع انهم لسه شايفيني امبارح)<br />-يابنتى غلط عليكي (أي حاجة بقى غلط عليكي – هوا غلط وخلاص)<br />-هيا الدبلة فين (بعتها علشان اجيب بيها شيبسي – ضاقت طبعا!!! وهما برضه عارفين انها ضاقت بس هوا رخامة وخلاص)<br />-نامى على اد ما تقدري بكره متناميش خالص (يعنى لما انام النهاردة كتير بكره مش هانام؟ هوا النوم بيتحوش فى ازايز؟؟؟)<br />- متجيش الشغل...انتى بتيجي ليه؟ (انا مش بشتغل فى بقاله علشان اروح واجي بمزاجي – ولا بشتغل فى بوتيك مامي علشان ابقى براحتى اوي كده - ده حتى البقال بيروح بميعاد ويرجع بميعاد!! اجيب اجازات منين؟) <br />-ايه ده؟ هاتاكلي فطير؟ طيب والحموضة؟ - اعتقد انى اتكلمت عن الفيلم ده قبل كده كتير وانتوا فاهمين بقى <br />-البابي عامل ايه؟ (بيلعب بلاي ستيشن ولسه جايب جون)<br />-رحتي الدكتور؟ وايه الاخبار؟ (زي كل مرة – طلعت حامل!!)<br />-احمدى ربنا فى ناس مش لاقية اللى ربنا اداهولك (والله العظيم ما بشتكى – انا بقول واقع بيحصل وربنا يرزق الجميع باطفال)<br />-يا ترى وضع البابي ايه؟ بس باين انه يعنى قاعد و مستريح (ايوه لسه طالب طاولة وحجر معسل)<br /><br />يا جماعة دي دعوة لكل الناس من فضلكوا بلاش تتريقوا على واحدة حامل هيا مش ناقصة – هيا عندها مرايا فى البيت وعارفة تماما انها زي الكشك بالظبط...بس الفرق ان هيا اتخن شوية!!<div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-7036879086124864426?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com2tag:blogger.com,1999:blog-4041739309770236534.post-63143239697096271882009-11-08T14:54:00.001+02:002009-11-08T14:54:02.401+02:00الشوال ضاق عليكيفي اخر فترة الحمل جحم كل حاجة بيختلف! من فترة حسيت ان كرسي المكتب ضاق عليا! قلت متهيألي...بس طلع فعلا الكرسي ضاق! حاجة محرجة جدا ومتعبة جدا في نفس الوقت! وبعدين الابعاد عندي بقت مختلفة اوي...يعنى كنت فى سوبر ماركت وشايلة الشنطة على كتفي وبتحرك عادي يعنى وسط الارفف وكده... مش واخدة فى بالي خالص ان بقالي توابع ماشية معايا – طيرت كام حاجة بالشنطة. وبعدين مش هاسيب الحاجة يعنى اكيد هاوطي اجيبها ...دي مشكلة تانية خالص...فيلم كوميدي والله بس كانت حاجة محرجة جدا! ياللا ما علينا <br /><br />بدلت كرسي المكتب مع زميل ليا النهاردة وطبعا شرحت له ليه...مضطرة اقوله الكرسي ضاق اصل هاقوله ايه؟ لونه مش ماشي مع الطقم؟! <br /><br />نيجي بقى لقسم الملابس!!! اول حاجة لبس الحوامل غالي جدا...ومهما تلبسي برضه هايبقى شكلك وحش (القالب غالب زي ما بيقولوا)...وغير كده هاتحسى انك بتستخسري تجيبي لبس علشان بكره يترمي (الله اعلم هدومى القديمة هاتدخل فيا تانى ولا هاجيب غيرها) انا جبت بنطلون اسود (يمشي مع كله ورافضة رفض تام انى اجيب غيره – لانى اول ما اولد هاولع فيه) وفوقيهم بقى حاجة زي البراشوت كده ملهاش شكل كذا لون! والباراشوتات دي كانت مخليه ناس كتير متعرفش انى حامل وتتخيل انى تخينة! اكتر حاجة بكرهها الشوال الجينز! تلاقي الواحدة الحامل ضاربة الشوال الجينز الحمالات ابو فراشات وورد فوشيا واخضر واصفر على الصدر وتحتيه بلوزة ساتان بكم واسع لون من الوان الفراشات!! وتطقم بقى كل يوم بلوزة لون! بتجدد برضه! وعلى كل ده شبشب رجالي من التوحيد والنور وباين منه الكعب المشقق اللي يستخبى فيه الحشرات ده! قليل اللى بيفكر يجيب صنادل او سابوهات شكلها ابن ناس بس تكون مقاس اكبر (طبعا دي مشكلة لو كان مقاسك اصلا كبير)! هوا لازم الشبشب ابو من غير شكل ده (ماهي حامل بقى – وليس على الحامل حرج). اول تلات شهور بنقاوم اننا نشتري لبس حمل..اصل ده اعتراف ضمنى بزيادة الوزن والحجم ونبدا نلبس الاول فى كل الهدوم وكل يوم نقول لنفسنا "انا مش باين عليا الحمل" ونبقى فخورين اوي بنفسنا وبعدين نبدا نلبس فى الهدوم العادية برضه بس الواسع منها شوية ...وبعدين نضطر اسفين نشتري بنطلون ومن فوق بلوزات عادية من الدولاب وبعد كده ندخل فى مرحلة البراشوتات والشولة والشباشب الرجالي!! المشكلة بقى كلها لو جبتي اصلا شوال مش كبير اوي...لما يضيق الشوال بيجي شعور عام بالقرف من الحياه كلها !!<br /> حاليا الحاجة الوحيدة اللى على مقاسي من قبل الحمل هي الشنط والاشاربات! فقط!!<br /><br />للشكل عامل نفسي كبير اوي. اول ما يتغير الشكل يبدا الاحساس بالاكتئاب. اخر الحمل بيكون كئابة غير عادية بقى علشان بنفقد الامل في الرجوع مرة اخرى للشكل الاول...وحتى لما جوزك يقولك كلمة حلوة ويقولك مثلا "ايه القمر ده" ولا "حلوة البلوزة دي" انتى عارفة تماما انه يا بيتريق يا بيضحك عليكي وفى الحالتين بتكونى مكتئبة اكتر! يا ريت الأزواج مايعلقوش اصلا وده اريح كتير. <br /><br />مع زيادة الوزن والتقل العام بيكون صعب اوي نجيب حاجة وقعت. لما بتقع منى حاجة ببص لها شوية كده يمكن اصعب عليها وتيجي من نفسها. من ايجابيات الحمل بقى النقطة دي...هاتلاقي الناس بتوطي تجيب لك اللى وقع منك...وتدور لك على الجزم تحت السرير...تجيب حاجة من درج التلاجة اللى تحت...يشيلوا عنك طبق الغسيل...يحطوا الغسيل فى الغسالة...كده يعنى...كله مصلحة الحمد لله. ومن الايجابيات برضه عدم الشعور بالذنب لو كلتي حاجة سعراتها عالية...انتى حامل بقى براحتك....يعنى هاتعملي دايت وانتى حامل؟ طبعا لا.<br /><br />الايس كريم بيناديني...سلام<div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-6314323969709627188?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com2tag:blogger.com,1999:blog-4041739309770236534.post-19382968801724795882009-11-08T11:41:00.002+02:002009-11-08T11:45:00.129+02:00كله هايطلع فى وش ابنكيا جماعة محدش يفتكر انى بكتب البتاعة دي كده فرفشة يعنى ولا علشان اتسلى – لا خالص. انا اتصدمت من حاجات كتير فى الحمل ومكنتش متخيلة انه هايبقى كده وده من الاسباب اللى بكتب علشانها...علشان الناس تفهم الواقع. وبعدين لقيت ان كتير جدا من معتقدات الناس المتعلقة بالحمل خرافات وتهجيص.<br /><br />مثلا من التخاريف اللى اتقالت لي (وعلى فكره اللى قالت لي الموضوع ده كانت مصممة انه حقيقة وواقع علمي وعن تجربة مش أي كلام) انى لما احب اهرش اشوف لي أي حته متدارية واهرش فيها (مش قصدها اتدارى ورا شجرة – لا قصدها حاجة تانية)....بمعنى...لو عايزة اهرش فى وشي اقاوم واهرش فى كعب رجلي!!!!! ليه بقى؟ علشان لو هرشت فى أي مكان فى جسمي هايبقى المكان ده وحمة فى جسم البابي!! وبتبرر لي الموضوع ده انها قالت "مش في اطفال نص وشهم وحمة كده؟ علشان مامتهم كانت بتهرش فى وشها كتير!!! علشان كده يطلع وحمة للطفل فى كعب رجله احسن من وشه" واللي يحب النبي يسقف (!!)<br /><br />وبرضه من الخرافات ان لما اتوحم على حاجة تطلع فى البابي! نفس اللى قالت لى موضوع الهرش ده قالت لى ان مامتها اتوحمت على برتقال وطلع لها شكل برتقالة فى بطن رجلها (اصل مامتها كانت متنورة وكانت بتهرش فى مكان مش باين بقى) طيب انا كنت باكل بطاطس كتير ومانجة – وبهرش فى وشي لما احب اهرش يعنى – ياترى كده هايطلع فى وشة مانجاية ولا بطاطساية؟ المانجة كبيرة هاتاكل وشه كله ! وبررت لى موضوع الوحمة اللى واخدة الوش كله ان ام البابي بتكون بتتوحم على كبده (اه والله قالت لى كده) وكانت بتهرش فى وشها (ست عايزة الحرق!! ازاي تعمل فى ابنها كده!!)<br /><br />من الحاجات برضه اللى اكتشفتها ان نظرا لتورم القدم في خلال الحمل فبنلبس حاجات مفتحة (غالبا حاجة بصباع علشان مفيش حاجة بتقفل على وش الرجل الوارم على الاخر) ومن غير كعب طول الوقت وده بيؤدي الي تشقق الكعبين والقدمين وبتبقى شكل رجلين البوابين! اصل حاجة مش في ايدنا...زي ما يكون ماشيين حافيين طول الوقت فى البيت والشارع فطبيعي جدا جدا ان الرجلين يحصل فيها كده! استعملوا بقى كريمات ولا فازلين ولا جلسرين ولا حتى سمنة...هايحصل هايحصل! ده طبيعي زي الشخير بالظبط<br /><br />النصيحة اللى كل الناس بتفضل تكررها هي "ممنوع الشاي والقهوة والنسكافيه والبيبسي طول ما انتى حامل" – ليه؟ علشان البابي مايطلعش عصبي و(هايبر) ومايفضلش يعيط طول الوقت! بصراحة كنت مصدقة الكلام ده ولان الدكتور قالي امنعى أي شاي وقهوة وبيبسي اثناء الحمل بس مقالش السبب...فقلت اكيد علشان كده! بس طلع الموضوع حاجة تانية خالص! الكافيين بيكون سبب في نقص وزن البابي بس ده لما يكون نسبة الكافيين عالية اوي فى الدم!! انا مثلا بحب جدا النسكافيه ولما اسئل "طيب اشرب ايه؟" يقولوا لي اشربي شاي اخضر بالنعناع!!<br /><br />هاروح اعملي حاجة اشربها بقى<div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1938296880172479588?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-17602320036033355522009-11-06T14:58:00.002+02:002009-11-06T15:06:32.338+02:00المدام مركبة زمارة<div dir="ltr" style="text-align: left;" trbidi="on"><div dir="rtl" style="text-align: right;"><strong>"نفسي فى حرنكش"....الجملة دي وجمل تانية شبهها على طول مقترنة بالست الحامل. طيب ما في ناس كتير نفسها فى حاجات اكتر ومش حامل اشمعنى يعنى كل ما الحامل تقول نفسها فى حاجة لازم تتوجد فورا؟؟ عامة مصلحة برضه! اول ما عرفت ان في بابي دخلت على سايتات خاصة بالمواضيع دي علشان مبحبش الوصفات البلدي والطب الشعبي (اصل احنا المصريين بنحب الحاجات دي اوي) وقررت انى مش هاسمع من حد كلمة مش مقتنعة بيها. المهم عرفت ان الوحم هوا القرف من اصناف معينة من الاكل...مش العكس زي ما احنا فاهمين:) انا بقى مقلتش المعلومة دي لحد واحتفظت بيها لنفسي على سبيل الدلع! وحصل ان اول تلات شهور تقريبا انا مش عايزة اكل اي حاجة غير بطاطس وبس!!! ايه ده بقى؟ مش قلنا ان الوحم يعنى القرف من الاكل؟ ايوه ما انا كنت قرفانه من كل حاجة تانية غير البطاطس...وللبطاطس دور رئيسي فى حياتى الكام شهر اللى فاتوا لان الاربع فدادين بطاطس اللى كلتهم عملوا احلى شغل بصراحة... وبقيت شبه الزكيبة وتخنت بشكل مرعب!! المهم...بعد كده فى نص الحمل جالي هسهس المانجة! "انا عايزة مانجة"...الكلمة دي كنت بقولها تقريبا كل ربع ساعة...انا عارفة انه اكيد مش وحم بس هامووووت واكل مانجة ومهما كلت منها عايزة مانجة تانى. المهم نزلت فى مرة اشتريتها بنفسي والطفاسة بقى قدام البياع!!! جبت اكبر حجم عنده وجبت كتير وروحت البيت فى سعادة لا توصف...اليوم ده كلت منها كمية تكفي عمارة وصحيت تانى يوم عيني مش عايزة تفتح من كتر ما وشي وارم!!! مش عايزة اقولكوا انى مكنتش حتى عارفة امشي ولا امسك حاجة لانى كنت عاملة زي كيس المياه...غباوة طبعا منى بس الحمد لله اليوم ده كان اجازة... اصلها مش ناقصة</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>من الحاجات اللى قريتها برضه معلومة غريبة اوي ... ان هرمون الحمل (دي كلمة كده عايمة لانى معرفش اسم الهرمون ايه ولا بتاع ايه...انا مش فاكرة) بيضعف المفاصل شوية (بس كله بيروح بعدين) ومع التقل وزيادة الوزن والحاجات دي بتبقى الحياه لونها بمبي. غلطت مرة وكنت عايزة احط حاجة فى درج التلاجة اللى تحت خالص...نزلت على ركبي وحطيت الحاجة وجدع اللى يقوم تانى!!! وهووووووب.....مفيش مش عارفة....طيب اسند على باب التلاجة وهوووووب....الباب يا جدعان هايطلع فى ايدي يا التلاجة هاتتقلب فوقي...طيب وبعدين؟ خلاص هاسند على الارض واحاول تانى هوووووب ركبي هاتفرقع مش عارفة اقوووووم. المهم جه جوزي وانقذ الموقف والتلاجة الحمد لله</strong><br /><br /><strong>برضه من الحاجات الغريبة اللي بتحصل فترة الحمل هو النوم...يا نوم كتير يا مفيش نوم خالص..في مرة مكنتش نايمة تقريبا بقالي يوم ونص وكان عندي ميعاد عند دكتور الاسنان...المهم اول ما دخلت العيادة حسيت انى هاقع من التعب وعايزة انام اوي اوي...قاومت لغاية ما دخلت...تخيلوا ايه اللى حصل؟ ايوه بالظبط اللى جه فى بالكوا...نمت وايده فى بؤي!! والله نمت مرتين وفى مرة فيهم حتى بدات احلم...المهم لما نمت عضلات الفك ريحت وبدات تقفل والراجل بيشتغل جوا لسه وبعدين بقيت اصحى على "طيب من فضلك نفتح شوية بس" فاصحى من النوم واحاول اقاوم ....تانى مرة نمت برضه وكان بيظبط الحشو وايده لسه جوا بؤي يا جماعة...." معلش افتحى بؤك شوية من فضلك". موقف محرج اوي بس اللى كان مخوفنى حاجة تانية...كنت خايفة اكون بشخر!!!! ايوه محدش يستغرب...انتوا فاكرين الحامل بتورم من بره بس؟؟ لا طبعا! كل الانسجة اللى جوا الانف هيا كمان بتورم علشان كده الحوامل فى اخر تلات شهور بيركبوا الزمارة! لو محدش يعرف انا بقول اهه... الحامل بتشخر!</strong><br /><br /><br /><div class="separator" style="clear: both; text-align: center;"><a href="http://3.bp.blogspot.com/_Y7O2SM0dyJk/SvQeNgoi2oI/AAAAAAAAABg/85dPP23aBk8/s1600-h/snoring.gif" imageanchor="1" style="margin-left: 1em; margin-right: 1em;"><img border="0" sr="true" src="http://3.bp.blogspot.com/_Y7O2SM0dyJk/SvQeNgoi2oI/AAAAAAAAABg/85dPP23aBk8/s320/snoring.gif" /></a><br /></div><br /><strong>ونيجي للموضوع ده لانه كان سبب فى ازمة نفسية ليا. انا مكنتش اعرف طبعا انى بزمر وانا نايمة ومحدش حتى نبهنى للموضوع ده انه بيحصل في اخر فترة في الحمل...طيب هاعرف منين بس؟ المهم لاحظت انى بصحى وسط الليل على صوت بس معرفش صوت ايه...يمكن حلم! الموضوع اتكرر بصحى على حاجة ولما بصحى بلاقي سكون! الله؟؟ طيب انا صحيت على صوت ايه انا متاكدة انى صحيت على صوت!! وبعدين فى مرة اختى صحتنى بالليل (كنت بايته معاها فى نفس الاوضة) وقالت لى "اعدلي راسك"...الموضوع ده اتكرر! لا بقى يبقى انا مصدر الازعاج ده. سئلت جوزي سؤال مباشر على بغته "انا بشخر؟" بص لي شوية وقالي "لا!" قلت له بس انا متاكدة "قالي لا طبعا مش بيحصل"...عرفت ساعتها انى فعلا بزمر وهوا مش عايز يجرح شعوري...مفيش كلها يومين بس وكنت بايته عند اهلي وماما قالت لى "صوتك يا حبيبتى كان جايب امبارح اخر الشقة" ...اتضايقت فترة كبيرة وبدات افكر انى لازم اروح لدكتور انف واذن علشان يشوف لي حل...ودخلت على مواقع كتير على النت اشوف حل....في حلول بقى غريبة اوي. في حاجة بتتلزق كده على المناخير بتخليها مفتوحة على طول علشان مايحصلش كده...وفي سبراي...وفي حاجة بتتلبس فى الدماغ كلها زي استيك شكله غريب شوية وحاجات تانية كتير...بس في الاخر ايقنت ان اللى بيحصل معايا ده علشان الانسجة اللى جوا منتفخة! الله يصبر جوزي على الازعاج ده ويرحمنى من الاحراج بتاع كل يوم - اصلها حاجة ملهاش علاقة بالانوثة خالص ان تكون المدام بتزمر جنبك!</strong><br /><br /><strong>محدش هنا...هاروح انام شوية براحتى قبل ما ييجوا من بره!</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1760232003603335552?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-38526171947116246192009-11-06T02:38:00.000+02:002009-11-06T02:38:00.043+02:00جبتي كام فنلة؟<div dir="ltr" style="text-align: left;" trbidi="on"><div dir="rtl" style="text-align: right;"><strong>صممت اول امبارح انى اروح بيتي - كفااااية كده - فعلا مش حاسة خالص ان ليا بيت مستقل كده ولا مطبخ اعك فيه براحتى ولا شقة اكركب فيها بمزاجي (هيا اصلا مش ناقصة كركبة اكتر... بس برضه براحتى) المهم امبارح كان يوم عظيم جدا - لوحدي فى الشقة زي ما يكون سيبوا طفل صغير بتاع سبع شهور مع شوية ورق وهيييييصة بقى. فضلت اتمشى من الاوضة دي للاوضة دي وادخل اتفرج شوية على كركبة المطبخ واخرج اتفرج على اي حاجة في اي حته وارجع استريح شوية (ال يعنى بقى المجهود) المهم كان فى النهاية القرار المصيري انى انضف الشقة! علشان بجد هوا ملوش ذنب يقعد فى مكان عاطفي زي ده كده (مع انه اتصل بيا كذا مرة وفي كل مرة يأكد عليا معملش اي حاجة فى البيت) بس برضه احساسي بالمسئولية (هابقى ام بقى ) انى لازم انضف الشقة. وقد كان! نضفتها كلها ووضبت كل حاجة ولمعت ومسحت وكل شغل الخدامين عملته ...طيب والله انا فل اوبشن (full option) لانى طبخت كمان! المهم جوزى جه من الشغل وانا فرحانه بشبابي جدا انى عملت كل ده فى يوم واحد واحساسي انى زوجة محصلتش كان مسيطر عليا اوي - وكان مخبي حاجة ورا ضهره...انا قلت مثلا اتنين كيلو موز ولا حاجة (على فكره يا جماعة الموز مهم للحوامل علشان التشنج العضلي اللى بيحصل) ولقيت انه جايب لي بوكيه ورد!!! (ورد؟؟ ليه النهاردة ايه؟؟) طيب مش حد كان يقولي ان النهاردة الفالنتاين؟؟؟ انا عمالة اكلمه على السلاطة والاكل ويحب ياكل الاول ولا ايه وهوا جايب لي ورد!!.حسيت فجاه انى ست بيت "بطيخة" مفيش فى دماغها غير البصل والتقلية والفنيك و"الواد" اللى لسه مجاش...انا طبعا مجبتش اي حاجة لانى اساسا مكنتش فاكرة...طيب لو انا من دلوقتى كده...امال لما "الواد" ييجي هاعمل ايه؟!! هانسى العيد الكبير؟ هوا الحمل ليه علاقة بتبلد الاحساس والرومانسية؟ اعتقد ان الاجابة اه.</strong><br /></div><div class="separator" style="clear: both; text-align: center;"><a href="http://1.bp.blogspot.com/_Y7O2SM0dyJk/SvNvm82w_SI/AAAAAAAAABY/ius3xYVLGEs/s1600-h/hw.bmp" imageanchor="1" style="margin-left: 1em; margin-right: 1em;"><img border="0" src="http://1.bp.blogspot.com/_Y7O2SM0dyJk/SvNvm82w_SI/AAAAAAAAABY/ius3xYVLGEs/s320/hw.bmp" vr="true" /></a><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>ما علينا </strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>اول امبارح حصل موقف فى الشغل وقررت انى انتقم واقوله هنا وافضح الدنيا. وده (طبعا يعنى) تبع التريقة بتاعة الناس</strong><br /></div><div dir="rtl" style="text-align: right;"><strong>دخلت مكتب ولقيت واحدة بتقولي "ايييييييييييييييييييه ده؟ كل ده؟"(الجملة دي بتتقال لي كتير وبجد هابدا اخد موقف عدائي من الناس) قلت لها في ايه؟؟ قالت لى "انتى على فكره مش هاتخلفي ولد..انتى هاتخلفي جحش" (كالعادة هاسيب لكوا الكومنت) وطبعا رديت عليها بس حفاظا على شكلها برضه مش هاقول انا رديت قلت ايه</strong><br /></div><div dir="rtl" style="text-align: right;"><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><strong>من الحاجات الغريبة برضه اللى اتعرضت لها موقف من حوالي اسبوعين تلاته كده ...قابلت واحدة زميلتي مشفتهاش من فترة كبيرة وسئلتنى انا فى الشهر الكام وقلت لها ...وكان واقف معاها واحدة اعرف شكلها بس معرفهاش شخصيا وكان السؤال "ايه ده انتى حامل؟" قلت لها اه "قالت لى انتى متجوزة؟" (ارد والنبي اقول ايه؟؟؟ اي اجابة على السؤال ده هايبقى معناه انى اغبى من اللى بيسئل" ملقتش اي حاجة اقولها غير "لا لسه متجوزتش". </strong><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><strong>على فكره الرجالة اندال جدا مع الستات الحوامل معرفش ليه...يعنى مثلا اكون واقفة مستنية الاسانسير وفي بنت امورة تانية وواحد كمان...ويكون في مكانين بس فى الاسانسير ...البيه يوسع لها الاول ويضحك ويعمل نفسه مش شايف ويدخل ويسيبنى انا بره!! ليه؟ انا اولى انى اركب بما ان ظروفي صعبة! ولا علشان شكل ال (انتوا عارفين ايه)! بس هانقول ايه؟ حسبي الله ونعم الوكيل. </strong><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><strong>ليه كل ما اجيب حاجة الناس تقولي "ايه العبط ده؟ ده كله هايجيلك هدايا" الكلمة دي سمعتها عن سرير البابي - البطانية - الكوفرتة - سالوبيتات شتوى - وكمان عن كرسي العربية . مفيش حد بيسئلني جبتى حاجة البابي ولا لسه غير لما يسئل عن حاجة واحدة بس...عارفين ايه؟ فانلات البابي!!! جبتي كام فنلة؟ وجبتي فانلات بكم ونص كم؟ جبتي فانلات بتتقفل من الجنب بكباسين علشان دماغه اول ما يتولد؟ طيب جبتي مقاس زيرو لغاية تلات شهور ولا زيرو بس؟ هوا الولد هاينزل بفانلة بس؟؟؟ طيب لو انا مش هاجيب بطانية الفه فى فوطة مثلا وانا خارجة من المستشفى؟ وعلى ما الناس تتلحلح وتجيب الهدايا الف الولد فى شال؟ ولو مش هاجيب سرير البابي وهاستنى "اونكل فلان" مثلا يجيبهولي وجابه فعلا بعد تلات اربع شهور... الواد ينام فين؟ وياريت محدش يقولي جنبك علشان انا مبحبش الحركة بتاعة العيال اللى بيلزقوا فى سرير اهاليهم دي. ولو مش هاجيب كرسي العربية هاحطه فين؟ على حجري؟ ماهو غلط علشان لو حصل حادثة مثلا بعد الشر. ولو مش هاجيب هدوم هالبسه ايه؟ برضه اوبشن الفوطة شغال ولا ايه؟؟؟ ياريت يا جماعة اجابة</strong><br /></div><div dir="rtl" style="text-align: right;"><strong>اصل انا مجربة موضوع "هايجيلك هدايا" ده فى الجواز وقررت انى مش هاكرر نفس الكارثة مرة تانية. وانا بفرش الشقة كان في حاجات كتير فى بالي عايزة اجيبها وكان اصحابي بيقولوا لي "يابنتى بلاش هبل - الحاجت دي كلها بتيجي هدايا" ومنها الاباجورات واكسسوار البيت. المهم قلت خلاص استنى اشوف هايجيلي ايه ولما احب اجيب اكتر اشتري بعد كده بدل ما يكون عندي حاجات مكررة. اول حاجة الناس بدات تيجي بعد الجواز بكذا شهر! واللى جاب هدية جاب لي بايركس!!! عندي كمية بايركس ممكن اطبخ فيها موائد الرحمن ...وللاسف ده كان الحاجة الوحيدة اللى انا مفكرتش ان الناس هاتجيبها وجبت منها اصلا بالهبل. محدش عايز بايركس؟</strong><br /></div><div dir="rtl" style="text-align: right;"><br /></div><div class="separator" style="clear: both; text-align: center;"><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><strong>برضه من الحاجات اللى الناس بتصمم تسئل عنها فى الفترة دي "جبتي بامبرز ولا لسه؟" - لا والله لسه - "ليييييه؟؟ ده ضروري - انتى خدي لك بتاع 500 جنيه كده وجيبي بيهم بتاع حديثي الولادة" - طيب معلش لامؤاخذة فى السؤال - اجيب ب500 جنيه بامبرز علشان البيه يـ...؟؟؟ "ايوه يابنتى طبعا - امال انتى فاكرة ايه؟ احنا اصلا بنشتغل علشان العيال يـ.... وبس" ....افادكم الله</strong><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><br /></div><div dir="rtl" style="border-bottom: medium none; border-left: medium none; border-right: medium none; border-top: medium none; text-align: right;"><strong>برضه لو حد عايز بيركس يقول !</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-3852617194711624619?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-66216800395665530272009-11-02T00:37:00.000+02:002009-11-02T00:37:42.549+02:00الجاموسة<div dir="ltr" style="text-align: left;" trbidi="on"><div dir="rtl" style="text-align: right;"><strong>ليه كل ما حد يشوف واحدة حامل يا يتريق عليها يا يقلب وشه؟ انا كان من نصيبي التريقة اكتر بصراحة (مع ان شكلي مش ولابد وانا حامل خالص) يعنى حتى اقرب الناس ليا مترحمتش من لسانهم. اختى العظيمة ليها نصيب الاسد هيا وزمايلي فى الشغل. اللى تقولي بقى شكلك زي الفنطاس...واللى يقولي انتى ناقص لك اسبوعين وتبقى نسخة من زكية زكريا...واللى تقولي جبتي مقاس الجزمة ده منين؟...شهرين وتلبسي العلبة فى رجلك لان مفيش حاجة هاتيجي على مقاسك. ويا سلام بقى قبل ما اعرف ولد ولا بنت...واحدة قابلتني وقالت لى بالحرف "على فكره انتى حامل فى ولد" قلت لها اشمعنى؟ "قالت لى وشك بقى شكله زبالة" (الله يكرم اصلك وتربيتك العالية) ... وواحدة بتقولي انتى هاتجيبي بنت - اشمعنى برضه؟ - اصلك حامل بالعرض!!! (ده بس من ذوقك)</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>خلاصة الموضوع ان بمرور الوقت بيضيع احساس الواحدة بانها انثى ويتحول الي شعور انها "جاموسة" (مع الاعتذار للحيوان الرقيق ده) فى فترة كده فى الحمل (شخصيا يعنى) حسيت فيها انى على طووول جعانة - فقدت حاسة الشبع فيها - كنت باقضى على الاخضر واليابس. جعانة يا ناس طيب اعمل ايه؟ ماما كانت دايما بتقولي "معلش انتى حامل براحتك يا حبيبتي" - اختى كل ما تشوفني فاتحة التلاجة وبتفرج على المحتويات تقولي "اضربي اضربي" - جوزي كان بيجيب لي حاجات حلوة كتير وبسكوت وعصير وشيكولاته يعنى في حالة حبيت انقنق (ولغاية دلوقتى على فكره مظبطني حاجات حلوة)!! وبعد احساس الجوع اللى على طول (لا الجاموسة بتشبع ولا النجيلة بتخلص) بيجي الشكل ليؤكد هذا الانطباع وتيجي تعليقات الناس لتزيد هذا التاكيد تاكيدا. واحدة مثلا قابلتني من حوالي تلات ايام وكان بقالي فترة كبيرة جدا مشفتهاش...اول حاجة عملتها انها شهقت كده وقالت لي "اييييييه ده؟ انتى بقيتي عاملة كده ليه؟" - حكمة ربنا بقى اعمل ايه يعنى؟ "لالالا ولا مناخيرك يانهار ابيض بقت مفروشة فى وشك" - معلش بكره كله يروح انشاء الله يعنى - وكان الرد الغير متوقع "كان اولى انه يروح من عند كل الستات لما يروح من عندك - اللى بيبوظ مش بيرجع تانى على فكره" - ليه؟؟؟ هيا مناخيري صلصال يعنى لزقت على كده؟ وبعدين مفيش مقاس واحدة ست بيكون 45 طول عمره يعنى اكيد كل ده مياه ولا ورم من الحمل ولا اي حاجة! ناس تنرفز</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>واحد تانى بقى كان ظريف شوية - اول ما دخلت الاوضة عنده لقيته رجع لورا كده احتراما وتجليلا ليا وقالي "انتى نورتي ومليتي المكتب" خدوا بالكوا من كلمة "مليتي" دي وسئلني ان كان جوزي بيتريق عليا!!!! لا اله الا الله! هايتريق ليه؟ يعنى هوا انا كده طفاسة؟ هوا اه جزء منه طفاسة بس الباقي طبيعه وبعدين هما مالهم! ناس مستفزة جدا</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>معلش...بكره اتريق على كل الناس دي - اهو على الاقل انا طويلة مش بؤلة وبدئلج (مش عارفة الspelling beta3 da2laga eeh) اللى يعرف يكتبه !</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>هاكمل الجيم بقى - باي</strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-6621680039566553027?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-13374560734818060652009-11-01T16:52:00.001+02:002009-11-01T17:23:24.479+02:00كباية خل<div dir="ltr" style="text-align: left;" trbidi="on"><div dir="rtl" style="text-align: right;"><strong>برضه انا مصممة اننا هاندخل الجنة - علشان سبب تانى...تخيل كده لو انك مثلا كل يوم تشرب كباية خل على الريق وبعدين كباية خل بعد الفطار وواحدة كمان على الغدا وواحدة قبل العشا وتصحى وسط الليل تضرب كباية خل كمان...هايبقى ايه شعورك؟ هوا ده بالظبط شعور الحموضة عند الحامل!!! اشربوا بقى لبن - كلوا خيار - اشربوا لبن رايب - انشالله يا رب تاكلوا برسيم بعيدانه برضه الحموضة هاتسيطر على الموقف. انا بصحى وسط الليل منها (مش انا لوحدي طبعا ده كل الحوامل) انا وصلت لمرحلة انى لو شفت حد بياكل حاجة قدامي فيها توابل شوية او فيها بصل مثلا الحموضة تقوم عليا اكتر!! وبعدين لو مثلا قلت كده قدام حد (مش شكوى والله بس علشان لو حد عنده اختراع من عند العطار ينفع اخده او كده) يقولوا لي "ده شعر البابي"!! هوا البابي ده بيطلع شعر فى كام اسبوع؟ واشمعنى يعنى شعره اللى بيعمل حموضة ؟وبعدين لما اشرب حاجة ساقعة يتقالي "كده هايطلع اقرع" طيب والله لو الحاجة الساقعة هاتخليه اقرع وانا مايجيليش حموضة هاغطس كل يوم فى فنطاس بيبسي واريح نفسي</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>برضه من العذاب اللى احنا بنمر بيه ومن اسبابا دخولنا ا لجنة هو"حاسة الشم"!! خصوصا بقى اول تلات شهور. يا سلاااااااااااااااام مفيش حلة في الشارع مشمتش ريحتها ولا شخص ماشي جنبي مشمتش ريحته (مش ضروري تكون ريحة حلوة) وغالبا بنحس ان في ريحة مش ظريفة مع ان مفيش حاجة! انا فضلت فترة كبيرة بكره اروح البيت علشان حاسة ان في حاجة دخلت جوا الشقة وماتت وانا مش عارفة مكانها لدرجة انى خليت جوزي يحرك التلاجة والبوتاجاز والغسالة اشوف يمكن يكون دخل تحتهم اي كائن حي وتوفاه الله والريحة طلعت فى الشقة! طبعا كنت انا الوحيدة اللى بشم الريحة دي. انا عذبت الراجل ده معايا كتير ...ربنا يجعله فى ميزان حسناته انشاء الله :)</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>فى حاجة مهمة جدا برضه فى فترة الحمل وهي الوصفات الشعبي ودي بقى بتكتر اوي للحامل، يعنى الحوار التالي ده بيتكرر بشكل او باخر من فترة للتانية</strong><br /></div><div dir="rtl" style="text-align: right;"><strong>- خدي على الريق سبع بلحات وكباية لبن - كل يوم مش اقل من كيلو الا ربع لبن </strong><br /></div><div dir="rtl" style="text-align: right;"><strong>- طيب انا بتعب من اللبن</strong><br /></div><div dir="rtl" style="text-align: right;"><strong>- لالالالا مفيش حاجة اسمها كده - ده امانة فى رقبتك حرام</strong><br /></div><div dir="rtl" style="text-align: right;"><strong>- يا جماعة افهمونى بجد اللبن بجد بيتعب معدتى</strong><br /></div><div dir="rtl" style="text-align: right;"><strong> - الله؟ انتى عايزاه ضعيف ولا ايه؟</strong><br /></div><div dir="rtl" style="text-align: right;"><strong>- لا طبعا مش عايزاه ضعيف بس انا مش هاقدر اصل لو شربت لبن هاتبقى كارثة علشان كده انا باخد اقراص كالسيوم </strong><br /></div><div dir="rtl" style="text-align: right;"><strong>- اقراص؟؟؟؟ كله الا الاقراص دي!! دي بتخلي دماغ العيل ناشفة وتكبر اوي عن باقي جسمه</strong><br /></div><div dir="rtl" style="text-align: right;"><strong>- (ياسلااااااااااام؟؟؟؟) دي نظرة دهشة وتريقة بس بحاول اداري التريقة علشان محدش يضرب</strong><br /></div><div dir="rtl" style="text-align: right;"><strong>- اةة امال ايه!! وبعدين كمان كل الحاجات الصناعي دي مش بتمتص فى الجسم وبتسيب حاجات فى الكلى والكبد</strong><br /></div><div dir="rtl" style="text-align: right;"><strong>- يا اخوانا الدكتور اللي قالي اخد الاقراص دي علشان انا مش بقدر اشرب لبن علشان البابي بياخد منى فانا اعوض جسمي يعنى الاقراص دي ليا انا مش "للواد" </strong><br /></div><div dir="rtl" style="text-align: right;"><strong>- "سيبك سيبك من الكلام ده! انتى كده كده اسنانك كلها هاتوجعك وبعدين تبدا تسوس وتقع كده لوحدها - يعنى تاكلي تلاقي الضرس بيدوب كده ويتفتفت" |(!!!) - نو كومنت</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>والله العظيم اتقالي ان اسنانى هاتقع بعد الولادة! على كده بقى كل مصر مركبة طقم "بالاستشيك". ومن الوصفات الهايلة برضة اللى اتقالت لي فى اول الحمل انى اكل لحمة وفراخ وكبدة كتير علشان البروتين (مع ان الكبدة اصلا غلط جدا خصوصا فى اول الحمل علشان فيتامين أ بيعمل اجهاض!!) بس علم فى المتبلم يصبح ناسي</strong><br /></div><div dir="rtl" style="text-align: right;"><br /></div><div dir="rtl" style="text-align: right;"><strong>هاروح اشرب شوية خل وارجع لكوا تانى </strong><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1337456073481806065?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-26598788673779074852009-10-31T13:25:00.001+02:002009-10-31T13:53:36.049+02:00وياترى جوزك بيديلك مصروف بيت كام؟<div dir="ltr" style="text-align: left;" trbidi="on"><div dir="rtl" style="text-align: right;"><div class="separator" style="clear: both; text-align: center;"><a href="http://2.bp.blogspot.com/_Y7O2SM0dyJk/SuwlADafm0I/AAAAAAAAABQ/Kai4GBkel_k/s1600-h/25_piasters.jpg" imageanchor="1" style="clear: left; float: left; margin-bottom: 1em; margin-right: 1em;"><img border="0" src="http://2.bp.blogspot.com/_Y7O2SM0dyJk/SuwlADafm0I/AAAAAAAAABQ/Kai4GBkel_k/s640/25_piasters.jpg" /></a><br /></div><b>احنا اكيد رايحين الجنة على فكره (احنا دي تعود على الحوامل)</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>فترة الحمل بتتقسم الي تلاته - اول تلات شهور - تانى تلات شهور - تالت تلات شهور. اول تلات شهور الوهم بيخلينا نحس اننا شايلين اربعة كيلو حجارة جوا! مع ان مفيش اصلا وزن للبابي ولااي حاجة خالص - بس احساس ان الفازة الكريستال جت بقى زائد تهويل من اللى حوالينا وكلام من شاكلة "اول تلات شهور دول هما اهم شهور!! اوعى تتحركي كتير ولا تشيلي حاجة تقيلة ولا تركبي عربية كتير ولا تزعلي ". وبطبيعة الحال اول تلات شهور بيكون فيهم تغير كتير فى الموود بتاع اي واحدة بس في ناس مش بتيقن ده. يعنى لو انا على طول حاسة ان فى ريحة مش حلوة وانى قرفانة واي اكل مش بيقعد فى المعدة ودايخة طبيعي جدا انى اكون في موود مش حلو!! غير ان في تغيرات فسيولوجية بتحصل بسبب تغير الهرمونات. وبعدين فى حاجة ا سمها "فوليك اسيد" بتتاخد اول تلات شهور وهيا اصلا بتسبب انقلاب المعدة - غير اللى بيحصل لوحده - فالواحد بيبقى مش طايق نفسه ولا طايق حد حوالية</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>دي اول تلات شهور، تانى تلات شهور اظرف شوية بيكون بدا الشعور بالغثيان ده يروح والمواضيع تبقى الى حد كبير مستقرة (نفسيا وبدنيا) - اخر تلات شهور هما اللى هايودونا الجنة باذن الله</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>معجزة من السماء ان الواحدة تقوم من السرير الصبح مع وجود قفش الضهر وورم الرجلين و"سي الاستاذ" بيتحرك!! ولو قامت شاطرة لو عرفت تمشي خطوتين من غير ما تسند على حيطة ولا على دولاب. وياسلام لما تيجي تقوم من على كرسي واطي - بتبقى عايزة اتنين عتالين يشدوا معاها هوبااااااااا "ربنا يقومك بالسلامة" - كل ما اقوم من على كرسي اسمع لي البؤ ده حتى فى عدم وجود العتالين - هوا هاسمعه يعنى هاسمعه</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>وبرضه من الحاجات الظريفة اللى سمعتها مثل بيقول "جوا ذلة وبره عله" - شوفوا الحكمة!! ذلة وعلة! طيب لو هوا كده الستات بتخلف ليه كتير؟ اهو اي كلام وخلاص ولازم ورا الجملة الجميلة دي يتقالي "معلش هانت" - يا جماعة انا مشتكتش من حاجة والحمد لله ده رزق - معلش هانت برضه</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>الناس عندنا تحب اوي تحشر نفسها فى اي حاجة ملهاش علاقة بيها - متعرفوش بقى ده حب استطلاع ولا فضول ولا رخامة - اهو حشر نفسهم وخلاص وده بيفكرني باول جوازي خالص</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>اول ما اتقرت الفاتحة قلت لزمايلي فى الشغل. تخيلوا فى ناس زعلت منى!! والحوار التالي والله حصل بالحرف</b><br /></div><div dir="rtl" style="text-align: right;"><b>- بس انا زعلانة منك</b><br /></div><div dir="rtl" style="text-align: right;"><b>- ليه بس؟ (ده انا طبعا)</b><br /></div><div dir="rtl" style="text-align: right;"><b>- علشان مقلتيش</b><br /></div><div dir="rtl" style="text-align: right;"><b>- طيب ما انا قلت - دي الفاتحة كانت اول امبارح وكان الجمعة واول يوم ليا قلت لكوا</b><br /></div><div dir="rtl" style="text-align: right;"><b>- لا كان المفروض تقولي من الاول</b><br /></div><div dir="rtl" style="text-align: right;"><b>- ما ده الاول مفيش حتى دبل</b><br /></div><div dir="rtl" style="text-align: right;"><b>- لااااا تقولي لي اول ما عرفتي ان حد عايز يتقدم لك</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>انا هاسيب لكوا انتوا التعليق! واللى حصل بعد كده كان مشكلة تانية خالص. نفس الشخص (هيا واحدة فضووووولية جدا) سئلتني "وده بقى اللى كنتى بتكلميه على الموبايل على السلم؟" (!!!!!!) نعم؟؟؟؟؟؟ انا خدت درس مستحيل انساه فى المكتب ده . اي تليفون بيجي لو من اي حد حتى لو اختى او بابا وماما بعد ما اقفل الاقي ناس جنبي بتناقشني فى المكالمة. بمعنى ان لو ماما سئلتني مثلا تاكلي ملوخية ولا بامية وقلت لها بامية هالاقي اللى جنبي بتقولي "هاتاكلوا ايه جنب البامية" وهكذا. فاتعودت لما يجيلي اي تليفون اخده بره المكتب اتكلم براحتى. الهانم تخيلت انى بحب في التليفون فى الشغل!! لقيت نفسي بقولها "لا ده واحد تانى غيره" - مفيش اي اجابة ممكن تتقال غير كده </b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>وبعد الخطوبة والدبل والشبكة والحركات دي رحت بقى الشغل لابسة الدبلة (انا معزمتش حد من الشغل علشان عارفة اللى هايحصل وده ابقى اقوله بعدين) لقيت واحدة بتبص لايدي وبتقولي "حلوة دبلتك - قطعت كام" (قطعت؟؟؟ ايه قطعت دي؟) "فين الشبكة؟" قلت لها فى البيت "ليه؟" قلت لها انا ساكنه فى مدينة نصر وباجي المعادي من غير عربية مش هاينفع البس الشبكة يعنى - "لا برضه كان لازم تورينا الشبكة - وهوا بقى جاب لك الشبكة بكام" قلت لها معرفش الشبكة بكام انا اخترت اللى عجبني وهوا دفع (طبعا الكلام ده بيحصل مع سندريلا فقط مش مع الناس عامة بس وهيا ماااااااااااالها؟) واتسئلت حاجات كتير غريبة جدا منها:</b><br /></div><div dir="rtl" style="text-align: right;"><b>- بيكلمك فى التليفون؟ (اه طبعا) كام مرة؟ (ليه؟)</b><br /></div><div dir="rtl" style="text-align: right;"><b>- بتخرجوا؟ (بعد ما لبسنا دبل اه بنخرج) ايه ده وبابكي سابك تخرجي معاه لوحدك؟ (ما احنا بنخرج الصبح مش بالليل) لوحدكوا؟ (لا هانجيب محرم يخرج معانا)</b><br /></div><div dir="rtl" style="text-align: right;"><b>- قالك انه بيحبك؟ (!!!!) ايه ده لسه مقالش انه بيحبك؟ (!!!! تانى)</b><br /></div><div dir="rtl" style="text-align: right;"><b>- هوا مش بيتصل على الموبايل كتير ليه؟ (كنا على طول على الماسنجر - هانتكلم صوت وتشات وصورة فى الشغل؟!)</b><br /></div><div dir="rtl" style="text-align: right;"><b>- عنده كام سنة وبيتشغل ايه ومامته اخبارها ايه معاكي؟ (الحمد لله الست طيبة واحنا نعرفها طول عمرنا) بس برضه الجارة غير الحماه (الست طيبة الحمد لله - هاتقلب شريرة ليه؟) لا برضه خدي بالك </b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>بعد الجواز كان موضوع تانى ومستوى اعلى شوية فى الفضول. اتجوزت قبل رمضان بحوالي شهر ورمضان بقى جاي علينا خلاص، لقيت واحدة وبدون مناسبة بتقولي "ها جبتي حاجة رمضان؟" (سؤال طبيعي مش مشكلة) لا والله لسه (علشان بابا وماما جابوا لي طبعا بس هيا ملهاش دعوة) "ليه جوزك لسه مقبضش" (افندم؟؟؟) "طيب ما انتى قبضتى - لو هوا لسه جيبي انتى والحياه مشاركة" هاسيب برضه الكومنت ليكوا انتوا انا مش هارد. بعد الحوار ده بيومين اتسئلت "ها؟ وجوزك بيديلك مصروف بيت كام" (مش سامعة!) "بيديلك كام جوزك علشان البيت فى الشهر" (نعم؟ مش واخدة بالي قصدك ايه!!!) انها تحس على دمها مثلا؟ لا!! برضه مركبة الوش التنح وبتسئل ومصممة تعرف. المهم فى الاخر حست على دمها وتانى يوم جت تصلح اللى قالته اليوم اللى قبله "انا بس كنت عايزة اعرف مصروف البيت كام علشان اقولك تتصرفي فيه ازاي يعنى تجيبي ايه وايه وايه علشان انتى طبعا معندكيش خبرة" (محدش قال انى فاقدة اهلية والموضوع مش محتاج اصلا خبرة)</b><br /></div><div dir="rtl" style="text-align: right;"><br /></div><div dir="rtl" style="text-align: right;"><b>الجيم اللى بنزلها خلاص نزلت هاروح العبها بقى </b><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div><div dir="rtl" style="text-align: right;"><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-2659878867377907485?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-11861654257538097602009-10-30T23:48:00.009+02:002009-10-31T04:06:51.968+02:00اوعى تركبي اسانسير ولا تطلعي السلم!!!<div dir="ltr" style="text-align: left;" trbidi="on"><div dir="rtl" style="text-align: right;"><b>الفترة اللى فاتت (اخر الشهرالسابع) تعبت شوية - تقريبا "الواد" كان عايز يخلص بقى وينزل المهم الدكتور قالي على كذا دوا كده وكله تمام وخلاص</b><br /></div><div dir="rtl" style="text-align: right;"><br /><b>فزع وهلع ورعب حصل فى البيتين (بيت اهلي وبيت اهل جوزي) ما اصل كده في خطر على "الواد"...احلى حاجة ان الدكتور لاول مرة فى حياته كان بيضحك وكان نفسي اسئله ايه بيضحك بس مرضتش. مش دي قضيتنا</b><br /></div><div dir="rtl" style="text-align: right;"><b>فضلت عند اهلي فترة كبيرة متصلة علشان معملش اي مجهود (بلطجة يعنى) وكل ما اقوم مثلا اروح الحمام اتسئل "ايه ده؟؟؟؟ رايحة فييين؟" يا جماعة هوا مش في كيس بلاستيك!! ده جوا يعنى عادي بقى! والحمد لله خير - بس انا باذن فى مالطا!! لغاية النهاردة كل ما اقوم من على الكرسي ولا انام ولا حاجة "بالرااااااحة" ويزعقوا فيا!! هما فاهمين الحمل غلط. ولما اروح الشغل كل يووووم تليفونات "اوعى تعملي مجهود" - حاضر - "اوعى تطلعي وتنزلي السلم ...استعملي الاسانسير" - حااااضر - "اوعى ترجعي فى المواصلات" - حاااااااااااااااااااااضر...الخ الخ الخ </b><br /><div class="separator" style="clear: both; text-align: center;"><a href="http://2.bp.blogspot.com/_Y7O2SM0dyJk/SuuaPaYH1GI/AAAAAAAAAAU/acQmmPl0KIc/s1600-h/shouting.gif.jpg" imageanchor="1" style="clear: left; float: left; margin-bottom: 1em; margin-right: 1em;"><img border="0" src="http://2.bp.blogspot.com/_Y7O2SM0dyJk/SuuaPaYH1GI/AAAAAAAAAAU/acQmmPl0KIc/s200/shouting.gif.jpg" /></a><br /></div><br /><div class="separator" style="clear: both; text-align: center;"><a href="http://2.bp.blogspot.com/_Y7O2SM0dyJk/SuuaS7hFpHI/AAAAAAAAAAc/nLOFgdUgTE4/s1600-h/ZwinkyElevator.jpg" imageanchor="1" style="clear: right; float: right; margin-bottom: 1em; margin-left: 1em;"><img border="0" src="http://2.bp.blogspot.com/_Y7O2SM0dyJk/SuuaS7hFpHI/AAAAAAAAAAc/nLOFgdUgTE4/s200/ZwinkyElevator.jpg" /></a><br /></div><b>وفى نفس التوقيت ده طلع اشاعة فى الشغل ان في حالات انفلونزا الخنازير وانا بهبلي قلت لهم - التعليمات بقت متضاربة "اوعى تركبي الاسانسير علشان النفس" - حاضر بس اطلع الدور التامن ازاي؟ (مكتبي فى الدور الثامن - مش ذنبي والله) - "استعمليه بس يكون فاضي" - يعنى اقول للناس اخرجوا بره علشان جنابي يركب ولا ايه؟ - "اتصرفي حرام عليكي - انتى مش عايزة البابي ولا ايه - ده امانة فى رقبتك" - حااااااااااضر هاخليهم ينزلوا لي السبت من البلكونة علشان اطلع فيه.</b><br /><div style="text-align: right;"><br /></div><div style="text-align: right;"><b>جوزي تقريبا من كتر الكلام بتاع الامهات الكبار بتاع "خدي بالك انتى حامل" "بالراحة يابنتى لحسن الحبل يلف على رقبة البابي" "خدي بالك من نفسك وكلي كويس علشان البابي يطلع مبقلظ كده وجميل" بقى يخاف عليا خوف زيادة لدرجة انى من حوالي شهرين وتقريبا معظم الوقت مع اهلي علشان معملش اي مجهود فى بيتي!(معلومة بس كده صغيرة - اهلي واهل جوزي فى نفس العمارة - احنا جيران) بروح كل اسبوع حوالي مرتين بس وتانى يوم ارجع على بابا وماما تانى ...المهم مش ده القصد - احلى حاجة بقى لما نيجي نروح الكام ساعة دول امى تلاحقني بالاسئلة "ايييييه ده؟ انتى مروحة؟" - اه يا ماما مروحة - فترد هيا باستنكار شديد "ليه؟ هاتروحي تعملي ايه يعنى؟" (!!!) طيب والنبي انا راضية ذمتكوا ..ده سؤال؟ ارد اقول ايه؟ هيا مش متخيلة ان ليا بيت او مثلا موضوع ان كل شئون جوزي مامته اللى بتقوم بيها مش انا - من غسيل لمكواه وتحضير هدوم وتحضير اكل وحاجات كتير وتفاصيل كتير المفروض اكون انا اللى بعملها مش حماتى! حاجة تضايق انى احس ان بيتي بقى لوكاندة - انا بروح علشان احس ان ليا بيت برضه وزوج وحياه عادية زي اي اتنين - البعد الكتير عن بعض ده مش كويس خالص لان فى الاخر هايبقى عادي اوي اننا نبعد عن بعض اي مدة...هما بقى مش متخيلين كل ده. عايزين عيالهم فى حضنهم حتى وهما متجوزين</b><br /></div><br /><b>نيجي لنقطة تانية كل واحدة من الامهات بتحاول جاهدة انها تفوز بيها...ماما بتتعامل انى بعد الولادة مش هاروح بيتي اساسا و"لما يجي بابي فى البيت هايعمل له حس كده ويبقى جميل" (!!!) حماتى بتتعامل انى بعد الولادة نخرج بقى ونتفسح طول الوقت ونسيب لها البابي!!! يا جماعة هوا ملوش ام؟؟ مليش بيت؟ طيب يا ماما ابنى ده ملوش اب من حقه برضه يفضل مع ابنه؟؟؟ ويا طنط مش لو احنا بنقطع الخروج كده مش كان اولى اننا نخرج واحنا اتنين بس مش تلاته؟ هوا انا بخلف علشان انتوا تربوا؟ ولا انا بخلف علشان يسليكوا؟ هاجيب لكل واحدة فيكوا شوال لب تتسلى فيه مع كام باكو لبان بس ابعدوا عن دماغي</b><br /><br /><b>ماما عاملة حسابها انى من اول التاسع لغاية بعد الولادة بكام شهر (خدوا بالكوا من كام شهر دي) هافضل جنبها وهيا تاخد بالها من البابي...مش عايزانى اقرب منه - طيب من دلوقتى هيا بتتخانق معايا علشان كده لما يجي فعلا هيا هاتعمل ايه؟؟؟؟ بجد هيا بتتخانق! كنت مرة معاها فى محل ولقيت حاجات حلوة للاطفال وهيا حلفت يمين بالله انها اللى هاتشتري الحاجات دي من معاها هيا وانى مجبش حاجة خالص "يا ماما انا عايزة اجيب حاجة ابني بنفسي" - زعلت وعملتها مشكلة وخناقة وانى "بتحرميني من حاجة بحبها" (!!) "يا ماما انتى كل ما بنشوف حاجة حلوة بتصممى انك اللى تجيبيها" - اول حفيد ليا ليه تحرميني؟ - "يا حبيبتي ما ده اول بابي ليا وعايزة برضه احس انى بجيب له حاجة" - كده؟؟ يعنى هيا دي اخرتها؟؟ طيب والله العظيم هاجيبها يعنى هاجيبها - "مرسي يا ماما تعيشي وتجيبي" </b><br /><br /><b>برضه من ضمن الحاجات اللى بيحافظوا بيها على "الواد" وبيخنقوا بيها عليا ال.... - تخيلوا كده معايا ايه....يعنى اطلقوا لخيالكوا العنان كده وقولوا ايه!! خلاص هاقولك انا - الموابيل واللاب توب!!!!!!!!!!!!!!!!!!!!!!!!!!!!!!!! مرة كانت حماتى بتتصل بيا وكان مشغول - وكانت معايا مكاملة ضرورية اوي وفضلت فترة على التليفون وكانت طنط طول الفترة دي بتحاول تتصل بيا...لما خلصت جه تليفونها ورديت هيا اتضايقت انى كنت بتكلم كتير كده فى الموبايل وان الموبايل خطر وغلط على البابي وعلى دماغي وان الاشعاعات غلط ...الخ ,شوية وامى اتصلت "موبايلك مشغول بقاله كتير ليه؟" - مفيش يا ماما كان فى ناس بتكلمني " يابنتى غلط عليكي وعلى البابي" - حاضر هابقى اجيب كوزين وحبل واتكلم فيهم. طبعا خلال الفترات الطويلة اللى انا قاعدة فيها زي الكرسي مبعملش فيهم حاجة علشان" سي الاستاذ" مفيش حاجة تسليني غير النت والجيمز "يابنتى بلاش الهباب ده طول النهار كده" طيب اعمل ايه؟ "اتفرجي على التليفزيون" - مبحبوش بيجيب تخلف! - "ادخلي افردي ضهرك شوية" - ماما انا لسه صاحية من النوم - "ادخلي تانى ريحي ضهرك" . حد يكلمها والنبي علشان انا زهقت من الكلام.</b><br /><br /><div class="separator" style="clear: both; text-align: center;"><a href="http://2.bp.blogspot.com/_Y7O2SM0dyJk/SuuaWV-DtEI/AAAAAAAAAAk/CmXaGyMMneA/s1600-h/ist2_5869698-shouting-woman.jpg" imageanchor="1" style="clear: right; float: right; margin-bottom: 1em; margin-left: 1em;"><img border="0" height="97" src="http://2.bp.blogspot.com/_Y7O2SM0dyJk/SuuaWV-DtEI/AAAAAAAAAAk/CmXaGyMMneA/s200/ist2_5869698-shouting-woman.jpg" width="137" /></a><br /></div><b> </b><br /><br /><b>هادخل بقى اريح ضهري شوية علشان بتهزأ</b><br /><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-1186165425753809760?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com0tag:blogger.com,1999:blog-4041739309770236534.post-44595898040468331442009-10-29T23:58:00.002+02:002009-11-06T00:51:38.312+02:00حامل فى التامن<div dir="ltr" style="text-align: left;" trbidi="on"><div style="text-align: right;"><span style="font-size: small;"><br /></span><br /><div class="separator" style="clear: both; text-align: center;"><span style="font-size: small;"><a href="http://3.bp.blogspot.com/_Y7O2SM0dyJk/SuoT0BN67BI/AAAAAAAAAAM/lUKLng_OIO8/s1600-h/%D8%AD%D8%A7%D9%85%D9%84-%D9%81%D9%89-%D8%A7%D9%84%D8%B4%D9%87%D8%B1-%D8%A7%D9%84%D8%AB%D8%A7%D9%85%D9%86.jpg" imageanchor="1" style="margin-left: 1em; margin-right: 1em;"><img border="0" src="http://3.bp.blogspot.com/_Y7O2SM0dyJk/SuoT0BN67BI/AAAAAAAAAAM/lUKLng_OIO8/s400/%D8%AD%D8%A7%D9%85%D9%84-%D9%81%D9%89-%D8%A7%D9%84%D8%B4%D9%87%D8%B1-%D8%A7%D9%84%D8%AB%D8%A7%D9%85%D9%86.jpg" /></a></span><br /></div><span style="font-size: small;"><b>انا حاليا فى اول اشهر التامن من الحمل!! كان نفسي اعمل يوميات الخطوبة والجواز واللى شفته وعلاقتي بناس كتير مكنتش اتخيل انى هاقابلهم او انى هاتعرض لبعض المواقف واضطر معها انى اتحكم فى اعصابي ظاهريا واكتم جوايا واسكت!! انا اصلي مش كده - اللى بتغاظ منه بقوله!!</b></span><br /></div><div style="text-align: right;"><span style="font-size: small;"><b>ما علينا </b></span><br /></div><div style="text-align: right;"><span style="font-size: small;"><b>النهاردة الخميس وانا بقالي حوالي شهرين مخرجتش!!! كل الناس فى الشارع وانا قاعدة قدام البتاع ده بدور على اي حاجة اعملها ومش لاقية! فى خلال الشهرين اللى فاتوا لعبت كمية جيمز وشفت كمية افلام وقريت كمية حاجات خرافية! علشان بس الوقت يعدي بقى</b></span><br /></div><div style="text-align: right;"><span style="font-size: small;"><b> ما انا "ام الواد" ولازم احافظ على الواد!! اتجوزت من حوالي سنة وكام شهر وده اول بابي! الناس اللى حواليا بتتعامل انى حامل فى فازة كريستال هاتتكسر لو اتحركت كتير - مش متخيلين انى هاطق من كتر الملل والزهق ومن كتر ما سمعت كلمة "معلش هانت"!!!! هانت على مين؟؟؟ اكيد مش عليكوا! كل واحد مستنى انى اجيب "الواد" وبس! وبقيت مع الوقت حاسة انى وعاء فقط مش انسانه! واحدة مهمتها فى الحياه انها تجيب عيال وبس! زي المايكنة الزيروكس بالظبط - مهمتها تطلع ورق</b></span><br /></div><div style="text-align: right;"><span style="font-size: small;"><br /></span><br /></div><div style="text-align: right;"><span style="font-size: small;"><b>المهم</b></span><br /></div><div style="text-align: right;"><span style="font-size: small;"><b>فرحة جوزي انه ولد كانت كبيرة اوي وكذلك امى واختى - حماتى كان نفسها فى بنت (على غير عادة كل الحماوات) وبدا كل واحد بقى يحشر نفسه هانسمي المحروس ايه!! وكل واحدة من الستات الكبار تقول "انا جدته!!!" وايه يعنى؟ يعنى الملكة اليزابيث الام؟ انا اكتر واحدة احق انى اختار اسم لابني واشارك فيه جوزي. وكل واحدة منهم بدات تختار شوية اسامى علشان نتجنبها "اصل اسم كذا وحش اوي" وانا بهبلي اسئل ليه؟ "اصله كان بخيل" !!!! لا والله؟؟ لا بس فعلا بلاش لا الواد يطلع بخيل بلاش بلاش</b></span><br /></div><div style="text-align: right;"><span style="font-size: small;"><b>وبعدين كان في جلسة ظريييفة من احد الاقارب اننا ازاي نسمي الولد! لازم يكون اسم اسلامي - لازم يكون اسم "فخم" ممكن يتحط على يافطة (ما عبد المتجلي اسم فخم!! هاسمي ابنى كده؟) - لازم يكون اسم لايق على اسم ابوه (!!) (نفس اللون يعنى ولا بفيونكة؟) واحيانا الابن بيحب يكرم ابوه اللى تعب معاه طول حياته ويسمى ابنه على اسم الاب (!!!!!) نو كومنت!</b></span><br /></div><div style="text-align: right;"><span style="font-size: small;"><br /></span><br /></div><div style="text-align: right;"><span style="font-size: small;"><b>خلصنا من موضوع الاسم واتفقت انا وجوزي (الحمد لله جوزي راجل مكبر دماغه ومتفهم) على اسم معين واتفقنا برضه ان اللى يسئل "ها اسم البابي ايه" هانقوله اسم وهمي! وفعلا ده اللي حصل وكل واحد بدا يخترع اسم دلع "للواد". اللى مكبر دماغه اوي بقى من الحوار ده كله ابويا! نظام انا مالي؟ انا مليش فيه - والله راجل جدع! الراجل خلف وكبر وربى واختار معايا راجل اتجوزه - مش رخامة بقى كمان يختار اسم ابنى!!!</b></span><br /></div><div style="text-align: right;"><span style="font-size: small;"><br /></span><br /></div><div style="text-align: right;"><span style="font-size: small;"><b>الاسئلة الابدية اللى تكره الواحد فى حياته - كل ما حد يشوفني بيكون واحد او اكتر من الاسئلة اللى جاية (كل الناس بما فيهم الجيران وزمايل الشغل)</b></span><br /></div><div style="text-align: right;"><span style="font-size: small;"><b>1- اخبار "عتريس" ايه؟ (اشمعنى عتريس؟) <br /></b></span><br /></div><div style="text-align: right;"><span style="font-size: small;"><b>2- اخبار"حمبوزو" ايه؟ ( لما يكون الشخص ظريف شوية)</b></span><br /></div><div style="text-align: right;"><span style="font-size: small;"><b>3- هاتولدي امتى؟ (تانى وتالت يوم نفس السؤال)!!</b></span><br /></div><div style="text-align: right;"><span style="font-size: small;"><b>4- ياااااه مناخيرك كبرت - انتى حامل فى ولد؟ (لا في ازازة بيبسي)</b></span><br /></div><div style="text-align: right;"><span style="font-size: small;"><b>5- انتى ماشية زي البطة ليه كده؟ (عارفة انى بمشي زي العمدة الالى! بس هاعمل ايه؟)</b></span><br /></div><div style="text-align: right;"><span style="font-size: small;"><b>6- انتى بتنهجي كده ليه؟ (ابدا اصلي لسه واخدة لي كام واحدة ضغط كده فى السريع)</b></span><br /></div><div style="text-align: right;"><span style="font-size: small;"><b>7- هاتسمي البابي ايه؟ ( هاساميه كذا - وغالبا بيكون الرد "هوا باباه اسمه ايه؟" - اسمه كذا - "ممممم ربنا يتمم لك على خير بس مش الاسم ده منتشر؟ " محدش قال انى هاجيب منتج جديد فى السوق!!!</b></span><br /></div><div style="text-align: right;"><span style="font-size: small;"><b>8- اسم الدكتور ايه؟ (اينشتاين - "ممممم مسمعتش عنه قبل كده " - انا مش هاخد درس فيزيا!! فى تلاتين الف دكتور نسا فى مدينة نصر لوحدها!!!! )</b></span><br /></div><div style="text-align: right;"><span style="font-size: small;"><b>9- ماماتك فرحانة؟ (لا مش اوي)</b></span><br /></div><div style="text-align: right;"><span style="font-size: small;"><b>10- حماتك فرحانة؟ (مسئلتهاش)</b></span><br /></div><div style="text-align: right;"><span style="font-size: small;"><b>11- جوزك مبسوط؟ (احيانا)</b></span><br /></div><div style="text-align: right;"><span style="font-size: small;"><br /></span><br /></div><div style="text-align: right;"><span style="font-size: small;"><b>اسئلة رخمة وسخيفة ومحدش بيبطل اسئلة كل يوم!! انا بقالي سبع شهور بتسئل اسئلة غبية!!!!!! اصل لو مرة ماشي - اتنين اوكيه بس كل مرة نفس الاسئلة حرام. الناس بتتعامل مع الحامل انها حلة وفيها طبيخ - عايزين يعرفوا الطبيخ هايستوى امتى!!!!!!</b></span><br /></div><div style="text-align: right;"><span style="font-size: small;"><br /></span><br /></div><div style="text-align: right;"><span style="font-size: small;"><b>كفاية كده النهاردة - هاروح اشوف حاجة اكلها!!</b></span><br /></div></div><div class="blogger-post-footer"><img width='1' height='1' src='https://blogger.googleusercontent.com/tracker/4041739309770236534-4459589804046833144?l=ana-7amel.blogspot.com' alt='' /></div>Om El-Wadhttp://www.blogger.com/profile/01908644558800319967noreply@blogger.com3